Lungau

Der Artikl is im Dialekt Lungaurisch gschriem worn.

Lungau / Bezirk Tamsweg


Basisdatn
Bundesland:	Soizburg
Vawoitungssitz:	Tamsweg
Flächn:	1.019,65 km²
Eihwohna:	20.437 (1. Jänner 2023)
Bevöikarungsdichtn:	20 Eiw./km²
Kfz-Kennzeichn:	`TA`
Webseitn:	BH Tamsweg

Da politische Bezirk Tamsweg (Standarddeitsch: Bezirk Tamsweg/Lungau) is deckungsgleich mi'm Lungau, oan vo d' fümbf Gai vom Soizburga Lond und grenzt im Westn an an Pongau, im Ostn an d' Staiermork und im Siidn an Kärntn. Da Lungau is a tausnd Quadratkilometer groassas Hochplatoo im Siidostn vom Bundeslond Soizburg, des ringsumadum vo hoache Gebirgszüg begrenzt wercht.

Vo Soizburg her is da Lungau iwan Rodstäder Tauernposs oder durch 'n Tauerntunnöi (A 10 - Tauernautoboo) oder mid an kloan Umweg iwa de Staiermork, im Summer iwan Söikposs und gonzjarig iwan Triamner Tauern, daraichbor. Vo Kärntn her is da Bezirk iwan Katschberg, an Katschbergtunnöi oder des Bundschuachtoi zan daraichn. Vo da Staiamork aus is da Lungau iwa de Murtoibundesstrossn, de Krakauewane oder mid da Murtoiboo zan daglonga.

Mid za. 1,3 Millionen Iwanochtigungen pro Joar is da Lungau a gonz a beliabts Urlaubszüi.

Gschicht

Seid 'm 2. Joahrhundat v. Kr. zöihd da Lungau za Norikum, am köitischn Kinegreich. 15 v. Kr. is da Lungau vo d' Rema bsetzt wong. 50 n. Kr. is a za na remischn Prowinz wong. Vom 8. bis zan friahran 14. Joahrhundat is da Lungau unta boarischa Herrschoft gstondn. Vo 1328 bis zan Joahr 1803 hod donn d' Herrschoft vo d' Soizburga Fürsterzbischef dauat. Nochdem des Gebiet kurchze Zeid wieda unta boarischa Vawoitung gstondn is, is a 1816 midsomt Soizburg za Owaestareich kemma. Mid da Entstehung vo am oagna Kronlond Soizburg 1848, is d' Aussagob va na Londesvafossung, de aa d' Neireglung vo da Londesvawoitung und d' Eifiahrung vo da Gmoavaordung mid sich brocht hod, kemma. 1880 is da Lungau ois „ärmste“ Region vom Lond Soizburg bezeichnet wong. Grund dafir is sei Obgschlossnheit gween. Erscht durch 'n Bau vo da Tauanautoboh (1974 - 1976) hod si de Wirschoft vom Lungau wieda entwickit.

Da Samson

Da Lungau is bekonnt fir seine Samsonumzüg. As eascht Moi noch da Fronleichnomsprozession und danoch no an etla Moi bis zan Septemba eine, wercht in zean Erchta vom Lungau und in zwoa Erchta va da ogrenzadn Staiamork, de seggs Meta hoache Samsonfigur, in da Höiftn va de Erchta begleitt vo zwoa Zwergla, durch 'n Orcht trong. Da Hoachpunkt va de Samsonumzüg san de vo am Samsonwoiza begleitetn Eahrntänz.