Gato

Para outras páxinas con títulos homónimos véxase: Gato (homónimos).

Gato
Estado de conservación
Domesticado
Clasificación científica
Reino: Animalia Filo: Chordata Clase: Mammalia Orde: Carnivora Familia: Felidae Xénero: Felis (xénero)
Nome científico
Felis silvestris catus Felis silvestris domesticus
Coñeza toda a Bioloxía en Wikispecies, o directorio dos seres vivos

O gato (Felis silvestris catus) é un mamífero doméstico da familia dos felinos, con unllas retráctiles, carnívoro, de pelaxe espesa e suave. Crese que o gato salvaxe africano (Felis silvestris lybica) é o seu ancestro máis inmediato.

Características

O gato doméstico (Felis silvestris domesticus) oscila normalmente entre os 3 e os 8 kg de peso. Algúns gatos, coma os da raza ragdoll, poden pesar máis de 8 kg. Os gatos domésticos viven uns 15 anos se reciben bos coidados. Non obstante, o gato máis lonxevo documentado viviu 34 anos. Na rúa, suxeitos a presións pola comida, o territorio e as enfermidades, os gatos non acostuman vivir máis de dous anos.

Os gatos teñen unha gran variedade de pelaxes e cores, aínda que a grandes trazos adoita facerse a distinción entre razas de pelaxe longa e de pelaxe curta. Como curiosidade, a raza sphinx non ten pelo. A meirande parte de gatos no mundo (99%) son de raza mixta, e o 1% restante son de raza pura ^{[Cómpre referencia]}. Algúns destes últimos participan nas innumerábeis exposicións de gatos que se realizan en diversos lugares.

O rabo serve para manter o equilibrio, e pode variar moito en tamaño. Nos gatos da raza manx é inexistente. Os seus dentes e poutas están adaptados ao seu estilo de vida carnívoro.

As femias están preñadas 55 días e paren entre 2 e 6 crías, ás que dan de mamar entre 3 e 4 semanas. Os gatiños nacen cos ollos pechados, e así permanecen os primeros días de vida.

Conforme ao seu tamaño, os gatos ben poden ser o mellor dos depredadores cunha taxa de éxito que rolda o 90%. O gato ten unha arquitectura corporal que lle dá enorme flexibilidade, resistencia e forza. Pode cazar e comer máis de cen especies distintas, e utiliza as técnicas de depredación dos demais felinos: axexar con paciencia, turrar con rapidez e propinar unha trabada certeira á caluga da presa que lle crebe a medula espiñal ou a asfixie.

Galería de imaxes de gatos

• 
  Gato en Barraña, Boiro
• 
  Gato en Mandaio, Oza dos Ríos
• 
  Gato en Mandaio, Oza dos Ríos
• 
  Gato en Cuntis
• Gato en Cuntis
  Gato en Cuntis
• 
  Gato en Mandaio, Oza dos Ríos
• 
  Gato en Barraña, Boiro
• 
  Gato en Malpica