Pesimisme

Pesimisme es un disposa mental en cual resultas nondesirable es espetada de un situa spesifada. Pesimistes tende foca jeneral sur la negativas de vive. Un demanda comun per proba per pesimisme es "esce la vitro dui vacua o dui plen; un pesimiste vide, suposada, ce lo es vacua, cuando un otimiste vide ce lo es plen. Tra istoria, un disposa pesimiste ia ave efetos sur tota areas major de pensa.

Pesimisme filosofial es la idea relatada cual vide la mundo en un modo clar contra-optimiste. Esta forma de pesimisme no es un disposa emosial, ma un filosofia o vista cual defia direta la idea de progresa e cual pote es videda como un declara de otimisme fundida sur fide e relijio. Sua respondes a esta situa es multe variosa e comun afirmante de vive.

La parola pesimisme deriva de la parola latina pessimus, cual sinifia la plu mal. Lo ia es usada prima par la criticores jesuita de la novela Candide, ou l'Optimisme par Voltaire. Voltaire ia es satiri la filosofia de Leibniz ci ia manteni ce esta ia es "la plu bon (otima) de tota mundos posible". En sua atacas sur Voltaire, la jesuitas de la Revue de Trévoux ia acusa el de pesimisme.

Pesimisme filosofial

Pesimisme filosofial es un vista de la mundo cual atenta fasa la realias nonplasente de la mundo e elimina esperas e espetas nonrasional (como la idea de progresa e fide relijiosa) cual pote resulta en situas nondesirable. Ideas cual previde pesimisme filosofial pote es videda en testos antica como la Dialogo de pesimisme de Acad e Eglesiastes (cual sujeste ce tota es hevel, leteral "vapor o respira, ma pote ance sinifia "sin sinifia" e "asurda)

En la filosofjia de la ueste, pesimisme no es un promove singular o coerente, ma un grupo laxe asosiada de pensores con ideas simil e un semble familial a lunlotra. En sua obra Pessimism: Philosophy, Ethic, Spirit, Joshua Foa Dienstag descrive la proposa major compartida par la plu de pesimistes filosofia como "tempo es un carga, la curso de istoria es en alga modo ironiosa, libria e felisia no es acordable, e la esiste umana es asurda".

Pesimistes filosofial vide la autoconsensa de umanas como liada con sua consensa de tempo e esta condui nos a plu sufri ca mera dole fisical. En cuando la plu de organismes vive en la presente, umanas e alga otra spesies pote contempla la pasada e la futur, e esta es un difere multe importante. Umanas ave previde de sua propre destina e esta "teror" esiste en cada momento de nosa vives como un recorda de la natur nonpermane de vive e de nosa noncapasia per controla esta realia.

La vista de pesimisme filosofial de la efeta de progesa istorial tende es plu negativa ca positiva. La pesimiste no nega ce alga areas como siensa pote "progresa", ma los nega ce esta ia resulta en un boni jeneral de la state umana. En esta modo, on pote dise ce la pesimiste vide istoria como ironiosa; lo pare es deveninte plu bon, ma lo es, en fato, tota no boninte, o an deveninte plu mal. Esta pote es videda bon en la critica de la sosia sivil de la lumina par Rousseau, e sua prefere per umana en la state plu primitiva e natural.

La vista pesimiste de la state umana es ce lo es "asurda". Asurdia es videda como un noncompati ontolojial entre nosa desira per sinifia e completa e nosa noncapasia per trova o susta acel cosas en la mundo, o, como Camus dise lo: "un divorsa entre umana e sua vive, la ator e sua sena". La idea ce pensa razonante ta resulta en la flori de umania pote es trasada a Socrate, e es a la radis de la plu de formas de filosofias otimiste de la ueste. Pesimisme inversa esta idea e culpa la libria per razona como la cualia ce malalinia umania de nosa mundo, e vide lo como la radis de triste umana.

La respondes a esta problem de la state umana par pesimistes es variada. Alga filosofiste, como Schopenhauer e Mainlander, recomenda un forma de renunsia e auto-nega (cual los vide en la relijiones de India e la moncisme cristian). Alga seguores tende crede ce la espeta de la plu mal condui on a la plu bon. Descartes ia crede ce vive ia es plu bon si reatas emosial a avenis "negativa" ia es sutraeda. Karl Robert Eduard von Hartmann ia aserta ce, con progresa cultural e tecnolojial, la mundo e sua abitantes va ateni un state en cual los va aseta volente sua nonesiste. Otras, como Nietzsche, Leopardi, Julius Bahnsen, e Camus ia responde con un vista plu afirmante de vive, cual Nietzsche ia nomi "pesimisme dionisian", un abrasa de vive como lo es en tota de sua cambias e sufri constante, sin un apela a progresa o un calculo edoniste. Albert Camus ia indica ce la respondes comun a la asurdia de vive es comun suiside, un "salta de fide", o reconose/rebela. Camus ia rejeta tota ma la eleje final como respondes nonasetable e nonautentica.

Pesimisme filosofial ia es frecuente liada a la artes e leteratur. Schopenhauer ia es multe popular con composores como Wagner, Brahms, e Mahler. Alga pesimistes ia scrive novelas o poesias, como Camus e Leopardi. Un forma spesial cual ia es asosiada con pesimisme es la usa de aforismes ("dises saja"), como en Leopardi, Nietzsche, e Cioran. Scrivores cual pote es videda como pesimistes inclui Miguel de Cervantes, Lord Byron, Charles Baudelaire, Gottfried Benn, Sadegh Hedayat, Fiodor Dostoievski, Joseph Conrad, Charles Bukowski, Thomas Mann, Louis-Ferdinand Celine, Mihai Eminescu, Friedrich Durrenmatt, Cormac McCarthy, Samuel Beckett, Dino Buzzati, Jorge Luis Borges, H. P. Lovecraft, Michel Houellebecq, Thomas Ligotti, Thomas Bernhard, e Camilo Pessanha.

Filosofistes pesimiste

Hegesia

Como pesimistes plu tarde, Hegesia ia razona ce felisia durante no es posible per ateni, e on pote sola atenta evita dole tan multe como posile. El ia crede ce tota ojetos, avenis, e atas esterna es noncurante per la saja, an mori. Seguente Cicero, Hegesia ia scrive un libro nomida "Mori par fami", cual ia convinse multe persones ce mori ia es plu desirable ca vive. Per esta razona, Ptolemi 2 Filadelfo ia proibi Hegesia de ensenia en Alexandria.

Baltasar Gracian

Schopenhauer ia judi la novela El Criticon par Baltasar Gracian "un acompanior per vive" per "los ci vole flori en la mundo grande". La novela es un alegoria estendeda de la xerca umana per felisia cual es mostrada como futil en esta mundo. La criticor depinta un imaje sombre e ruinada de la state umana, e la mundo como plenida con engana e desilude.

Voltaire

Voltaire ia es la european prima cual ia es nomida un pesimiste, la resulta de sua critica de "An Essay on Man" e de la afirma par Leibniz ce "nos vive en la mundo la plu bon de posibles". La novela Candide es un critica estendeda de otimisme teiste, e sua poesia sur la desastre de Lisbon es spesial pesimiste sur la state umana e la natur de Dio. An si el ia es un deiste, Voltaire ia razona contra la esiste de un Dio personal e compatiosa, par sua interprete de la problem de malia.

Jean-Jacques Rousseau

La temas major de pesimisme filosofial ia es prima presentada par Jean-Jacques Rousseau. Per el, umanas, en sua "bonia natural", ave no sense de autoconsensa en tempo e donce es plu felis ca umanas malida par sosia. Rouseau ia vide la move estra de la state natural como la orijina de nonegalia e la asentia de libria. La cualias saninte de umanas natural, un ama nondestruinte de se mesma e compatia per otras es reponeda gradal par "amour propre", un auto-ama motivada par orgulia e jelosia de otras. Como un resulta de esta, umanas moderne vive sempre esta se mesma, consernada con otras, la futur, e ojetos esterna. Rousseau ance culpa la potia de umanas de imajina "perfetablia", e lingua umana per prende nos a via de nosa state natural par permete ce nos imajina un futur en cual nos difere ce ci nos es aora, e donce causa ce nos vide nos como nonsufisinte, e donce "perfetable".

Rousseau ia vide la evolui de sosia moderne como la repone de egalia par aliena e distinguis de clase suportada par la instituis de potia. En esta modo, la "Contrata Sosial" comensa con la espresa famosa "Umanas es naseda libre, e es sempre en cadenas". An la clases renante no es libre; per Rousseau, los es "sclavos plu grande" car los nesesa plu respeta de otra per rena e donce debe vive constante "estra se mesma".

Giacomo Leopardi

An si min conoseda estra Italia, Giacomo Leopardi ia es multe influente en la sentenio 19, spesial per Schopenhauer e Nietzsche. En la esaias, aforismes, fables, e parabolas oscur comica, vive es frecuente descriveda como un tipo de broma divin o un era. Seguente Leoparde, como un resulta de nosa consensa de tempo e nosa xerca sin fini per veria, la desira umana per felisia pote nunca es sasiada, e joia no pote dura. Leopardi ia dise ce "donce los engana grande se, los ci declara e predica ce la perfeta de umanas es composada de la sabe de la veria, e ce tota sua malfortuna deriva de opinas falsa e nonsabe, e ce la raza umana va es final felis sola cuando tota o la plu de persones comensa sabe la veria, e los ordina e governa sua propre vive sur esta sabia". Plu, Leopardi crede ce, per umanas, lo no es posible per oblida veria e ce "lo es plu fasil per para cualce abitua ante lo de filosofia".

La responde a esta situa par Leopardi es ce on fasa esta realias e atenta vive un vive grande e briliante, e prende riscas e comensa fa taxes nonserta. Esta nonsertia fa ce vive es valuable e interesante, an si lo no libre os de sufri, ma es un abandona de la xasa futil de felisa. El usa la esemplo de Cristoforo Colombo, ci vade a un viaja nonserta e perilosa e como un resulta ia comensa reconose la valua plu completa de vive. Leopardi ance vide la capasia de umanas per rie a sua situa como un cualia lodable cual pote aida nos en trata nosa problemes. Per Leopardi, "el ci ave la coraje per rie es la mestre de la mundo, multe como el ci es preparada per mori".

Arthur Schopenhauer

Artur Schopenhauer ia ave un influe sur pensores e artistes plu tarde com Freud e Wagner. Sua pesimisme veni de sua leva de Vole (la vole per survive e flori) supra razona como la motiva prima per condui e pensa umana. La Vole es la numeno animante ultima e es un labora sin dirije, futil e nonlojical. Schopenhauer ia vide razona como debil e nonsinifiante comparada a Vole. En un metafor, el compara la inteleto umana a un om coxeante ci pote vide, ma ci monta sur la spala de un jigante sieca - la Vole. Desiras umana no pote es sasiada. El indica motivas como fama, side, e seso como la esemplos fundal de la Vole ativa, cual es sempre, par natur, nonsasiante.

Tota sasia, cual es comun nomida felisia, es vera e par esense sempre sola negativa, e nunca positiva. Lo no es un sasia cual veni a nos orijinal e par se mesma, ma lo debe es la sasia de un desira. Car desira, la Vole, es la stae presedente de cada plasir; ma con sasia, la desira e donce la plasir sesa. E donce la sasia pote nunce es plu ca la sasia de un dole, de un desira.

Schopenhauer ia nota ce, cuando sasiada, la sensa de sasia no dura, e nos usa la plu de nosa vives en un state de atenta sin sesa. An momentos de sasia, cuando repeteda sufisinte, sola condui nos a noia, e en esta modo, esiste umana move sempre, "como un pendulo de asi a ala entre dole e noia, e esta du es, en fato, sua composantes ultima". Esta siclo ironial permete ce nos vide ultima la vania inerente a la veria de esiste, e per reconose ce "la intende de nosa esiste es per no es felis".

Plu, la labora de vive biolojial es un gera de tota contra tota, plenida con dole fisical e angusa constante, e no mera desiras nonsasiada. On ave ance la teme de mori sur la orizon, cual fa ce vive umana es plu mal ca los de animales. Razona sola crese nosa sufri par permete ce nos reconose ce la ajenda de biolojia no es alga cosa cual nos ta eleje, si nos ia ta ave la eleje, ma lo es ultima sin defende per preveni nos de servi lo.

Schopenhauer ia vide en contempla artal un evada tempora de la ata de vole. El ia crede ce, par "perde se" en arte, on pote sublima la Vole. Ma el ia crede ce sola un resinia de la labora vana de la vole a vive tra un forma de asteni pote libre se completa de la Vole.

Nota ce Schopenhauer ia usa nunca la terma "pesimisme" per descrive sua filosofia, ma el no ia oposa cuando otras nomi lo pesimisme. Otra termas usada comun per descrive sua pensas ia es "voluntarisme" e "nonrasionalisme", cual el usada ance nunca.

Friedrich Nietzsche

On pote dise ce Nietzsche ia es un pesimiste, an si, no como Schopenhauer (ci el leje zelosa), sua responde a la forma de pesimisme "trajedial" no es resiniada e no autonegante, ma un forma de pesimisme cual afirma vive. Per Nietzsche, es ia es la "pesimisme de la futur", en "pesimisme dionosian". El ia vide trajedia como esposante la natur asustante de esiste umana, liada par cambia constante. En contrasta, el ia vide filosofia socratal como un refuje otimiste de los ci no pote tolera plu la trajedia de vive. Car Socrate ia dise ce sajia pote condui on a felisia, Nietzsche ia vide esta como "parlante en un modo moral, un tipo de coardia... amoral, un rus".

Nietzsche ia es ance critical de la pesimisme de Schopenhauer car, cuando judi la mundo en un modo negativa, lo reorienta a judis moral sur la mundo, e tal resulta en debilia e nihilisme. Sua responde ia es un abrasa total de la natur de la mundo, un "libri grande" par un "pesimisme de fortia" cual "no judi esta state". El ia crede ce la taxe de un filosofiste ia es la usa de sua pesimisme como un martel, prima per ataca la fundas de moralias e credes vea e alora "fabrica per se mesma un dui de alas nova", pd reevalua tota valuas e crea valuas nova. Un cualia sentral de esta pesimisme dionisian ia es "dise si" a la natur cambiante de la mundo, cual demanda ce on abrasa destrui e sufri joiosa, sempre. Pesimisme per Nietzsche es un arte de vive cual es "bon per sua sania" como "un remedia e un aida en la servi de vive cresente e lutante".

Albert Camus

En un article de 1945, Albert Camus ia scrive ce "la idea ce un filosofia pesimiste es nesesada un de descoraji es un idea enfantin". El ia populari la idea de la asurda, un terma clavin en sua esaia famosa La Mito de Sisifo. Como pesimistes presedente, Camus vide la consensa e razona umana como lo cual "pone me en oposa a tota creada". Per el, esta xerca entre un mente razonante cual anela per sinifia, e un mundo "silente" es cual produi la problem la plu importante de filosofia, la "problem de suiside".

Camus ia crede ce umanas comun evade fasa la asurda par l'esquive (evita), un "rus" per los ci vive no per vive mesma, ma per alga idea grande cual va transende lo, refina lo, dona sinifia a lo, e tradi lo". El ia considera suiside e relijio como formas nonauthentica de evita o evade la problem de esiste. Per Camus, la sola eleje bon ia es per aseta rebelin e vive con la asurda, car "on ave no destine cual no pote es vinseda par despeta". La responde a la problem de asurdia es esemplida par la carater mital de Sisifo, ci ia es condenada par la dios per move un roca enorme a la culmina de un colina per eternia. Camus ia imajina ce Sisifo, cuando forsante la roca a alta, e comprendente la futilia de la taxe, ma continua an tal par un modo de rebela: "on debe imajina sisifo como felis".

Otra esemplos de pesimisme

On ave un otra spesie de pensa jeneral asosiada con un vista pesimiste: la pesimisme de critica cultural e la declina de sosia videda en La declina de la ueste, par Oswald Spengler. Spengler ia promove un model sicle de istoria simil a la teorias de Giambattist Vico. Spengler ia crede ce sivilia moderne de la ueste ia es en un eda "invernal" de declina. Esta teoria ia es multe influente en Europa entre la du geras mundal, spesial en Deutxland de Weimar. Simil, la tradisionaliste Julius Evola ia pensa ce la mundo ia es en la Kali Yuga, un eda sombre de declina moral.

Pensores como Oliver James ia corelata progresa economial con nonegalia economial, la stimula de nesesas artifisal, e "affluenza". Anticonsumoristes identifia tendes cresente de consuma vidable e condui egoiste e consensa de apare a otras en cultur moderne. Posmodernistes como Jean Baudrillard ia razona an ce cultur (e donce nosa vives) aora no ave aora un funda en realia.

Pesimisme tecnolojial es la crede ce avansas en siensa e tecnolojia no resulta con un boni de la state umana. Pesimisme tecnolojial ia orijina en la revolui industrial con la promove luddite. La luddites ia culpa la aveni de fabricerias industrial e macinas avansada per la perde de sua empleas e ia comensa destrui los. La promove romantica ia es ance pesimiste a la avansa de tecnolojia e ia anela per tempos plu simple e natural. Poesistes como William Wordsworth e William Blake ia crede ce industri ia es contaminante la puria de natur.

Alga criticores sosial e ecolojistes crede ce globali, suprapopli, e la ativia economial de statos moderne capitaliste supra-stresa la ecuilibra de la ecolojia de la planeta. Los averti ce, si nos no fa cualce cosa per lenti esta, la caldi de la clima mundal va mali, ultima resultante en alga forma de colasa sosial e ecolojial. James Lovelock crede ce la ecolojia de la tera es ja nonreversable danada, e an un cambia nonimajinable en politicas no ta sufisi per salve lo. Seguente Lovelock, la sistem de regula de la clima es inonda par contamina e la tera va pronto salta de sua state corente a un clima dramatosa plu calda. Lovelock culpa cual el nomi "polyanthroponemia" per esta state, cual es cuando "umanas suprapopli asta la ora en cual los fa plu dana ca bon". El dise: "La esiste de sete bilion persones desirante per la comforta de la "mundo prima"... es clar no compatable con la omeostase de clima, ma ance con la cimica, diversia biolojial, e economia de la sistem".

Esta pesimiste no es sola un conserna de filosofiste o profesores. Per esemplo, la ensiclica de Pape Fransisco de 2015 sur cosas ecolojial es plen de aseses pesimiste de la rol de tecnolojia en la mundo moderne. Un de la organizas la plu radical es la antinatalistes, ci demanda ce umania estingui se.

Alga ecolojistes, ativistes antiglobali, e neoluddites probable teni esta tipo de pesimisme sur la efetos de "progresa" moderne. Un forma plu radical es anarco-primitivisme, cual culpa la revolui de cultiva per condui nos a strati sosial, coerse, e aliena. Alga promove desindustri, abandona de tecnolojia moderne, e "resavaji". Un esemplo estrema es la omisidor nomida par jornalistes "la unibomber", Ted Kaczynski. En sua declara de 1995, el clama per atende a la erode de libria par la leva de la sistem moderne de industria e tecnolojia. El comensa como esta:

La revolui industrial e sua resultas ia es un desastre per la raza umana. Los ave creseda multe la espetada longia de vive per nos ci vive en la nasiones "avansada", ma los ia destabli sosia, ia causa ce vive deveni nonsasiante, ia causa ce umanas sufri nondinias, ia condui la mundo a sufri psicolojia multe estendeda (e en la "mundo tre" a sufri fisical ance), e ia forsa dana sever a la mundo natural. La developa continuada de tecnolojia va mali la situa. Lo va causa serta ce umanas va sufri nondinias an plu grande e ce la mundo natural ta sufri plu dana, lo va probable resulta en disturba social plu grande e sufri psicolojial, e lo pote creses sufri fisical an en la nasiones "avansada".

Contra nosa tendes natural, un om mal no debe es noncoreta.