Sarpedon

Thanatos (Mors) et Hypnos (Somnus) corpus Sarpedonis coram Mercurio (Herma) tollunt, quod sexto decimo libro Iliadis narrabatur. Scaena a pictore Euphronio in vaso Attico rubentibus figuris picta. Museum Artium Metropolitanum Novi Eboraci hoc furatum vas anno 1972 fraudulenter emit et damnatum post triginta sex annos (2008) reip. Italianae reddere debuit.

Sarpedon (Graece Σαρπηδών) fuit dux Lyciorum in Bello Troiano. Filius erat Iovis et Laodamiae, quae et ipsa filia Bellerophontis erat. A Patroclo in pugna occisus est, diu dubitante Iove an filium periculo erepturus esset : postquam uxor Hera ei persuasit ut funebribus honoribus potius eum honoraret, luctum manifestum ut faceret sanguine pluere in terram iussit. Mox Apolline rem curante, Mors et Somnus corpus herois proelio et ictibus subtraxere atque in Lyciam transtulerunt, ubi cultu heroico donatus est. Quae scaena in vasibus antiquis saepe pingebatur.

Fontes

• Herodotus, Clio 173
• Hyginus, Fabulae CVI
• Ilias II.876-877, V.471-493 et 626-698 necnon VI.198-9, XII.101 et 290-412, XIV.426, XVI.419-683
• Strabo, Geographica XII.8.5.

Nexus interni

• 2223 Sarpedon