عصير

عصير ديال لتشين.

مخطوط قديم مذكور فيه لعصير.

عصير (بـنݣليزية: Juice) هو واحد سايل طبيعي فيه لأنسيجة ديال ديسير ولخضرة. وكيوجد لعصير من خلال لعملية اما د التعصار ولا نقيع ديال ديسير الطايب ولا لخضرة بلا حرارة. وكيوجد لعصير فدار بلاستيعمال دتعصار ليدوي أما بليد ولا بلواسطة ديال شي عصارة.

الطروق دلحفظ وتعلاب

من اهم الطروق لي كتتخاد باش يتخزن ويتعالج لعصير كاينة؛ التعلاب، التبسار، التجماد، التبخار. وفلغالب لعصير تجاري كيتصفا باش يزول منو اللوب وحتا الألياف، وكيكون هاد نوع غالبا ياما مركز ولا مجمد، وكيتخص يتزاد عليه لما باش يرجع لاصل ديالو. وفلغالب كيكون لمذاق تاع لعصير لمركز، مختالف شوية على لعصير طازج.

الاشكال لمختالفة

من اشهر لعصائر لي موجودة، كاين متلا؛ التفاح، لتشين، الݣريپ فروت، لأناناس، مطيشة، لمانݣو، خيزو، لعنب، التوت والرمان. كيتميز لعصير دلفواكه بلي غني بلأملاح لمعدنية، بحال: لكالسيوم، ولفسفور، ولماݣنيسيوم، ولپوطاسيوم، ولحديد. وعاد زيد هو ساهل فلهضيم، لدكشي لي فيه من احماض عضوية عندها قيمة غدائية موهيمة بزاف، شي لي خلاها مفضلة عند صحاب لونطريما. وكينصح الاختصاصيين ديلل التغذية بلماكلة ديال لعصير دلفواكه لي موجد فـالدار. و عاد ممكن تنويع فلعصير بتخلاط ديال نواع مختالفة مع بعضياتها ولا زيادة تاع شي مكونات وحدة اوخرى، بحال:

• لعصير د لبطيخ.
• لعصير د لتشين ولحامض.
• لعصير د لأناناس ولكيوي.
• لعصير د الجوافة بالرمان.

لفواىد الصحية

حدد لخبراء ديال تغدية أهم نواع دلعصير ولفوائد ديالها، وهي:

• لعصير د لتشين:

كينصحو بيه للبراهش وللمراهقين لي فلوقيتة ديال نمو، وكيتنصح بيه حتا فلوقيتة ديال لبريان منبعد تعرض للسخانة ولا لحملة.

• لعصير د تفاح:

كيتعتابر مصدر موهيم ديال طاقة، ومدر ديال لبول، ملين على الامساك حيت غني بلألياف، وحتا كيعالج من بزاف ديال لأمراض.

• لعصير د لأناناس:

كيساعد على لهضيم ومفيد بزاف للمعدة، وعاد زيد هو مدر للبول، وكيحيد السموم من لجسم، وكيتصحو بيه للناس لي مراض بفقر الدم وعسر الهضم، وهاد لعصير عندو قدرة كبيرة على التفتيت ديال الشحمة، الشي لي كيخليه مفيد بزاف للناس لي مراض بالغلض.

• لعصير د لمشماش: كيتنصح بيه للناس لي مراض بضعف ورقوقية، وحتا الضعف لعقلي، ولي مراض بفقر الدم. وهو مفيد حتا للدراري الصغار، وعندو بزاف ديال لفواىد فلمكافحة ديال الإيسهال.
• لعصير د لكرز:

هو غني بزاف بلعناصر لمعدنية، ومقوي لمفاصل ديال لجسم، وعاد شريب ديالو لمدة كتر من يومين، كيسهل لعملية ديال تحياد دالسموم ولفضلات من لجسم.

• لعصير د لحامض:

هو مفيد بزاف للبراهش لي فلوقيتة ديال النمو، وحتا لمكافحة ديال لأمراض دلبرد والحملة فلفصل ديال الشتا.

• لعصير د التوت:

هاد لعصير كيقوي لوظائف دلكبدة وكينظم لجهاز لعصبي، وكينصحو بيه حتا لي مراض بالنقرس (لحريق دلمفاصل) والروماطيزم، باش يخفف آلامها.

• لعصير د لعنب:

كيتعتابر من أحسن لعصائر دلفواكه حيت هو كيجري على السموم من لجسم، وكينصحو بيه للمرضى ديال لكلاوي ولمصارن ولأمراض دلقلب ولارتفاع ديال ضغط دالدم، وكيزول حتا لاحتقانات دلكبدة وكيخفف الالتهابات دلجهاز لهضمي، وكيساعد مزيان فتنظيم ديال دورة الدموية، وكينصحو بيه للناس لي مراض بشي نواع دلحميات.

• لعصير د لفريز:

كيولي مرطب وملين ايلا تخلط مع لما، وكيولي قابض ايلا تصايب بوحدو. وكيساعد فلمكافحة ديال لالتهابات دلحلق ولبلعوم ولسان.

لمعلومات لغذائية

على حساب لمعلومات ديال وزارة الزراعة لميريكانية، فراه فكول كاس ديال لعصير دلأناناس (250ݣرام)، كاين :

• السعرات لحرارية: 132
• الدهون: 0.30
• الدهون لمشبعة: 0
• لكاربوهيدرات: 32.17
• لألياف: 0.5