Lansing (Michigan)

Lansing
Alministración
País	Estaos Xuníos
Estaos	Michigan
Condáu	condáu d'Ingham
Tipu d'entidá	ciudá de los Estaos Xuníos
Mayor of Lansing, Michigan (en)	Andy Schor
Nome oficial	Lansing (en)
Nome llocal	Lansing (en)
Códigu postal	48901–48980, 48901, 48902, 48905, 48908, 48910, 48912, 48914, 48918, 48920, 48925, 48921, 48926, 48927, 48930, 48933, 48936, 48939, 48940, 48942, 48944, 48947, 48949, 48952, 48953, 48957, 48961, 48963, 48965, 48966, 48968, 48971, 48973, 48976, 48977 y 48979
Xeografía
Coordenaes	42°44′01″N 84°32′48″W / 42.7335°N 84.5467°O
	Lansing Lansing (los EE.XX.)
Superficie	102.970084 km²
Altitú	262 m
Llenda con	Portland (es)
Demografía
Población	112 644 hab. (1r abril 2020)
Porcentaxe	100% de condáu d'Ingham
Densidá	1093,95 hab/km²
Más información
Fundación	1835
Prefixu telefónicu	517
Estaya horaria	UTC−05:00 (horariu estándar); UTC−04:00 (horariu de branu)
Llocalidaes hermaniaes	Cosenza, Saltillo, Guadalajara y Sakaide
	lansingmi.gov

Lansing ye la capital del estáu estauxunidense de Michigan. Ta asitiada unos 130 km al oeste-noroeste de Detroit, que ye la mayor ciudá del estáu, y pertenez, na so mayor parte, al condáu de Ingham, magar que parte del so territoriu urbanu ta incluyíu nos de Eaton y Clinton. Ye, amás, la única de les 44 capitales d'estáu asitiaes nun condáu que nun ye la capital d'elli. Tien una población estimao (U.S. Census Bureau, 2014) de 114.620 habitantes, con 453.603 nel so área metropolitana.

L'área metropolitana de Lansing, que-y llamen tamién Mid-Michigan o Central Michigan, ye un centru educativu y alministrativu perimportante. Hai nella bien d'instituciones universitaries: Universidá de Michigan State (fundada en 1855), dos facultaes de medicina, dos escueles d'enfermería, dos facultaes de derechu (una d'elles, la Thomas M. Cooley Law School, ye la mayor del país), una facultá de veterinaria... Y ye tamién la sede de la mayoría de los órganos alministrativos estatales (capitoliu, tribunal supremu y corte d'apelaciones, biblioteca estatal...) y d'un tribunal federal.

Xeografía

Lansing ta allugada na zona central del sur de la Lower Peninsula (península d'abaxu), nel llugar nel que'l ríu Grande s'axunta col ríu Red Cedar y a una altitú media de 260 m sobro'l nivel de la mar. El primeru de los ríos nomaos crucia'l downtown de la ciudá, y el segundu, afluente d'aquél, cuerre mansulino al traviés del campus de la Universidá de Michigan State. Hai tamién, nel ámbitu urbanu, dos llagos: el llagu Park y el llagu Lansing. Dambos tán na fastera nororiental de la ciudá. El segundu d'ellos tien una estensión de dos km², y ye perutilizáu nel branu por pescadores y nadadores y polos remeros del Michigan State University Sailing Club y del Lansing Sailing Club.

Demografía

Según el censu del 2000 había na ciudá 119.128 persones viviendo, con 45.505 llares y 28.366 unidaes familiares, con una densidá de población de 1.312,3 hab/km². La distribución racial yera la que vien darréu: 65,28% de caucásicos (61,4% de caucásicos que nun yeren d'orixe latinoamericanu), 21,91% d'afroamericanos, 0,8% de nativos americanos, 2,83% de persones d'orixe asiáticu, 0,05% natives de delles islles del océanu Pacíficu, 4,54% de xente d'otros oríxenes y 4,60% de xente mestizo. El porcentaxe d'habitantes que nacieran notros países yera del 5,9%. Los ingresos medios d'un hogar na ciudá yeren de 34.833 dólares añales, y la renta per cápita yera de 17.924 dólares. Un 13,2% de la población vivía perbaxu la llinia la probitú; cuasi un cuartu d'ellos yeren guajes y cuasi un 10% ancianos.

Historia

La zona na que s'asitia Lansing foi esplorada por Hugh Henward en 1790, magar que'l terrenu, que taba de monte, nun se rozó hasta alredor de 1825. Nel iviernu de 1835-36 dos hermanos que vinieran de Nueva York instaláronse na zona qu'anguaño ye'l distritu REO Town, al sur del downtown de Lansing, y nomaron al asentamientu Biddle City. Magar que'l llugar yera una llamuerga tapada pol agua lo más del añu, volvieron pal so estáu natal (y más concretamente a la ciudá neoyorkina de Lansing) y vendieron finques d'una ciudá que nun esistía. Contáron-yos a los habitantes de Lansing (Nueva York) que la ciudá tenía una estensión de 65 manzanes, y que taba urbanizada y tenía hasta ilesia y escuela. Dieciseis persones compraron finques, y cuando llegaron al sitiu, meses dempués, vieron que los estafaran. Dalgunos, desanimaos, marcharon, pero otros quedaron y punxéron-y al asentamientu, n'alcordanza de la so ciudá natal, el nome de Lansing.

L'asentamientu siguió siendo un puebliquín, con menos de venti habitantes, hasta que nel iviernu de 1847 la constitución estatal de Michigan obligó a que la capital se quitara de Detroit y se punxera nun llugar más centricu y fácil de defender nel interior del estáu. Y ello porque Detroit taba mui averáu a Canadá, que yera de los ingleses, y yá fora conquistáu por ellos na guerra ente Reinu Xuníu y Estaos Xuníos de 1812. Foi recuperáu al añu siguiente, pero la so situación, peraverada a la frontera, y tamién el mieu a que'l so gran tamañu determinara enforma la política estatal, ficieron que se buscara otra capital. La llucha foi dura, y delles ciudaes como Ann Arbor, Marshall y Jackson llucharon fuertemente pa ser la capital^[2]. La falta d'alcuerdu fizo que se pensara nel pequeñu asentamientu de Lansing, lo que foi la risión de dellos de los diputaos que participaben na eleición. Sicasí, dos meses dempués el gobernador William L. Greenly firmó'l decretu pol que Lansing convertíase na capital estatal.

En unos pocos meses entamaron a desarrollase na zona, a la vera'l ríu, trés asentamientos independientes que, magar que demientres unos meses foron nomaos en conxuntu Michigan, quedaron, dende finales de 1848, col nome definitivu de Lansing. Nes décades vinientes, col establecimientu de los órganos alministrativos estatales y la xuntura de la ciudá a les redes de carreteres y ferrocarril, la so población espoxigó enforma. Nostante, el verdaderu crecimientu de la ciudá llegó nel sieglu XX de la mano la industria l'automóvil. N'agostu de 1897 fundóse na ciudá la Olds Motor Vehicle Company. Dempués de dellos problemes el so fundador, Ransom E. Olds, refundola en 1905 col nome de REO Motor Car Company, que tuvo faciendo coches na ciudá hasta 1975. De la mano d'ella Lansing convirtióse nún de los principales centros de la industria del automóvil (coches y componentes). Anguaño la so actividá ta mas diversificada, y estiéndese per campos como'l de la educación, el de la salú o el de la industria los seguros; amás ye, como dixéramos anantes, el centru alministrativu del estáu.

Estructura urbana

El downtown de la ciudá ye, tradicionalmente, el llugar ú s'asitien los edificios gubernamentales, ente los que rescampla'l capitoliu estatal. Por embargu, nos caberos años la zona ta adquiriendo un calter comercial y residencial. Amás, nelli ta ún de los mercaos tradicionales más antiguos de los Estaos Xuníos^[3] . Ríu arriba, al norte del downtown, ta'l distritu conocíu como Old Town, que concentra bien d'edificios con interés arquiteutónicu dataos a mediaos del sieglu XIX. Pela so banda, al sur del downtown atopamos el distritu nomáu REO Town, que, como yá se dixo anantes, foi'l llugar onde s'asentó una de les primeres industries automovilístiques del país.

La ciudá ta dividida en cuatro zones (Eastside, Westside, Northwestside y Southside), caúna con dellos barrios. El Eastside, allugáu al este del ríu Grande y al norte del ríu Red Cedar (afluente del anterior) ye la que tien un mayor amiestu racial. El Westside, pela so banda, ta llendáu poles revueltes que fai'l ríu de la que pasa pela ciudá, y ye la zona más variada dende'l puntu de vista socioeconómicu. Delles vegaes inclúise'l downtown dientro d'elli, mentantu que otres vegaes considérase esti como un distritu aparte. Quitando esti, el distritu ta formáu por un garapiellu d'urbanizaciones que graviten alredor del área comercial de la cai Saginaw. El Northwestside, asitiáu al norte del ríu, tien como llendes septentrional y occidental el límite de la ciudá, y ye'l más pequeñu de los distritos. Inclúi delles árees suburbanes y, inclusive, rurales, y tamién zones industriales. Ye nelli, tamién, u ta'l aeropuertu de la ciudá, nomáu Capital Region International Airport. Por últimu, el Southside, asitiáu al sur de los dos ríos y de l'autopista I-496, ye la más estensa y habitada de les zones nes que se divide la ciudá. Ye una zona suburbana, con bien d'urbanizaciones y dellos enclaves comerciales na cai Cedar, el bulevar de Martin Luther King, l'avenida de Pennsylvania o la carretera de Waverly. Pese a la so estensión y población, los vecinos protesten de que ye la más desatendida pol gobiernu de la ciudá, que concentró los sos esfuercios nes caberes décades na revitalización del nucleu históricu de la ciudá.

Referencies

↑ Afirmao en: Getty Thesaurus of Geographic Names. Identificador TGN: 2052433. Data de consulta: 22 agostu 2023. Editorial: Getty Research Institute. Llingua de la obra o nome: inglés. Autor: Getty Research Institute.
↑ Samuel W. Durant (1880) History of Ingham and Eaton Counties, Michigan, Philadelphia: D.W. Ensign, p.72–73.
↑ Lansing City Market

Enllaces esternos

(n'inglés) Páxina web oficial de la ciudá Archiváu 2011-09-24 en Wayback Machine
(n'inglés) Páxina web del Greater Lansing Convention & Visitors Bureau

[214a79a94d9e18bc97772bae2c0ee3b4bec62f67-1] Afirmao en: Getty Thesaurus of Geographic Names. Identificador TGN: 2052433. Data de consulta: 22 agostu 2023. Editorial: Getty Research Institute. Llingua de la obra o nome: inglés. Autor: Getty Research Institute.

[2] Samuel W. Durant (1880) History of Ingham and Eaton Counties, Michigan, Philadelphia: D.W. Ensign, p.72–73.

[Lansing_City_Market-3] Lansing City Market

[1]

[2]

[3]