Dual PanelDane
1Sasampun maletan makudang-kudang masa, akeh pisan saking pantaran rakyate, yadiastu luh wiadin muani ngrengkeng marep ring nyama-nyamaannyane paturu wong Yahudi.
2Wenten sane mabaos sapuniki: “Kulawargan tiange akeh pisan. Tiang perlu gandum mangda tiang nyidayang kantun urip.”
3Sane tiosan mabaos sapuniki: “Tiang sampun ngadeang tegalan, abian anggur miwah umah tiange mangda tiang polih gandum cukup, mangda tiang nenten padem makenta.”
4Wenten taler sane mabaos sapuniki: “Tiang patut nyelang jinah buat anggen tiang naur pajeg tegalan, abian anggur tiange ring ida sang prabu.”
5Wenten malih sane mabaos sapuniki: “Iraga pateh paturu bangsa Yahudi. Punapike pianak-pianak tiange nenten pateh ring oka-okan semetone punika? Nanging pianak-pianak tiange sampun wenten sane dados panjak. Pianak-pianak tiange luh sampun wenten sane kadol dados panjak. Tiang nenten mrasidayang malih mapiuleh, santukan tegal miwah abian anggur tiange sampun kambil antuk anak lianan.”
6Rikala tiang miragi pakrengkengnyane, tiang raris pedih pisan.
7Irika tiang raris mamanah muputang indike punika. Tiang tumuli nalih parapamimpin miwah paraprakanggen rakyate, kadulurin baos sapuniki: “Semeton nindes kadang wargan semetone.” Tiang raris nauhin rakyate mangda pada mapunduh buat maosang indike punika.
8Irika tiang mabaos sapuniki: “Sasida-sidaan iraga sampun nebus parasemeton wong Yahudi sane sampun kadol ring wong sunantara. Nanging sane mangkin malah semeton sami pada mamaksa parasemeton ragane, mangda ipun ngadol deweknyane ring semeton!” Parapamimpine punika wantah meneng kewanten tur nenten mrasidayang masaur.
9Tiang malih mabaos sapuniki: “Pamargin semetone punika iwang! Semeton patut ajerih ring Ida Sang Hyang Widi Wasa, tur semeton patut ngamargiang paindikan sane patut. Malantaran punika, semeton nenten jaga dados dadalan pabuat meseh-meseh iragane, bangsa sane tan pawidi punika jaga nganistayang iraga.
10Tiang sampun ngwehin rakyate nyelang jinah wiadin gandum, kadi asapunika taler paraanake sane nyarengin tiang miwah sane makarya pabuat tiang. Sane mangkin wusanja nagih utange punika.
11Palilayangja utang-utangipune sane patut taur ipun ring semeton, minakadinne: Gandum, anggur wiadin minyak saitun. Tur waliangja taler tegal, abian anggur, abian saitun miwah umah-umah ipune.”
12Parapamimpine tumuli masaur sapuniki: “Tiang jaga ngamargiang sapangandikan semetone. Tiang jaga ngwaliang paderbean ipune makasami, tur tiang nenten jaga nagih malih utang-utangnyane.” Tiang tumuli ngaturin parapanditane mangda dane pada ngranjing tur nunas ring parapamimpine punika mangda masumpah ring ajeng parapanditane, mangda parapamimpine punika satia ring janjinnyane punika.
13Sapanglanturipun tiang raris ngelus sabuk wadah jinah tiange saha nguyeg sabuke punika, sinambi mabaos sapuniki: “Kadi asapuniki Ida Sang Hyang Widi Wasa jaga ngambil umah sapaderbean semetone tur Ida pacang manggayang semeton tiwas nektek.” Sakancan anake sane wenten irika pada masaur sapuniki: “Saking wiakti wantah kadi asapunika.” Dane sami raris ngluihang Ida Sang Hyang Widi Wasa. Parapamimpine punika raris pada tuon ring janjinnyane.
Dane
14Sajeroning 12 taun tiang dados gubernur ring tanah Yehuda, ngawit saking taun sane kaping kalih dasa panyeneng Ida Sang Prabu Artahsasta kantos rauh ring taun sane kaping tigang dasa kalih, tiang wiadin kadang wargan tiange nenten naenin nampi pikolih sakadi sane patut katampi antuk sang gubernur.
15Sakancan gubernure sane riinan ring tiang, punika dados tetegenan sane berat pabuat rakyate. Paragubernur punika taler ngarsayang jinah 40 perak arahina pabuat pangan miwah anggurnyane. Malahan paraparekannyane taler meres rakyate. Nanging tiang ngamargiang paindikan sane tios pisan, duaning tiang ajerih ring Ida Sang Hyang Widi Wasa.
16Kakuatan tiange makasami anggen tiang ngwangun temboke punika, tur nenten pisan tiang ngulati kasugihan. Asing-asing anak sane makarya pabuat tiang, sareng-sareng makarya ngwangun temboke punika.
17Nyabran rahina tiang namiu wong Yahudi 150 diri miwah pamimpin-pamimpinnyane. Sajaba punika taler rakyate sane rauh saking bangsa-bangsane sane ring kiwa tengen.
18Nyabran rahina tiang patut nyediayang banteng aukud, biri-biri sane pinih becik 6 ukud, ayam akeh pisan, tur nyabran dasa rahina tiang nyediayang anggur sane becik. Nanging duaning tiang uning ring tetanggungan rakyate berat pisan, tiang nenten naenin nagih pikolih sane patut katampi antuk sang gubernur.
19Duh Ratu Sang Hyang Widi Wasa, titiang ngastawa ring ayun Palungguh IRatu, ledang IRatu eling ring saluiring sane sampun kardi titiang pabuat rakyate punika.