Jakôba zanak' i Zebedeo

Tsy tohanana intsony ny kinova azo atao pirinty ary mety misy lesoka amin'ny famoronana. Azafady mba havaozy ny famantarana ny mpitety tranonkala ary ampiasao ny asan'ny fanontana tsipalotra.

I Jakôba zanak' i Zebedeo na Jakôba zanak' i Zebedio na Jakôba zanak' i Zebede na Jakôba Zokiny dia iray amin' ny mpianatr' i Jesoa roa ambin' ny folo lahy. Jiosy avy any Galilea (na Galilia) izy. Rahalahiny i Joany apôstôly.

Ny anarana

Atao hoe koa Jakôba Zokiny (na Jakôba Lehibe) izy sady rahalahin' i Joany zanak' i Zebedeo. Ἰάκωβος / Iakôbos no fiantsoana azy amin' ny teny grika. יַעֲקֹב‬ /Yaʿqob no fiantsoana azy amin' ny teny hebreo. Izy roa lahy ireo dia antsoina koa hoe Boanergés izay midika hoe "zana-baratra". Tsy afangaro amin' i Jakôba zanak' i Alfeo i Jakôba zanak' i Zebedeo. Tsy nanoratra epistily i Jakôba zanak' i Zebedeo. Tsy izy no nanoratra ny Epistilin' i Jakôba.

I Jakôba zanak' i Zebedeo araka ny Baiboly

I Jakôba zanak' i Zebedio na Jakôba Zokiny dia voaresaka ao amin' ny Evanjely sinôptika (ohatra, ao amin' ny Marka 3.17; Matio 10.2; Lioka 6.14) sy ao amin' ny Asan' ny Apôstôly (Asa 1.13)^[1]. Rahalahin' i Joany apôstôly izy ary izy roa dia samy atao hoe Boanergesy, izay midika hoe "zana-baratra" araka ny Evanjelin' i Marka (Mar. 3.17). Ity evanjely tranainy indrindra ity dia maneho azy roa ho mpanjono tao amin' ny Farihin' i Tiberiada (na Tiberiasy) nefa namela ny sambokeliny mba hanarahany an' i Jesoa, izany dia voatantara koa ao amin' ny Evanjelin' i Matio sy ny an' i Lioka^[1].

Sahala amin' i Petera sy i Andrea, i Jakôba dia isan' ny mpianatra voantson' i Jesoa voalohany, ary iray amin' ny mpianatra akaiky azy indrindra izy. Ny lovantsofina sinôptika dia manao azy amin' izy telo lahy ho ny apôstôly manan-danja indrindra satria izy no nofidin' i Jesoa voalohany, niaraka tamin' i Petera sy i Joany, ho vavolombelon' ny zava-niseho lehibe toy ny nananganan-ko velona ny zanakavavin' ny lehiben' ny sinagôga, ny fiovan-tarehy teny an-tendrombohitra na ny vavak' i Jesoa tao amin' ny Tendrombohitra Ôliva^[1]. Nefa, sahala amin' ny apôstôly sisa rehetra dia namela an' i Jesoa ho voasambotra izy. Voatanisa miaraka amin' ireo mpianatra nitoetra tao amin' ny efitrano ambony i Jakôba tamin' ny nidinan' ny Fanahy Masina (Asa 1.13)^[1]. Taterin' ny Testamenta Vaovao ny nahafatesany tamin' ny nisamborana an' i Petera (Asa 12.2)^[1].

Jereo koa

Apôstôly: Andrea - Bartôlômeo - Filipo - Jakôba zanak' i Alfeo - Jakôba zanak' i Zebedeo - Joany - Joda - Jodasy - Matio - Petera - Simôna Zelôta - Tômasy
Alfeo na Alfe
Zebedeo na Zebedio na Zebede
Jakôba zanak' i Alfeo

Loharano

↑ ^1,0 ^1,1 ^1,2 ^1,3 et ^1,4 André Benoit, « Les personnages de l'Évangile nommés Jacques », in Pierre Geoltrain (dir.), Aux origines du christianisme, Folio/Histoire, 2000 (ISBN 978-2-07-041114-6), p. 246-250.

[:0-1] 1,0 ^1,1 ^1,2 ^1,3 et ^1,4 André Benoit, « Les personnages de l'Évangile nommés Jacques », in Pierre Geoltrain (dir.), Aux origines du christianisme, Folio/Histoire, 2000 (ISBN 978-2-07-041114-6), p. 246-250.

[1]