Wong Bali Aga

Suku Bali Aga inggih punika suku asli sané mawit saking Bali. Suku puniki sampun meneng ring Bali sadurung suku pendatang rauh ring Bali. Krama puniki mawit saking krama Austronésia, krama puniki mapupul tur selanturnyané ngawentuk désa. Suku Bali Aga sané ketah ring Bali inggih punika magenah ring Désa Tenganan miwah Désa Trunyan. Suku Bali Aga puniki kantun madasar antuk tradisi miwah awig-awig sané kapolih saking leluhur sasampunnyané. Suku punika taler nganggén dialék sané unik. Ring désa Tenganan, krama irika ngawé tenun ikat sané mawasta Pegeringsingan, tur ring Désa Trunyan kramané irika ngenahang layon ring wetén punya Taru Menyan. Budaya miwah tradisi adat sané unik punika mawinan para wisatawan lokal miwah duranegara seneng malancaran ka désané punika. Wénten taler wisatawan sané ngalaksanayang penelitian irika, antuk ngrereh indik budaya sané wénten irika.