Stephano (Maand)

Stephano (ok S/1999 U2 oder Uranus XX) is een vun de lütten buteren Maanden vun den Planeten Uranus.

Opdecken un Naam

De Maand is an’n 18. Juli 1999 vun de Astronomen Brett J. Gladman, Matthew J. Holman, John J. Kavelaars, Jean-Marc Petit un Hans Scholl opdeckt worrn. Toeerst weer he as S/1999 U2 betekend, wat de offizielle Beteken na de Internatschonale Astronoomsche Union (IAU) is. Sien richtigen Naam hett he later eerst kregen.

De Maanden vun’n Uranus hebbt na en Traditschoon all Naams vun Figuren ut de Warken vun William Shakespeare oder Alexander Pope. Stephano is en besopen Dener ut Shakespeares Kummedie The Tempest (dt.: Der Sturm).

Ümloopbahn

De Maand kreist üm Uranus in en middleren Afstand vun 8.002.000 km, woför he ruchweg 676 Daag un 12 Stünnen bruukt. De Bahn is nich nipp un nau kreisrund, man en beten watt länglich mit en Exzentrizität vun 0,2295. Dorbi is se üm 144,103° gegen den Äquater vun’n Uranus kippt, so dat de Maand retrograd, d. h. gegen de Rotatschoon vun den Uranus, lopen deit.

Egenschoppen un Opbo

Mit blots 20 km is de Maand teemlich lütt. He hett, as veele lütte Maanden, en middlere Dicht vun 1,5 g/cm³, wat dorop sluten lett, dat Stephano to’n gröttsten Deel ut Wateries un Silikatsteen tohopensett is. De Bavenflach hett en Albedo vun 0,07 – jüst so as de anneren buteren Maanden. Dat heet, dat 7% vun dat infallend Licht wedder torüch reflekteert warrt. Stephano is dormit en teemlich düsteren Maand.

Maanden vun den Planeten Uranus

Kiek ok na bi: List vun de Uranusmaanden