Kemuning

Don kemuning

Bunga Murraya Peniculata, utawi Kamini, ring Bana Bithan, Kolkata, West Bengal, India.

Kemuning, kemoning, utawi kajeni (Latin: Murraya Peniculata) inggih punika silih tunggil soroh pepayonan. Ketahnyané, kemuning puniki prasida tumbuh saking tiga kantos pitung meter.

Kemuning madué punya sané marupa kayu maririgan, macanggah tunggil, miwah mawari coklat. Inggian daunnyané tumbuh ngrumpyuk turmaning mawilangan lima kantos pitung daun, kahanannyané belig, wentuknyané corong, bongkol miwah tutuknyané tajep, tepinnyané rata, tulang daunnyané nyringsing, turmaning mawarni gadang. Sekar kemuning tumbuhnyané ngrumpyuk, widang sekarnyané mawit saking kalih kantos kalih tengah miliméter, madué benang sari sané mawentuk sakadi jaum, mawarni petak, madué putik asiki sané warninnyané taler petak, lepihan sekarnyané kirang langkung prasida tumbuh saking nemnem kantos pitulikur milimeter, miwah lumbangnyané kirang-langkung patpat kantos dasa miliméter turmaning taler mawarni petak. Salanturnyané, buah kemuning mawasta buni utawi jorong sané widangnyané kirang langkung siki centimeter, yéning kantun nguda mawarni gadang, risampuné tasak buahnyané mawarni barak tua. Inggian wiji kemuning wentuknyané alit miwah mawarni petak. Kemuning puniki madué akah tunggang turmaning madué warni masawang petak.

Pamekasnyané, kemuning madué kahanan rasa sané pedes, pait, anget, turmaning prasida kaanggén tamba ring sajeroning pinungkan rematik,tiroid, makamiwah prasida taler kaanggén ngalusang kulit.