Japan Aerospace Exploration Agency

D'Japan Aerospace Exploration Agency (JAXA) ass déi japanesch Raumfaartagentur. Si ass am Oktober 2003 aus hire Virgängerorganisatiounen NASDA, NAL an ISAS entstanen.

Astronomiemissiounen

Aufgabe vun der ISAS waren astronomesch Missiounen. D'Aufgabe ginn ënner der JAXA weidergefouert. Déi éischt erfollegräich astronomesch Missioun vu Japan war Hakucho (Corsa-B), déi am Joer 1979 gestart gouf. [1] Aktiv Missiounen: Astro-EII (Suzaku), Astro-F (Akari), Solar-C (Hinode) Geplangt Missiounen: MAXI, Astro-G, Astro-H, Sprint-A/Exceed

Röntgenastronomie

No der éischter Astronomiemissioun Hakucho konnt Japan mat den Nofollgemissiounen Tenma, Ginga an Asca 20 Joer laang souzesoen onënnerbrach Röntgenobservatioune maachen. Déi Erfolleger goufen awer duerch de Feelstart vun der Astro-E Missioun am Joer 2000 ënnerbrach. Eréischt am Juli 2005 konnt d'JAXA mat der Astro-E2-Missioun (Suzaku) mat der erfollegräicher Aarbecht weiderfueren.

An der japanescher Röntgenastronomie geet et viru mat MAXI, enger externer Kamera fir eng komplett Himmelsoftaaschtung. MAXI gouf 2009 un d'ISS gehangen. Déi eigentlech Nofollegmissioun fir Suzaku Astro-H soll am Summer 2013 gestart ginn.

Infraroutastronomie

Dat éischt japanescht Weltraumteleskop fir den infraroude Beräich, war am Joer 1995 gestart ginn. Et war eng Missioun vun engem Mount mam IRTS a war en Deel vum SFU-1-Satellit. Den IRTS huet ongeféier siwe Prozent vum Himmel gescannt. Am Februar 2006 huet JAXA schliisslech d'Astro-F-Missioun, mat engem 69-cm-Infraroutteleskop gestart. Een Zil vun der JAXA ass et, de mechanesche Küler sou wäit weider z'entwéckelen, datt een op d'Mathuele vu flëssegem Helium verzichte kann. ^[1]

Sonnenobservatioun

Am September 2006 gouf vu Kagoshima d'Hinode-Missioun (Solar-B) als Nofolleg vum Yohkoh-Satellit (Solar-A) gestart.

Space VLBI

1997 huet d'ISAS mat Halca eng Radioastronomiemissioun fir VLBI-Observatioune gestart. Déi Missioun huet offiziell am Joer 2005 opgehalen. Nofollgerin ass mam Astro-G-Teleskop fir d'Joer 2012 geplangt.

Äerdobservatioun

Eng weider Aufgab vum JAXA ass d'Äerdobservatioun. Dat betrëfft déi direkt Observatioun vun der Äerduewerfläch, besonnesch bei Naturkatastrophen, an d'Observatioun vum Klima.

Déi éischt japanesch Äerdobservatiounssatellite waren MOS-1a (Marine Observation Satellite, och Momo-1a). MOS-1a gouf de 16. Februar 1987 gestart, MOS-1b de 7. Februar 1990). JERS-1 (Japanese Earth Resources Satellite, och Fuyo) ass den 11. Februar 1992 an de Raum geschoss ginn.

Am Februar 2006 hunn d'Japaner den ALOS-Äerdobservatiounsmissioun (Advanced Land Observing Satellit, och Daichi genannt, gestart).

D'JAXA ass Member vun der Internationaler Charta fir Weltraum an Naturkatastrophen.

Aner JAXA-Missiounen

DRTS (Kodama): Data Relay Satellit zanter 2002
EXOS-D (Akebono): Aurora-Observatioun zanter 1989
Geotail: Observatioun vun der Magnetosphär zanter 1992

Interplanetar Missiounen

Déi éischt japanesch Raumsonde ware Sakigake an Suisei, déi 1985 zum Koméit Halley geflu sinn. Déi experimentell Technologiemissioun Hiten (Muses-A) war vun 1990 bis 1993 um Äerdmound aktiv. Fir d'Duerchféierung vun interplanetare Missioune steet der JAXA ee 64-Meter-Teleskop zu Useda zur Verfügung. Weider geplangt interplanetar Missioune sinn d'Venus-Sond Akatsuki an, a Kooperatioun mat der ESA, d'Merkur-Sond BepiColombo.

Hayabusa

Déi am Mee 2003 gestarten Asteroidemissioun Hayabusa (Muses-C) konnt hiert Zil, den Asteroid (25143) Itokawa, am September 2005 erreechen an och wëssenschaftlech ënnersichen. Haaptzil vun der Missioun war, Stëbsdeelercher vun der Uewerfläch ze sammelen an zeréck op d'Äerd ze bréngen. Den 13. Juni 2010 ass den Hayabusa nees an d'Äerdatmosphär agetrueden. D'Kapsel mam Stëbs ass plangméisseg a Südaustralien gelant, an de Stëbs gouf uschléissend ënnersicht an analyséiert.^[2] Am November 2010 gouf d'Resultat vun den Ënnersich bekannt ginn.^[3]

Moundmissioune

Am September 2007 gouf de Moundorbiter Kaguya gestart. Hien huet den Äerdmound bis den 11. Juli 2009 ëmflunn, ass awer wéinst Dreifstoffmangel zum Ofstuerz bruecht ginn.

Kommunikatiounstechnologie

OICETS

Am August 2005 start Japan mat Hëllef vun enger russescher Dnepr-Drorakéit vu Baikonur aus d'Kirari-Testmissioun fir den Opbau vun optesche Linken tëscht Satellitten. De Link mat der ESA-Sond Artemis konnt am Dezember 2005 hiergestallt ginn.^[4]

ETS-VIII a WINDS

D'JAXA huet am Dezember 2006 d'ETS-VIII-Missioun gestart. D'Aufgab vum ETS-VIII ass et, mobil Kommunikatioun mat engem GEO-Satellit z'erméiglechen.

Iwwersiicht vun aktive Missiounen

1989	Akebono	Auroraobservatioun
1992	GEOTAIL	Magnetosphärobservatioun zesumme mat der NASA
2002	Kodama	Kommunikatiounssatellit
2003	Hayabusa	Buedemprouwe vun engem Asteroid
2005	Suzaku	Röntgensatellit zesumme mat der NASA
2005	Reimei	Technologietest an Auroraobservatioun
2005	Kirari	Technologietestssatellit
2006	Daichi	Äerdobservatioun
2006	Akari	Infraroutobservatioun
2006	Hinode	Sonnenobservatioun zesumme mat der NASA an dem BNSC
2006	Kiku 8	Testsatellit fir Kommunikatiounstechnologie, dee schwéierste Satellit vu Japan
2007	Kaguya	Moundorbiter
2010	IKAROS	experimentell Raumsond
2010	Akatsuki	Venus-Orbiter