Transsylvanische Saksen
De Transsylvaniese Saksen (Duuts: Siebenbürger Sachsen; Nedersaksisch: Zeuvenburgen, Hongaars: Szászok) bunt ne etniese groep van Duutsen eursprong dee vanof de 12de eeuwe in Transsylvanië bunt goan wonnen. Et is noa de Hongaarse minderheid de grootste minderheid in Roemenië. De kolonisatie van de Saksen van Transsylvanië begun toon den Hongaarsen könning Géza II (1141-1162) Duutse volken noar zien riek reep um de Hongaarse grenze te verdeadegen.
Noa de Mongoolse invallen van 1241-42 wöddden völle Duutse nederzettingen under den voot elopen en kats af-ebrokken. Noadat de Mongolen vort waren wierden de nederzettingen verstarkt. Et gebeed kreg den name Siebenbürgen (Zevenburgen) noar de zeuven verstarkte steaden:
- Bistritz (Bistriţa, Beszterce)
- Hermannstadt (Sibiu, Nagyszeben)
- Klausenburg (Cluj-Napoca, Kolozsvár)
- Kronstadt (Braşov, Brassó)
- Mediasch (Mediaş, Medgyes)
- Mühlbach (Sebeş, Szászsebes)
- Schässburg (Sighişoara, Segesvár)
De benaming Saksen verwis neet noar den Duutsen deelstoat Saksen van noe, moar is ne ofgeleide van et Latiense Saxones, wat in de middeleeuwn stoond veur verschillende Duutse volken, wat waorschienlik n pars pro toto is, net zoas de Fransen de Duutsers Alemannen nuumt. De Transsylvanies Saksen vormden in de middeleeuwn samen mit de Szeklers en de Hongaarse edelleu de 3 naties van Transsylvanië. Net veur en noa den val van de mure bunt völle Transsylvaniese Saksen noar Duutslaand etrokken.
In Roemenië bunt nog darpen te vinden mit ne Saksiese minderheid. Doar stoat nog (olde) karkskes met Duutse teksten op de mure, zoas in Biertan. In Oost-Moldavië (republiek), in Soroca, steet n kasteel dat deur de Saksen ebouwd is. Dit is et meest oosteleke punt woar de Transsylvaniese Saksen bunt ewest.