Orlando Pelayo

Orlando Pelayo (Xixón, 14 d'avientu de 1920; Uviéu, 15 de marzu de 1990) ye unu de los pintores asturianos qu'algamaron mayor sonadía internacional.

Treslladóse cola so familia a Estremadura y darréu a Albacete, llugares nos que trescurrió la so neñez y adolescencia. La Guerra Civil española llevólu a defender al gobiernu de la República. Finalizada la contienda tuvo que tomar el camín del esiliu xunto a so padre, asitiándose n'Orán (Arxelia), onde conoció los campos de refuxaos. Allí vería morrer a so padre, víctima de la tuberculosis y el trabayu ablayante.

Foi precisamente n'Orán onde entamó los sos primeros trabayos. En 1947 treslládase a París onde dapoco va integrándose na vida artística de la ciudá, lo mesmo que ficieron otros pintores españoles. El so regresu dende l’'exiliu solo foi posible cuando les circunstancies lo permitieron. Na so obra artística la guerra y l'exiliu ocuparon un llugar cimeru, dexando testimoniu del sufrimientu humanu.

Durante esta primera dómina cultiva la pintura figurativa con un marcáu espresionismu. Darréu vino otra etapa, llamada solar, que surdio na decada de los años 50 y que se caracterizó pol francimientu del motivu en planos, asina como pola viveza del color.

Ente los años 1959 y 1962 apaeció la serie «Cartografíes de l'ausencia», que suponen un repasu preñáu de señardá de les tierres españoles nes que vivió, y a la que pertenez Asturies. Dende 1962, el pintor dio un xiru a la so producción con nueves series centraes sobre too na historia y la cultura clásices españoles en cuadros llaraos de pantasmales figures como podemos ver en La Celestina.

La dómina final, la que s'abre en 1972, de la que ye una pieza destacada Alegoríes , caltuvo les reflexiones sobre'l pasáu a través de munchos otros seres allucinaos y inquietantes qu'apaeecen n'espacios atravesaos por característicos segmentos.

Orlando Pelayo foi tamién un dibuxante bayurosu, lo mesmo qu'ocasional pero interesante escultor.

Residía en París, pero pasaba llargues temporaes veraniegues nel so Xixón natal.

Esposiciones, colecciones y títulos

A lo llargo de la so carrera artística participó nuna buena riestra d'esposiciones individuales (Orán, Arxel, París, Suecia, Tokiu, Munich, Madrid, Xixón, Uviéu, Sevilla...) y colectives (Ḥélsinki, Orán, Londres, París, Nueva York, Berlín, Amsterdam, Méxicu, Florencia, Bruxeles, Praga...). Asina mesmo los sos cuadros tan presentes n'importantes colecciones a lo llargo de tol mundu y en munchos museos (Nacional d'Art Moderne de París, el de Pintura Contemporánea y el museo Estrada de Barcelona, los de Poitiers, Toulouse, Pau, Amiens, St. Etienne, Orán, Arxel, Neuchatel...). Asina como nel Muséu de Belles Artes d'Asturies, al que donó dos de les obres espuestes na muestra que se colgó nel mesmu nel añu 1980, col títulu «Cuarenta años de pintura. 1939-1979». Una década depués, el 27 de xunu de 1989, el pintor facía una gran donación que comprendía 27 óleos, seis escultures y les sos series de grabados sobre La vida de Lazarillo de Tormes, les Coplas por la muerte de su padre, de Jorge Manrique, y la Fábula de Polifemo y Galatea, de Luis de Góngora. Más sero, en xineru de 1990, en enero de 1990, completaría esta donación con 22 acuareles.

El currículum d'Orlando Pelayo cuenta con numberosos reconocimientos, ente ellos el Premiu Jeckel (1953) en Menton, el Premiu Portica (1964) en París, y el Gran Premiu Othon Friesz (1955), de pintura. Asina mesmo, foi obxetu de dellos nomamientos, como'l d'Oficial de la Orden de les Artes y les Lletres pol Estáu francés, en 1984, y el de Fíu Predilectu pol Conceyu de Xixón, a títulu póstumu, en 1992. En 1985 l'Institutu d'Estudios Albacetenses concedió-y la Medalla de Plata, la mesma distinción que recibiría en 1989 por parte del Gobiernu del Principáu d'Asturies.