Afrikaans: Uitsig op 'n imposante klein sterrestelsel genaamd NGC 4526, met opvallend donker stofbane wat gehul is in die stralekrans van 'n alomverspreide sterregloed. Hierdie beeld wat deur NASA/ESA se Hubble-ruimteteleskoop verkry is, toon een van die helderste lensvormige sterrestelsels, 'n kategorie iewers tussen spirale en elliptiese stelsels. Alhoewel hierdie sterrebeeld 'n gevoel van kalmte mag inboesem, is dit allesbehalwe. Dit het twee onlangse supernova-uitbarstings opgelewer, een in 1969 en 'n ander in 1994. Dis benewens bekend om die kolossale supermassiewe swartkolk in die spilpunt met 'n massa van 450 miljoen sonne. NGC 4526 behoort tot die Virgo-sterrestelselgroep, en grondgebaseerde waarnemings het aan die lig gebring dat 'n kwart daarvan skynbaar vinnigroterende gasskywe om hul spilpunte het. Die skouspelagtigste hiervan is juis NGC 4526, waarvan die draaiskyf van gas, stof en sterre tot op 'n unieke afstand van die spilpunt af uitdy, naamlik tot sowat 7% van die hele sterrestelselradius. Elemente van hierdie skyf beweeg ongelooflik vinnig, naamlik teen meer as 250 kilometer per sekonde. In die eerste aanwending van sodanige tegniek is die dinamika van hierdie snelle werwelstroom tewens aangewend vir die massabepaling van NGC 4526 se sentrale swartkolk. Hierdie beeld is verkry deur Hubble se Wyeveld Planetêre Kamera 2, en 'n weergawe daarvan is deur 'n deelnemer aan Hubble's Hidden Treasures, Judy Schmidt, vir die beeldverwerking-kompetisie ingeskryf. Dit was 'n inisiatief om liefhebbers van sterrekunde te betrek by die Hubble-argief, waardeur blootstelling verleen word aan pragtige beelde wat dusver nog nie deur die breër publiek besigtig kon word nie.