Doctor Zhivago

Doctor Zhivago (rusu: Доктор Живаго, Doktor Zhivago) ye una novela de Borís Pasternak, publicada en 1957. Al añu siguiente, el so autor recibiría'l Premiu Nobel de Lliteratura. La novela garra'l nome del so protagonista, Yuri Zhivago, un médicu y poeta idealista. La pallabra zhivago caltién la mesma raíz que la pallabra rusa que significa "vida" (жизнь), y ésti ye precisamente ún de los temes más importantes del llibru. Trata de la hestoria d'un home dixebráu ente dos muyeres, cola revolución de 1917, y la posterior guerra civil de 1918-1920 como fondu. Más profundamente, la novela amuesa'l sofrir d'un home cuando la vida que siempre conociera ye tresformada por fuercies que tán más alló de lo qu'él pue controlar. El llibru foi adaptáu al cine en 1965, nuna película dirixida por David Lean. Tamién foi iguáu varies veces pa televisión.

Escritura y publicación

De magar la novela contién pasaxes que foron redactaos metanes 1910 y 1920, Pasternak nun finara la escritura de Doctor Zhivago hasta 1956. Unvióla entós pa la so espublización al diariu Novy mir, que la rechazó por razones polítiques: l'autor, como'l doutor Zhivago, taba más interesáu pol bientar de los individuos que pol de la sociedaá, y los censores soviéticos interpretaron qu'en determinaos pasaxes subxacíen puntos de vista antimarxistes. Na novela había alusiones implícitEs a los campos de prisioneros del estalinismu.

En 1957, el editor italianu Giangiacomo Feltrinelli consiguió sacar de contrabandu'l manuscritu fora de la Unión Soviética, y publicó en Milán dos ediciones de la obra: l'orixinal, en rusu, y so traducción al italianu. Al año viniente, la novela apareció n'inglés, y a continuación foi vertía un total de dieciocho llingües. L'éxitu internacional d'esta novela fo en gran midida la razón de que'l so autor obtuviese darréu'l Premiu Nobel de Lliteratura.

Sicasí, entá nun esiesti una torna al asturianu.