Sturtuútvarpið versta græjan

Vatnshelt útvarp til að nota í sturtu var valið versta heimilistæki allra tíma í nýrri könnun bresks tryggingafyrirtækis. Um 3.000 konur tóku þátt í könnuninni og á eftir útvarpinu, sem alltaf er vanstillt og þarf að stilla hátt til að yfirgnæfa sturtuniðinn, voru rafhlöðuknúin kerti í öðru sæti og rafmagnsnaglaþjalir í því þriðja. SodaStream-gosdrykkjavélin lenti í fjórða sæti.

Fleiri ónytsamleg tæki voru á listanum, eins og pönnukökuvél, fondú-pottar, poppvélar og bakklórur. Átta af tíu konum sögðust hinsvegar ekki geta lifað án sjónvarpsins og örbylgjuofnar og ryksugur voru ein vinsælustu tækin.