Julia Conesa Conesa

Julia Conesa Conesa
Vida
Nacimientu	Uviéu, 25 de mayu de 1919
Nacionalidá	España
Muerte	cementeriu de La Almudena, 5 d'agostu de 1939 (20 años)
Sepultura	cementeriu de La Almudena
Causa de la muerte	mancada por arma de fueu
Estudios
Llingües falaes	castellanu
Oficiu	modista
Miembru de	Mocedaes Socialistes Unificaes

Julia Conesa Conesa (Uviéu) foi una modista, activista política mientres la Guerra Civil española. Foi perseguida poles sos idees. Formó parte del grupu de les 13 muyeres afusilaes nel campusantu de La Almudena y que, por ello, pasaron a la hestoria d'España como les 13 roses.

Biografía

Retratu de Julia Conesa

Julia Conesa Conesa, yera nacía n'Uviéu. La fecha de la so nacencia ye desconocida. Morrió a los 20 años nel campusantu de Madrid, víctima de la represión franquista, tres la Guerra Civil española. Julia Conesa perteneció a les «13 roses». Conesa dedicábase a la costura. Sicasí, al marxe d'esto, tamién yera políticamente activa yá que taba afiliada a les Juventudes Socialistas Unificadas (JSU), una organización fundada en 1936 como resultáu de la unión ente Unión de Juventudes Comunistas y la Federación de Juventudes Socialistas. La so afiliación a esta asociación permitió-y collaborar como monitora nes actividaes deportives que les mocedaes entamaben. Sicasí, tuvo que dexar el so emplegu de monitora, para empezar a trabayar como cobradora de tranvíes, por cuenta de la situación económica que vivía la so familia. Vivía en casa de los sos padres cola so madre y la so hermana.

La detención

Foi en mayu de 1939 cuando se produció la so detención. Conesa foi denunciada por un amigu del so noviu y detenida mientres cosía na so casa. El motivu nun foi más que'l mieu que sentía'l réxime franquista pola reorganización de Mocedaes Socialistes Unificaes. Una y bones esta organización siguía lluchando na clandestinidá pola defensa de la II República española.

Sicasí, a pesar d'esto, les continues persecuciones que sufríen los miembros de l'asociación fixeron qu'estos adulces fueren sumiendo, una y bones les constantes detenciones que recibíen, faíen que se fueren delatando ente los mesmos compañeros. Ente toos estos deteníos atopábense Julia y les sos 12 compañeres, les que pasaríen a la hestoria como les 13 roses. El sucesu que tuvo de resultes l'arrestu de Julia Conesa y les otres 12 moces foi l'atentáu terrorista del comandante de la Guardia Civil Isaac Gabaldón , xunto cola so fía y el so xofer, el 27 de xunetu de 1939. Esti asesinatu foi atribuyíu precisamente a les Mocedaes Socialista Unificaes, de les que Conesa formaba parte.

Dempués de la detención, fueron recluyíes nel centru penitenciariu de muyeres de Las Ventas, en Madrid. Los testimonios d'aquellos que vivieron estos duros momentos, tamién revelen aspeutos del calter d'esta muyer:

"Lleváronles en plena nueche y cuando baxaben les escaleres Julia empezó a cantar l'himnu de la "Guardia Moza", toles demás siguieron y les sos voces fuéronse perdiendo adulces; minutos dempués y sobro'l sangre de los rapazos, fueron asesinaes".

Mientres la estancia en prisión, Julia Conesa, igual que'l restu de deteníes, solo teníen contactu col esterior al traviés de les visites de los familiares y la correspondencia qu'esistíen ente dambes partes, deteníes y familia. Gracies a eses cartes la moza Conesa foi protagonista d'una de les frases que más trescendió a la hestoria sobro esti fechu. La última carta que se-y atribúi a la víctima, termina con una frase rompedora:

“Madre, hermanos, con tol ciñu y entusiasmu pídovos que nun me lloréis naide. Salgo ensin llorar. Mátenme inocente, pero muerro como tien de morrer una inocente. Madre, madrecita, voi axuntar cola mio hermana y pá al otru mundu, pero ten presente que muerro por persona honrada. Adiós, madre querida, adiós pa siempres. La to fía, que yá enxamás te podrá besar nin abrazar. Qu'el mio nome nun se borre na historia”. 

Finalmente foi afusilada, al igual que les sos compañeres, la madrugada del 5 d'agostu del 1939 na muria este del campusantu de l'Almudena.

Na actualidá

A pesar de que'l casu de la Trelce Roses cobró especial importancia arriendes de ciertes publicaciones sobro los sos protagonistes, hai historiadores que sostienen que primero qu'asocediera esti fechu, les Trelce Roses, yá teníen gran importancia ente los acontecimientos qu'asocedieron n'España mientres la posguerra. Anguaño, entá se-yos sigue rindiendo homenaxe cada añu, el mesmu día que tuvo llugar l'afusilamientu, un actu que se realizaba dende 1998 de por cuenta de la Fundación Domingo Malagón. D'esta manera preténdese visibilizar la llucha d'unes muyeres que s'enfrentaron a toles represiones que supunxo'l franquismu pa elles.

Referencies

• Datos: Q70783380