Jean-Paul Sartre

Jean-Paul Sartre (1905–1980) ia es un dramiste, noveliste e filosofiste political franses. El ia junta la fenomenolojia, la metafisica e la teoria sosial per crea un vide unica, nomida esistentialisme, cual presenta un relata entre la teoria de filosofia e la vive, la leteratur, la psicolojia e la politica.

Naseda en Paris, Sartre ia instrui la filosofia asta la eruta de la Gera Mundal Du en 1939, cuando el ia es clamada per servi militar. En 1940 e 1941 la deutxes ia prisoni el; pos libri, el ia reveni a instrui, e ia es ativa en la resiste franses. Alora Sartre ia fundi e edita la jornal leteratural e political La tempos moderna (franses: Les temps modernes). La plu de sua scrivedas de la desenio de 1950 ia trata problemes leteratural e political.

El ia refusa la premio Nobel per leteratur de 1964, esplicante ce la aseta de un tal premio ta manxa sua onestia como autor.

En sua obra filosofial major, La es e la noncosia (franses: L'etre et le néant) (1943), Sartre ia pensa a umanas como creadas ci construi sua propre mundo par rebela contra autoria e par aseta la encarga personal per sua atas. El ia vide la libria de eleje asoluta como nesesada per la esiste vera umana. Sua novelas e teatrales espresa la crede ce la encarga personal es la libria e la aseta de la valuas xef en la vive.

Plu tarda, Sartre ia discute ce la influe forte de la sosia moderna sur la individua va produi la "seriali" (la perde de la me), cual es solvable sola par ativia revoluinte de grupos.