Kasuri Tuladan Kain, Kacupak Tuladan Batuang

Falsafah Pakaian Pangulu

Untua Dipakai Hiduik Banagari
Oleh
Musra Dahrizal Katik Jo Mangkuto

Sakapua Siriah
Kaganti siriah nan sakapua - umpamo rokok nan sabatang - tacinto bajawek
tangan - jo diri dunsanak nan basamo - kok untuang pambari Allah - kasuri tuladan kain -
kacupak taladan batuang - tulisan nan ambo buekko - sabab ba alah dek baitu - aluran
badan diri ambo - tantangan tulih manulih - aka singkek pandapek kurang - ilimu di tuhan
tasimpan nyo - tapi samantangpun baitu - bapalun paham nan haluih - dek ujuik
manantang bana - jan kalah sabalun parang - dipabulek hati nurani - untuang tasarah
bagian - walau ka angok angok ikan - bogo ka nyawo nyawo patuang - patah kapak
batungkek paruah - namun nan niaik dalam hati - mungkasuik tatap basampaian - di cubo
juo bagulambek - hanyo harapan dari ambo - kapado dunsanak bakuliliang - kok basuo
kalimaik nan ndak jaleh - titiak jo koma nan salah latak - usah dicacek langkah sumbang -
sabab baitu kato ambo - dalam diri ambolah yakin - sadonyo dunsanak nan datangko -
tantu bakandak tabu nan manih - kok tabu tibarau tasuo - itu nan ado diambo - pado
manjadi upek puji - jan jatuah dihimpok janjang - nak jan mambarek ka akiraik - ambo
nak mintak di ma’afkan.

Barieh balabeh minangkabau - sanitiak tiado hilang - sabarih bapantang lipua -

nan salilik gunuang Marapi - sa edaran Sago jo Singgalang - salingka Talang jo Kurinci -
sampai kalauik nan sabideh - warih nan samo kito jawek - kato pusako nan diganggam -
ka ateh ta ambun jantan - kabawah ta kasik bulan - niniak moyang punyo hulayaik - hak
nyato bapunyo - ganggam nyato ba untuak - salaruik salamo nangko - namo nyo kito
urang minang - dek ketek kurang pangana - lah gadang aka pailang - jalanlah dialiah
urang lalu - cupak dipapek rang panggaleh - dek elok kilek loyang datang - intan
tasangko kilek kaco - disangko bulek daun nipah - kiro nyo picak ba pasagi - diliek lipek
ndak barubah - dikambang tabuak tiok ragi - pado wakatu iko kini - lalok sakalok ba
rasian - pikia nan palito hati - nanang nan baribu aka - dalam tanang bana mandatang -
paham tibo aka baranti - bana lah timbua sandiri nyo - asah kamudi disamoan - jikok
padoman dibatua an - samo mancinto ka nan baiak - kok indak tajajak tanah tapi - indak
kudaraik dari kito - hanyo kuaso dari tuhan - sasek suruik talangkah kumbali - pulang nyo
ka balabeh juo - baitu adaik nan bapakai - kok sasek diujuang jalan - ba baliak ka pangka
jalan - kito pilin aka nan tigo - suatu nan jahia janyo aka - kaduo mustahia janyo aka -
katigo nan wajib janyo aka - baiyo iyo jo adi - ba tido tido jo kako - barundiang jo niniak
mamak - sarato nan tuo cadiak pandai - langkok jo imam jo tuangku - nan mudo arih
budiman -bundo kanduang samo di dalam - asah lai duduak jo mupakaik - nak dapek
bulek nan sagoloang - nak buliah picak nan salayang - saukua kito nan basamo - kito
babaliak ba nagari.

Melah nyo barih dek pangulu

Nan mudo utang mamakai
Kok lah janiah aia di ulu
Tando muaro kasalasai

Manuruik pitua minangkabau - kalau rang mudo tanah minang - tantu sajo tabagi
duo - nan partamo namo nyo anak bujang - nan kaduo namo nyo anak gadih - kalau di
gabuang kaduonyo - jo caro bahaso ibu - sabutan nyo uda jo uni - surang bujang nan
surang gadih - imbauan sarupo itu - bapakai sajak lahia kadunia - sampai kapado nyo lah
kawin - kutiko lubuak alah bapancang - nan padang alah barajok - nan bujang lai pai ka
rumah urang - nan gadih lah naiak rang sumando - kalau nan sipaik anak bujang - paliang
indak tabagi tigo - partamo bujang Parisau - nan kaduo bujang Pangusau - nan katigo
bujang Pusako - buliah dipiliah salah satu - bujang nan ma kakito pakai. Kalau nan
untuak anak gadih - buliah dibagi tigo pulo - nan partamo gadih Alang alang - nan kaduo
gadih Bungo malua - nan katigo gadih Bungo cangkeh - kok dicaliak mamangan
minangkabau - nan tapakai di anak gadih - mancaliak batihnyo sajo lai sulik - apo lai
mancaliak muko - kok diambiak arati kato - gadih pusako tanah minang - tasimpan di
kasah rumin - nan diam di ateh anjuang - umpamo padi ranik jintan - nan tumbuah
dilereang bukik - sacotok usah dek ayam - satangkai usah dek pipik - pandai manjaik
manarawang - kok tanun nan inyo kacak - sarik lah kain tabangkalai - kok dicaliak masak
kamasak - lah cukuik sadonyo ragam gulai - jokok dicaliak salampih lai - di zaman maso
saisuak - niniak mamak mambuek rumah - asah banamo rumah gadang - labiah banyak
marusuak jalan - kok indak mambalakang bana - ka jalan gadang nan lah ado - indak
sarupo maso kini - dicaliak urang mambuek rumah - basasak an katapi jalan - dek sabab
karano itu. Dicaliak ma’ana kato - dirunuik kato nan tadi - anak gadih di minangkabau -
indak buliah manjadi cover - samisa iyasan sampul majalah - nan banyak kito caliak kini
- sabab ba alah dek baitu - padusi di minang kabau - nan di imbau jo bundokanduang -
bamulia an sapanjang adaik - lah rintang duduak jo sukatan - dek sabutan untuak baliau -
ambun puro ganggaman kunci - kok harato lah tibo ateh rumah - padi lah naiak kateh
lumbuang - kunci baliau nan mamacik - pasak baliau nan mangungkuang - pandai
mambagi samo banyak - bijak manimbang samo barek - mahia maukua samo panjang -
walau dicaliak maso kini - dek laku satangah niniak mamak - bakato kareh tiok hari - ma
hariak ma antam tanah - batampuak buliah nyo jinjiang - batali buliah nyo irik - buliah
nyo itam nyo putiahan - bulek sagolek kato inyo - dek sabab karano itu - lah banyak
sawah nan tagadai - baiak tasando jo tajua - lah tandeh sawah jo ladang - gurun caia
taruko tandeh - itu pulo pangka bala nyo - lah banyak padusi nan marasai - langkah lah
banyak nan takabek - nan indak untuak nan nyo tariak - nan indak baban nan inyo pikua -
lah pai manjawek upah - baiak manumbuak jamua urang - atau pai basiang parak - ado
nan pai batanam - komah lah samo kito caliak - dek harato lah licin tandeh - kutiko badan
lah gaek - pai ma unyi panti jompo - anak indaklo ma acuahan - kok lai juo bapusako -
tantu indak co itu bana.

Sabuah lai nan takana - ka uda jo uni maso kini - falsafah pakaian lah nyo tuka -
nan lai manuruik adaik - falsafah pakaian minangkabau - pakaian palampok tubuah -
pakaian pandindiang tubuah - pakaian panutuik malu - pakaian panutuik auraik - kok
pakaian palampok tubuah - tantu lah bisa kito caliak - apobilo barang nan dilampok -
jaleh ndak bisa kito caliak - dari subaliak nan malampok - kok pakaian pandindiang
tubuah - tantu sajo baitu pulo - barang nan kito dindiang - lah jaleh indak kanampak - dari
baliak nan mandindiang - kok pakaian panutuik malu - nan kamambuek kito malu -
paralu ditutuik rancak rancak - agak saketek buliah mewah - nak tatutuik malu dari kaum
- indak kamungkin do raso nyo - kalau kito pai baralek - jo pakaian nan alah cabiak -
kaum kito sato dapek malu - tapi kini dek uni jo uda - guno pakaian pambungkuih tubuah
- lah bisa kito bayangan - kalau barang nan kito bungkuih - lah jaleh samo bantuak nyo -
jo bantuak bungkuih nan dilua - kok dapek uni jo uda - nan ado diranah minang - ijan
tabao rendoang pulo - nan sasuai jo bunyi pantun.
Barakik rakik ka hulu
Baranang ranang katapian
Basakik sakik daulu
Basanang sanang kamudian

Elok nagari dek pangulu

Rancak nyo kampuang dek nan tuo
Elok musajik dek tuanku
Rancak tapian dek nan mudo

Falsafah Pakaian Pangulu Dalam Pantun Adaik

Saluak :

Takanak saluak palangai

Bayangan isi dalam kulik
Panjang ndak dapek kito ukua
-- Nan sipaik baliau cadiak pandai
-- Walau batenggang di nan rumik
-- Bapantang langkah ka talanjua

Leba ndak dapek kito bidai

Tiok karuik aka manjala
Tiok katuak budi marangkak
-- Jadi pangulu kok lai pandai
-- Pandai bacupak di nan data
-- Indak namuah bakisa tagak

Dalam lilik baundang-undang

Salilik lingkaran kaniang
Ikek santuang dikapalo
-- Kalau nyo langkah nan lah sumbang
-- Tando nyo paham lah bapaliang
-- Dunia akiraik kabinaso

Tampuak dek paham tiok lipek

Lebanyo pandindiang kampuang
Panjang pandukuang anak kamanakan
-- Suko pangasiah ka nan ketek
-- Batu ketek acok manaruang
-- Ukua lah langkah ka bajalan

Hamparan rumah nan gadang

Paraok gonjoang nan ampek
Payuang panji marawa basa
-- Kok tumbuah bana basilang
-- Kok datang sudi jo siasek
-- Indak bakisa di nan bana

Tampek bataduah kahujanan

Tampek balinduang kapanasan
Iyo dek anak kamanakan
-- Tibo dimato indak bapiciangan
-- Tibo diparuik indak bakampihan
-- Nan bana samo ditagak-an

Nan sapayuang sapatagak

Dibawah payuang dilingkuang cupak
Manjala masuak nagari
-- Tapijak dibaro hitam tapak
-- Tapijak didarah sirah tapak
-- Warih nan samo dironggohi

Kapa-i tampek batanyo

Kapulang bakeh babarito
Kusuik nan kamanyalasai
-- Walau ba-a coba an tibo
-- Baiman taguah didado
-- Bapantang kusuik ndak salasai

Karuah nan kamanjaniahi

Hukum adia katonyo bana
Sapakaik warih mandiri-an
-- Nak aman koto jo nagari
-- Lahia jo batin jan batuka
-- Indak manampuah rusuak jalan

Baju :

Babaju hitam gadang langan

Langan tasenseang ndak pambangih
Pa apuih miang dalam kampuang
-- Kalau mambimbiang kamanakan
-- Mamahek jan dilua garih
-- Nak jan bacacek dalam kampuang

Pangipeh hangek nak nyo dingin

Siba batanti baliak balah
Baturap jo banang makau
-- Indak bakucak lahia batin
-- Kok tasuo gadang baralah
-- Ukua jo jangko ndak talampau

Basuji jo banang ameh

Panutuik jahik pangka langan
Tando mambuhua ndak mambuku
-- Pangulu kok lai tangkeh
-- Tantu santoso kamanakan
-- Nagari nan indak dapek malu

Langan balilik suok kida

Basisiak makau ka amasan
Gadang basalo jo nan ketek
-- Pangulu paham kok caia
-- Uleh jo buhua kok mangasan
-- Bak kayu lungga pangabek

Tando rang gadang bapangiriang

Tagak ba apuang jo aturan
Ba ukua jangko jo jangkau
-- Tagak pangulu kok bapaliang
-- Unjuak kok indak babarian
-- Pantangan adaik Minangkabau

Unjuak ba agak ba inggoan

Lihia nyo lapeh ndak bakatuak
Babalah sa hinggo dado
-- Indak namuah bapangku tangan
-- Walau kurang dapek ditukuak
-- Taserak dikampuangan nyo

Rang gadang alam nyo leba

Rang cadiak padang nyo lapang
Indak karuah aia dek ikan
-- Indak bakisa di nan bana
-- Walau ba a coba an datang
-- Bapantang guyah sandi iman

Indak rusak gunuang dek kabuik

Paik manih pandai malulua
-- Jan takuik ma elo suruik
-- Kalau nyo langkah lah talanjua

Tagang nyo bajelo-jelo

Kanduanyo badantiang-dantiang
Hati lapang paham saleso
Pasiah lidah pandai barundiang

Sarawa :

Sarawa hitam gadang kaki

Kapanuruik labuah nan luruih
Panampuah jalan nan pasa
-- Nan sipaik pangulu di nagari
-- Malu kok indak katahapuih
-- Tando nyo budi lah tajua

Kadalam koroang jo kampuang

Sampai ka koto jo nagari
Langkah salangkah baliak suruik
-- Tagak pangulu kok nyo tangguang
-- Tando bamain aka budi
-- Bak gunuang dilampok kabuik

Pado pai suruik nan labiah

Langkah salasai baukuran
Ma agak kuku jan tataruang
-- Pakai lah paham tulak raiah
-- Simpai nan taguah diganggaman
-- Itu pitua bundokanduang

Mangko sarawa kain hitam

Paham hakikaik tahan tapo
Manahan sudi jo siasek
-- Buruak baiak pandai mangganggam
-- Ba iman taguah didado
-- Curiang barih dapek diliek

Mananti bandiang kok tibo

Kumuah bapantang kalihatan
-- Tando nyo kapa banankodo
-- Mangko nyo turun kalautan

Walau sagadang bijo bayam

Jadi pantangan salamonyo
-- Saciok bak anak ayam
-- Tandonyo pangulu lah sakato

Sisampiang :

Basisampiang sahinggo lutuik

Kayo jo mikin alamaik nyo
Patuik dalam ndak buliah senteang
-- Malu kok indak katatutuik
-- Ka runtuah adaik jo pusako
-- Lah ilang ereang jo gendeang

Kok senteang ndak buliah dalam

Mungkin jo patuik ka ukuran
Lakeknyo impik kakida
-- Cadiak pandai kok ndak bapaham
-- Budi kok nyampang kalihatan
-- Jadi sampik alam nan leba

Satantang jo ampu kaki

Tandonyo lurih batujuan
Suduik seroang manikam jajak
-- Tando nyo kito lai babudi
-- Kok tumbuah silang jo bantahan
-- Pandai manimbang jo manggamak

Langkah bak cando bapatingkek

Alam satapak bakeh diam
-- Kok bak kayu lungga pangabek
-- Kamanakan ka andam karam

Alun bakilek alah takalam

Bulan disangko tigo puluah
--Alun diliyek lah tapaham
--Lah tantu tampek bakeh tumbuah

Cawek :

Caweknyo suto bajumbaian

Jumbai nan tangah tigo tampok
Kapalilik anak kamanakan
-- Walau bak mano pasakitan
-- Nan buruak samo dipaelok
-- Taserak namuah mangampuangan

Kapangabek sako jo sangsako

Nak kokoh lua jo dalam
Guyahnyo bapantang tangga
-- Paham guyah iman ndak ado
-- Ibaraik bajalan di nan kalam
-- Tando nyo budi lah tajua
Kokohnyo murah diungkai
Kabek sabaliak buhua sentak
-- Jadi pangulu kok ndak pandai
-- Dalam aia jajak lah nampak

Rapek nagari nak ma ungkai

Tibo nan punyo tangga sajo
Rasio buhua dek pangulu
-- Nan bak katidiang rarak bingkai
-- Tangga ciek larak sado nyo
-- Pantangannyo bana dek pangulu

Karih :

Tasisik karih di pinggang

Sisik nyo tanaman tabu
Latak nyo condoang kakida
-- Kalau lah tagak mangupalang
-- Runuik lah kato nan daulu
-- Muluik jo hati jan batuka

Dikesoang mangko dicabuik

Gambonyo tumpuan puntiang
Tunangan ulu kayu kamaik
-- Jan takuik maelo suruik
-- Dalam bulek usah basandiang
-- Bogo kamati dalam niaik

Kokohnyo indak dek ambalau

Guyahnyo bapantang tangga
Tagoknyo murah dicabuik
-- Kalau nan adaik minangkabau
-- Asah bacupak di nan data
-- Malu kasamo kito japuik

Bengkok nan tangah tigo patah

Luruihnyo manahan tiliak
Bantuak dimakan siku-siku
-- Nyampang ratak mambao pacah
-- Batin tasimpan jan tabatiak
-- Runuik lah paham jo ilimu

Raso nan dibawo naiak

Pareso nan dibawo turun
Alua patuik jalan batampuah
-- Batin tasimpan kok tabatiak
-- Alua patuik sinan bahimpun
-- Pasak kungkuang paham nan taguah

Bamato baliak batimba

Sanyawa pulo jo gombanyo
Tajam nan indak mangalupang
-- Kalau barasak dinan bana
-- Suok kida badai manimpo
-- Tando nyo langkah nan lah sumbang

Kok tajam indak maluko-i

Jajak ditikam kanai juo
-- Nan salah samo di ubahi
-- Pulang nyo kabalabeh juo

Alah bakarih samporono

Pakirin rajo majopahik
--Tuah basabab bakarano
--Pandai batenggang di nan rumik

Tarompa :

Takanak tarompa kulik kalaf

Kapananai sangsako nak nyo tagok
Sako nak tatap jo enggeran
-- Bogo manusia basipaik kilaf
-- Nan buruak samo dipaelok
-- Usah manguntiang dilipatan

Kapanuruik labuah nan goloang

Panampuah jalan nan pasa
Sampai ka koto jo nagari
-- Walau didunia toloang manoloang
-- Usah barasak di nan bana
-- Pado tacemo dinagari

Panuruik anak kamanakan

Mancaliak parik nan ta-ampa
Adokoh rando dapek malu
-- Nyampang tatampuah di nan bukan
-- Tando nyo budi lah tajua
-- Babaliak ka kato nan daulu

Kok jauah kamancaliak-caliak

Jikok ampiang manyilau-nyilau
Jikok malam danga-danga an
-- Kok lai mancinto ka nan baiak
-- Indak baniaik nak mangacau
-- Samo mancari ridha tuhan

Bajalan ba aleh tapak

Malenggang babuah tangan
Manuruik adaik jo limbago
-- Bogo kamalah ka di asak
-- Kato bana jadi padoman
-- Baitu adaik nan biaso

Tungkek :

Tungkeknyo dari kayu kamaik

Ujuang tanduak kapalo perak
Kapanupang sako jo sangsako
-- Walau kamati dalam niaik
-- Indak namuah bakisa tagak
-- Itu pakaian salamonyo

Kapanahan sako nak jan rabah

Panueh sangsako nak jan lipua
Sako nak tatap jo enggeran
-- Jiko tapijak di nan salah
-- Tando nyo langkah lah talanjua
-- Bak rumah gadang katirihan

Ingek samantaro balun kanai

Kulimek sabalun habih
-- Walau tatungkuik tagulampai
-- Nan miang samo kito kikih

Malantai sabalun lapuak

Maminteh sabalun hanyuik
-- Kok nyampang bakisa duduak
-- Kato nan bana ka disabuik

Gantang tatagak jo lanjuangnyo

Sumpik tatagak jo isinyo
Adaik tatagak jo limbago
-- Kok nyampang paham basangketo
-- Nak jan tumbuah cacek binaso
-- Cari lah ujuang jo pangka nyo

Adaik nan batalago buek

Cupak nan tarang samato
Taga dek sipaik nan badiri
-- Warih nan samo kito jawek
-- Pusako samo ditarimo
-- Baitu adaik nan usali

Undang Duo Puluah :

Undang undang nan duo puluah

Yaitu tabagi duo
--Mintak didanga sungguah sungguah
--Nak dapek paham ma’ananyo

Duo baleh untuak panuduah

Salapan untuak pancemo
--Hiduik didunia kok ndak sungguah
--Di akiraik antah bak mano

Anggang lalu atah pun jatuah

Pulang pagi babasah basah
--Pangulu kok lai satubuah
--Tantu rakyaik jadi sabingkah

Bajalan bagageh gageh

Bajua bamurah bamurah
--Tungganai nagari kok lai tangkeh
--Gunuang nan tinggi jadi randah

Talacuik tapakuak mati

Talalah takaja pulo
--Nan mudo kok lai barani
--Mungkasuik sampai kasadonyo

Putuih tali ditangah jalan

Batimbang kato dek manjawok
--Alim ulama kok sapaham
--Apo dibuek jadi tagok

Tacancang bariang lah luko

Tabayang batubuah nampak
--Pangulu kok lai sakato
--Manuruik rakyaik nan banyak

Kacondoangan mato rang banyak

Tibo pikek langau tabao
--Parik paga kok lai bijak
--Nagari aman jo santoso
Itulah undang duo baleh
Nak samo kito mamahami
--Pakailah rundiang nan bakieh
--Kito tapuji dinagari

Kok hanyo undang nan salapan

Mari nak samo kito liek
--Nak jan tatampuah di nan bukan
--Salah tampuah buliah di ambek

Dago dagi mambari malu

Sumbang salah laku parangai
--Tapati kato nan daulu
--Mangkonyo kusuik kasalasai

Maliang curi ka liang lantai

Tikam bunuah padang badarah
--Walau tatungkuik tagulampai
--Usah bakisa di nan bana

Sia baka sapotoang suluah

Upeh racun tabang basayok
--Bogo hancua bogo kaluluah
--Nan buruak samo dipaelok

Samun saka tagak dibateh

Umbuak umbi budi marangkak
--Suok kida ombak ma ampeh
--Usah bakisa tampek tagak

Itulah undang nan salapan

Nak samo kito mamahami
--Kunci lah biliak kaimanan
--Nak jan tacemo dinagari

Falsafah Pakaian Bundo Kanduang

Tingkuluak :

Takanak tingkuluak dikapalo

Bantuak lahia bayangan isi
Panjang ndak dapek kito ukua
Leba ndak dapek kito bidai
Tiok lipek akak manjala
Tiok katuak budi marangkak
Gonjoang ateh baliak batimba
Lambang nareco bayang adaik
Adaik nan basandi syarak
Syarak nan basandi kitabullah
Walau kabek buliah dibukak
Nan buhua ndak buliah guyah
Ujuangnyo duo bajumbai
Sajumbai dimuko kaniang
Jadi sumandan dalam kampuang
Sajumbai jatuah kabalakang
Panampin niniak jo mamak
Salilik lingkaran kaniang
Ikek santuang dikapalo
Tampuak dek paham tiok lipek
Lebanyo pandindiang kampuang
Panjang pandukuang anak katurunan
Hamparan rumah nan gadang
Paraok gonjoang nan ampek
Bakeh bataduah kahujanan
Bakeh balinduang kapanasan
Iyo dek anak katurunan
Nan sapayuang sapatagak
Dibawah payuang lingkungan cupak
Manjala masuak nagari
Kapai tampek batanyo
Kapulang tampek babarito
Kusuik nan ka manyalasai
Karuah nan kamanyaniahi
Hukum adia katonyo bana
Sapakaik warih mandiri an

Baju :

Babaju kuruang gadang langan

Pa apuih miang dalam kampuang
Pa ngipeh angek nak nyo dingin
Siba batanti timba baliak
Batabua perak ba ukia
Baturap jo banang ameh
Basuji jo banang makau
Panutuik jahik pangka langan
Tando mambuhua ndak mambuku
Ma uleh indak mangasan
Langan balilik suok kida
Basisiak makau ka amasan
Gadang basalo jo nan ketek
Tandonyo bundo bapangiriang
Tagak ba apuang jo aturan
Ba ukua jangko jo jangkau
Unjuak ba agak bainggokan
Lihianyo lapeh tak bakatuak
Babalah sahinggo dado
Bundo kanduang alamnyo leba
Bundo kanduang padangnyo lapang
Ndak kruah aia dek ikan
Ndak rusak gunung dek kabuik
Pahik manih pandai malulua

Dukuah :

Takanak dukuah dilihia

Dukuah pinyaram bungo inai
Bagalang salingkaran tangan
Ba cincin sa ukuran jari
Tumpuan subang ka talingo
Tumpuan canggai ka kalingkiang
Alua patuik sinan bahimpun
Latakan suatu di tampeknyo
Didalam cupak jo gantang
Ma hawai jan sapanjang tangan
Unjuak ba agak bahinggokan
Kalau malabiahi ancak ancak
Jikok manurangi sio sio

Kokdek :

Bakodek kain balambak

Ba ukia ba mego mego
Ukia basalo pucuak rabuang
Kaluak paku galuang galuangan
Aka cino jangkau jangkau an
Saiak ajik mamacah ragi
Dibawah itiak pulang patang
Basalo jo bada mudiak
Di tangah bungo kiambang
Dalamnyo diateh tumik
Patuik dalam ndak buliah senteang
Kok senteang tak buliah dalam
Mungkin jo patuik ka ukuran
Lakeknyo impik ka kida
Tandonyo luruih batujuan
Suduik seroang manikan jajak
Langkah bak cando bapatingkek
Alam satapak bakeh diam
Mamakai raso jo pareso
Raso nan dibawo naiak
Pareso nan dibawo turun
Alua patuik jalan ditampuah
Bajalan si ganjua lalai
Pado pai suruik nan labiah
Samuik tapijak indak mati
Alu tataruang patah tigo
Tibo di lasuang ramuak rampak
Alun bakilek lah bakalam
Bulan disangko tigo puluah
Alun diliek lah tapaham
Lah tantu tampek tumbuah

Salempang :

Salempang suto bajumbaian

Panjangnyo tangah tigo kaco
Bajumbai perak baukia
Baukia bapucuak rabuang
Basuji jo banang ameh
Baturap jo banang makau
Pucuak paku galuang galuangan
Aka cino jangkau jangkauan
Kapalilik anak kamanakan
Pangabek sako jo pusako
Nak kokoh lua jo dalam
Kabek sabalik buhua sentak
Rapek nagari nak maungkai
Tibo nan punyo tangga sajo

Tarompa :

Takanak tarompa kulik kalaf

Kapananai sako jo sangsako
Kapanuruik labuah nan luruih
Panampuah jalan nan pasa
Baiak ka dalam koroang kampuang
Sampai ka koto jo nagari
Bajalan ba aleh tapak
Malenggang babuah tangan
Malangkah jan salelo kaki
Ma agak kuku jan tataruang
Ingek sabalun kanai
Kulimek sabalun habih
Maminteh sabalun hanyuik
Malantai sabalun lapuak

Padang, Juni 2007.

Maaf alun sudah
Alun dikoreksi.