Antronapass

Dr Antronapass isch e Bärgübergang zwüschem Saastaal im Kanton Wallis und em Antronataal z Itaalie.

Dr Bärgwäg goot vo dr Walliser Site här vo Almagäll dur s Furggtälli uf bis zum Saddel zwüschem Jazzihorn und em Latelhorn, wo uf Iteliänisch Punta di Saas heisst. D Passhöchi isch uf 2838 Meter. Uf dr iteliänische Site chunt me über d Alpe Corone und am Stausee vo Cingino verby steil is Antronatal abe zu dr Alpe Lambraoro. Dört träffe sech d Wääg vom Antronapass, vom Ofetalpass (it. Passo di Antigine) und vom Passo di Valaverta, wo au Passo di Lavazzero heisst. Öppe acht Kilometer witer unde im Taal isch Antronapiana, dr Hauptort vo dr iteliänische Gmeind Antrona Schieranco.

Dr Antronapass hed dr dütsch Name Saaserfurgga, wo hüt chum me brucht wird. Und me hed em i dr neuere Zyt au Saaserbärg gseit; derwyl isch das eigentli au dr Name vom Monte-Moro-Pass, wo vo Almagäll nach Makanaa goot.

• 
  s Furggtälli
• 
  dr Cinginosee

Weblinks

 Commons: Antronapass – Sammlig vo Multimediadateie

• Arthur Fibicher: Antronapass In: Historisches Lexikon vo dr Schwiiz.