Markus 16:15-20

Ndang mansohot turgas mamaritahon barita na uli

Sian bonana i sahat tu nuaeng, sian abad parjolo dung hehe Jesus Kristus sian
hamatean sahat tu na naung hundul Ibana di siamun ni Debata Ama i di banua
ginjang jala mian rap dohot hita sahat tu nuaeng marhite TondiNa Tondi Porbadia i,
ditonai Ibana do hita angka siseanNa asa borhat mamaritahon barita na uli sian
sada inganan tu inganan na asing. Ditonai Ibana do hita borhat sian diri ni sada
jolma nang punguan tu hadirian ni jolma nang punguan na asing. Ditonai ganup
hita siseanna di partingkian transportasi darat, laut, udara na so apala denggan,
aman jala hatop situtu dope songon sinuaeng di bahatan portibion on, asa borhat.
Ditonai hita sude di partingkian na so haru denggan jala hatop situtu dope jolma i
berkomunikasi songon sinuaeng on di na naung rade alat-alat komunikasi na
mansai hatop pinamasa ni teknologi informasi internet na mansai hatop, mansai
bidang, dohot meluas di bahat jolma di portibion isara na pinarade ni media sosial
facebook, asa borhat. Ditonai Ibana hita angka siseanNa di partingkian na so
songon i denggan, hatop jala bahat dope masin cetak laho paadongkon buku
Padan Naimbaru na patolhashon taringot tu ngolu nang ulaon ni Jesus dohot angka
siseanna di abad na parjolo sahat tu nuaeng di tongatonga ni era pencetakan na
mansai canggih gabe boi jahaon ni angka houm na marasingasing hatana. Ditonai
hita sian na so adong dope radio nang televisi songon I nang film. 

Ditonai Jesus angka siseanNa laho borhat mamaritahon barita na uli tingki ndang
haru denggan dope parbinotoan ni jolma laho manjagai hahipasonna dohot
pamalumhon parsahitonna sahat tu nuaeng on di na lam timbo parbinotoan ni
jolma laho pamalumhon bahatan sahit na tubu di bagasan dohot na ro sian duru tu
hajomaon, sahit pamatang nang sahit roha. Ditonai Jesus angka siseanNa asa
borhat mamaritahon barita taringot tu Ibana, holongNa dohot lomo ni rohaNa di
partingkian na mamereng sahit masa binahen ni holan angka huaso ni sibolis na so
boi idaon ni simalolong dohot alat-alat pamaresoon medis sahat tu partingkian na
mamereng dohot do angka ideologi na  patutoru arga ni jolma i, isara komunisme,
neokapitalisme na so manghaholongi dongan jolma, dohot materialisme nang
robotisme na manusai dohot so mangargahon ngolu ni jolma i di portibion na
ingkon mangula, ganup. Di sandok partingkian, tu ganup na porsea di Ibana sian
ganup houm do dipasahat Jesus Kristus Sipalua i ulaon mamaritahon barita na uli
taringot tu Ibana.  Jempek hata: Ulaon mamaritahon barita nauli i do ulaon ni
ganup siseanNa di portibion, di tingki na lehet dohot na so lehet pe tahe, maniro
ulaon dohot cara ni Jesus Kristus na so mamaksa, alai paposhon roha ni jolma
manghaporseai Ibana.
Di minggunta on disunggulhon do tu hita ganup na porsea na marsaor di
tongatonga ni punguan na ro sian tonga-tonga ni halak Batak asa manongtong
mamaritahon barita na uli taringot tu Jesus Kristus i nang di tingkion, tarlumobi di
partingkianta nuaeng di na naung sahat hita tu pangantusion na mandok na ganup
do, ndang holan pangula ni huria, na ditonai Jesus asa mamaritahon barita na uli i,
songon angka siseanna na borhat dung manaek Jesus tu banua ginjang (ayat 19-
20). Sadarion ingkon tatangkasi do dirinta manang na angka sisean na borhat
mangoloi Tuhanta i do hita ganup, ganup huria, manang ndang. Tauduti ma molo
nunga angka na mangoloi hita. Muba ma molo ndang angka na naung mangaloi
tonaNa hita saleleng on.

Laho manjou hita tu turgas i, dipangkulingi Jesus Kristus na naung hundul di

siamun ni Debata Ama i do hita asa umboto angka na domu tu ulaon mamaritahon
barita na uli songon na mangihut on.

Ditonai Jesus Kristus asa borhat hita nuaeng mamaritahon barita na uli tu
sandok na tinompa (ayat 15)

"Laho ma hamu tu liat portibion". Atik pe nunga ditonai Jesus angka siseanNa na
sampulu sada i mamaritahon barita nauli tu liat portibion (Gorik: eis ton kosmon
apanta, ida Markus 16: 15, Ulaon Apostel 1:8, Mateus 28: 19), sanga do nasida
borhat holan tu halak Israel di tano Judea. Sanga do nasida  holan marningot hata
ni Jesus andorang so hehe sian hamatean (Mat 10:10), i ma mamaritahon barita na
uli holan tu birubiru ni Israel na mago, sanga do nasida holan paimaimahon angka
bangso ro tu Jerusalem asa tu nasida dibaritahon harita na uli ni Jesus disi. Siala ni i,
gabe ditangkup Jesus ma apostel Paulus na naung mangalele halak Kristen sian
tongatonga ni halak Kristen na marhata Gorik, asa borhat ibana nidonganan ni
angka donganna parbarita na uli tu angka bangso na so Jahudi, mamungka di
angka kota di bagian Timur sahat tu bagian Barat ni Kekaisaran Romawi, i ma kota
Roma (Rom 1: 15) dohot tu Spanyol (Roma 15:24). Sanga do halak Kristen di Jerman
ndang borhat tu Afrika dohot Asia, alai di dekade patoluhon abad pa-19-hon borhat
do nasida, padohot tu tongatonga ni halak Batak di dekade paonomhon. Sanga do
halak Kristen Batak borhat holan tu tongatonga ni halak Batak Mandailing, Toba,
Simalungun, nang Pakpak. Alai borhat do muse nasida tu angka sukusuku terasing
di Sumatera Bagian Selatan. Dipajongjong halak Kristen Batak do sada badan
misina di taon 1899. 
Atik pe nunga songon i sejarah ni Hakristenon Batak, ndang apala hansit ra rohanta
molo ro Jesus Kristus maminsang hita halak Kristen Batak nuaeng siala nunga hira
naeng mintop (manang nunga mintop?) api mamaritahon goar ni Jesus i sian
tongatonganta, manang na dia pe sialana, sian tongatonga ni sundut na umposo
nang na tumua, atik pe mamungka Januari 2016 i nunga tatangiangkon visi ni HKBP
na imbaru na mandok tahasiholi do hita di taon 2066 gabe pasupasu tu portibion.
Di partangiangan ari pensiunna Uluan ni Biro Sending HKBP na naung
manguluhonsa 10 taon, ditonahon Pdt Charles Oloan Rahidin Silaban, STh do di
HKBP Pematangsiantar di ari 31 Maret 2018 i asa tasarihon marsitutu ulaon
mamaritahon barita na uli tu duru ni HKBP on marhite na mandopang manongtong
jala hiras angka ulaon pinahembang ni biro on patauhon hita mamaritahon barita
na uli, unang adong ruas nang parhalado na manghilala be na ulaon kelas dua do
ulaon marbarita na uli tu duru.

Di tingki on, hata 'borhat tu liat portibion' boi do harafiah tajaha, i ma ingkon
patupaonta do ulaon mamaritahon barita na uli tu angka na so umbege goar ni
Jesus Kristus dohot na so pajumpang dohot Ibana di ngoluna nuaeng on, di inganan
na jonok tu hita nang di na dao sian hita, di angka huta na terisolir situtu, manang
di kota-kota besar, na jotjot gabe inganan ni bahatan jolma maringan. Alai boi do
tong i marlapatan so ingkon meret pamatangta, alai boi marhite komunikasi
internet nuaeng. Jala boi do marhite angka ulaonta na denggan di tongatonga na
bangsonta patupahon pamaritaon taringot tu goar ni nasa goar i, Jesus Kristus
Tuhanta i tu angka donganta di duru ni keluarga nang parsaoranta, nang di tonga-
tonga ni parngoluanta siganup ari. Denggan do tangihononta pinsangpinsang ni
Jesus i tu hita nuaeng on. 

Ulaonta na denggan na tapatupa di bagasan goar ni Jesus Kristus i boi do tong gabe
holan tu donganta jolma. Alai ingkon laos boi do nang tu angka donganta na
tinompa ni Debata na asing (Gorik: ktisei) na nuaeng on taboto manang piga nunga
mago boti salelengna siala ni kebutuhan nang hamongkuson ni jolma na so sari di
angka na tinompa na asing. Sada contoh ulaon na denggan do na pinatupa ni
sahalak sintuanta di HKBP Tebet, Jakarta Selatan, i ma St Dr. Jamartin Sihite, anak ni
Pdt Dr. Wilmar Sihite na hinan, na rap dohot angka donganna marusaha paulakhon
angka orang utan na terdesak siala ni usaha perkebunan, asa boi orang utan i
mandopang partubu ni angka suansuanan di hutan. Molo totop orang utan
mangolu dohot marpinompari, boi do hananangkok ni mohop ni portibion
otaponna ndang lobi sian 2 derjat Celsius. Molo lam godang halak Kristen Batak
mamungka sian jabu nasida be dohot marhite na parsidohot aktif manjagai
portibion, nunga taoloi tona ni Jesus tu hita asa mamaritahon barita na uli tu
sandok na tinompaNa di sandok portibion.  Molo ndang boi songon i, pinomat
ndang gabe sisegai portibion hita ruas ni pamatang ni Kristus sian tongatonga ni
halak Batak. 

Asa malua na porsea jala tardidi, ndang taruhum na porsea (ayat 16)

Mansai uli do ia motivasi dohot na tinuju ni panonaion ni Jesus Kristus i tu hita, i ma

asa dipalua (Gorik: sothesetai) na porsea, jala ndang taruhum nuaeng nang muse
(Gorik: kata-kritesetai) na porsea di ari panguhuman i. I do apala impola, na tinuju
ni pangoloionta borhat tu liat portibion mamaritahon barita na uli taringot tu Jesus
Kristus i (diri, ngolu, ajar, ulaon ni Jesus i) songon na pinatorang ni sandok
evangelium Markus i sian bindu sada sahat tu bindu sampulu onom. Unang meret
sian na tatuju i parborhatta. Ndang asa parhuasoon (politis, ekonomis, sosial,
budaya) ni angka sisean ni Jesus portibion ia na tinuju ni ulaon mamaritahon barita
na uli i. Molo adong sanga gabe mangalului huaso ia na tatuju di na mamaritahon
barita nauli i, ba tapauba ma dirinta.  

Ihut tu angka na porsea jala na tardidi i do angka tanda halongangan di ngolu

nasida (ayat 17-18).

Ndang holan asa malua angka na porsea i di ari panguhuman ia na binagabagahon

ni Jesus tu angka siseanna na mamaritahon barita na uli i. Alai dohot do na
mangihut on idaonnasida: "Ihut tu ngolu nang ulaon ni na porsea di Jesus Kristus
na mangolu dohot mangula di bagasan goarNa do angka tanda halongangan na
mangihut on:  
Parjolo, di bagasan goar ni Jesus pabalihon angka tondi na hodar (Gorik:
daimonian, ayat 17) sian tongatonga ni halak dohot masyarakat na niingananna.
Paduahon, mangkatahon angka hata na imbaru (ayat 17). Patoluhon, boi
manaluhon ulok, jala malua sian angka rasun na pamatehon jolma di portibion
(ayat 18). Paopathon, tuk pamalumhom na marsahit marhite na mangampehon
tangan tu na marsahait (ayat 18). 

Boi do hita mangantusi angka bagabaga pinasahat ni Jesus tu ganup na porsea tu

Ibana di portibion di bagasan pangantusion songon na tarsurat i, i ma pabalihon
angka tondi na hodar na marragam i di tingkinta nuaeng, marhata na imbaru,
manaluhon angka na boi pamatehon jolma, isara angka binantang berbisa ulok
nang angka rasun, jala parpudi pamalumhon sahit. Alai laos boi do i taantusi di
pangantusion na mansai maju nuaeng, i ma mangalo angka ideologi na patutoru
dohot pasiaksiak ngolu ni jolma nuaeng on (so marimbar na mansai borat di
Indonesia on, i ma manaluhon penyalahgunaan narkoba), isara ideologi hatop
mamora marhite na manggadis Narkoba. Dohot do tahe mangondihon jolma sian
angka pihak-pihak di duru ni jolma di portibion na naeng pamatehon jolma i,
mangalo angka rasun na mambahen mate jolma (hasesega ni aek, sipanganon,
udara, senjata-senjata kimia dohot angka na mangarsuni na aisng). Nang
mangantusi gejala sahit na somal dohot mambahen ubat na boi pamalumhon sian i
ihut do tu ngolunta. Ndang holan sahit pamatang, alai dohot do angka sahit roha
boi pamalumon ni na porsea di Jesus Kristus i, marhite huaso ni Debata nang
marhite angka ubat medis. Ihut do di ngolu nang ulaon nasida angka tanda, songon
Jesus na mamaritahon barita na uli i digohi tanda halonganan sian bona sahat tu
ujung.
  
Mansai ringkot do i botoon, tiopon, haposan, ulahonon dohot patuduhonon ni
ganup sisean ni Jesus di tingki on, di partingkian ni hajolmaon na lam maju situtu
nuaeng on, i ma na lam mangasahon parbinotoan ni jolma dohot pasidingkon
huaso di duru ni dirina, asa lam hiras roha nasida mamaritahon barita na uli ni
Jesus Kristus i. Asa, mansai bidang, komprehensif do panghorhon ni molo borhat
angka sisean ni Jesus nuaeng on mamaritahon barita na uli. Ndang holan haluaon
sian uhum parpudi dapot ni na porsea jala tardidi dipalumehon tu nasida na
porsea, alai dohot do hatauon nasida manaluhon angka na pasingkorsingkorhon
dohot pamatehon ngolu ni jolma di portibion, dohot do pamalumhon angka sahit,
sude marhitehite goar ni Jesus lehonon ni Jesus tu hita.

Panimpuli

Mansai uli do hape motivasi nang na tinuju ni panuruon ni Jesus tu hita angka
siseanNa nuaeng, i ma asa unang tauhum na porse, alai asa malua na porsea,
gariada asa ihut tu ngolu nang ulaon nasida  angka ulaon na gok halongangan.
Molo ndang diida halak Kristen Batak hataridaan ni i di ngolu nasida saleleng on,
tama do hita manungkun di bagasan rohanta, suraon do i siala ndang borhat hita
mamaritahon barita na uli? Molo ndang diida angka na porsea di Jesus siala ulaonta
mamaritahon barita na uli angka tanda halongangan i di ngolu nasida, suraon do i
ala nang nasida ndang borhat mamaritahon barita na uli asa malua na porsea?