Nederfrankisch

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Nederfrankisch taolgebeed. 't Brussels is ooch 'n Frankische taal; mèt de arcering verwiest me nao 't feit dat al hieël lang, langer es bv in Fraans Vlaandere, ooch Fraans in dis sjtad gekald wert.

Oonder Nederfrankisch versteit me alle Frankische taole en dialekte die te noorde vaan de Benrather Linie ligke. Nao de vesteging vaan de Franke in de zuideleke Nederlen en 't midde vaan 't later Duitsland kós de Aajdhoegduitse expansie häör wèrk doen: zoe woorte de Frankische dialekte verdeild in Hoegfrankische, Middelfrankische en Nederfrankische vörm. 't Nederfrankisch maak daomèt ouch deil oet vaan 't Nederduits.

't Zuud-Nederfrankisch is 'n Nederfranksiche taol, en same mèt 't Braobants-Zuid-Gelders en 't Oosvlaoms behuurt 't tot de soorte Nederfrankisch mèt e relatief zwak Ingweoons substraot, de Maos-Rienlandse groep. Stèrker is 't Ingweoons substraot in 't Wes-Vlaoms, Ziews en Hollands (in oploupende volgorde) en hielemaol in 't Stadsfries. 't Nederlands, dat wèlt zègke de standaardtaol, is ouch dudelek Ingweoonser es 't Limburgs. Ouch 't Afrikaans, gebaseerd op zeventiende-iews Hollands, is 'n Nederfrankische taol.

Neet-Nederfrankische taole gesproke in de Nederlen en eve daoboete zien 't Fries en 't Nedersaksisch. In 't uterste zuidooste vaan Limburg vint me Middelfrankische dialekte, zuug ouch Kirchröadsj en Ripuarisch. Vreuger waor 't ewels gebroekelik ouch 't Limburgs es 'n Middelfrankische taol of 'n Middelfrankisch dialekcontinuüm te zeen. De isoglosse is daan neet de Benrather Linie mer de Uerdinger Linie gecorrigeerd veur de mich-isoglosse dae 't noordelik deil vaan d'n Rienlandse waaier vörmp.