Zum Inhalt springen

Boris Johnson

Vun Wikipedia
Die Druckversion wird nicht mehr unterstützt und kann Darstellungsfehler aufweisen. Bitte aktualisiere deine Browser-Lesezeichen und verwende stattdessen die Standard-Druckfunktion des Browsers.
Boris Johnson (2019)

Alexander Boris de Pfeffel Johnson (* 19. Juni 1964 in New York City, USA) is en brittschen Publizisten un Politiker vun de Conservative Party, de siet den 24. Juli 2019 Premierminister vun dat Land is. Vun Mai 2015 af an sitt he for den Wahlkreis Uxbridge and South Ruislip in'n Westen vun Greater London in dat brittsche Unnerhuus.[1] Vun den 13. Juni 2016 bit 9. Juli 2018 weer he Butenminister in dat Kabinett May.[2] 1999 bit Dezember 2005 hett he dat konservative Nahrichtenmagazin The Spectator rutgeven. Vun Juni 2001 bit Juni 2008 hett he as Afordenten vun den Wahlkreis Henley in't Unnerhuus seten. Vun Mai 2008 bit Mai 2016 is he Borgermeester vun London ween. Vun Februar 2016 af an weer he Baas vun de Brexit-Kampagne vun de Lüde, de Grootbritannien mit dat Referendum an’n 23. Juni 2016 ut de Europääsche Union rutföhren wollen.[3] Düt Referendum is en Slumpslag ween, vundeswegen is he as een vun de Favoriten for den Platz vun Premierminister David Cameron ankeken wurrn, de na dat Referendum Bott geven harr. Denn hett he avers bekannt maakt, datt he düt Amt nich hebben woll.[4] Johnson is en bannig bekannten Politiker in sien Land un veel Lüde möögt em geern lieden. Man dat gifft ok Masse Lüde, de könnt mit em gor nix anfangen. Bekannt is he ok, vunwegen datt he sik fökener afsunnerlich upföhren deit. Brittsche Boulevardblöer nömmt em faken Bo-Jo.

Leven

Wo he herkamen deit

Boris Johnson is 1964 as dat eerste vun veer Kinner vun Stanley Johnson un siene eerste Fro Charlotte Johnson-Wahl in New York boren wurrn. Vunwegen, datt he in de USA up'e Welt kamen is, is he nich bloß brittschen, man ok US-amerikaanschen Staatsborger (Stand Januar 2015).[5] Sien Vadder hett vun 1979 bit 1984 for de Conservative Party in dat Europääsche Parlament seten. Boris Johnson sien törkschen Groot-Grootvadder Ali Kemal weer dat Osmaansche Riek sien lesten Binnenminister. He harr sik dorachter klemmt, datt Kemal Atatürk achter Trallen keem. Later is he vundeswegen up Befehl vun Nureddin Pascha an'e Siet maakt wurrn. As he dat mitkreeg, is Johnson sien Grootvadder Osman Ali na London utknepen un hett dor den Naam „Wilfred Johnson“ annahmen.[6] Dör siene Groot-Groot-Grootollern Adelheid Pauline Karoline von Rottenburg (1805–1872), butenehliche Dochter vun Prinz Paul von Württemberg, un Karl Maximilian Freeherr von Pfeffel (1811–1890) is he over dat Huus Württemberg wietlöftig verwandt mit Königin Elisabeth II. un Prinz Charles.[7][8]

Utbildung

Johnson besoch de Europääsche School I in Brüssel un weer vun 1977 af an up dat Jungsinternat Eton College in Eton. Achternah hett he en „Gap Year“ in Australien tobrocht– dor hett he Unnerricht in Engelsch un Latiensch up de Geelong Grammar School geven. Dor hannelt sik dat um en Elite-Internat in Victoria bi. Vun 1983 af an studeer Johnson an dat Balliol College in Oxford de Wetenschop vun de klassische Ole Tied. In Eton un ok in Oxford weer he bekannt as en intressanten Minschen. Siene beiden besten Frünnen to düsse Tied weern Spraten ut de Upperklass: Darius Guppy (de later vunwegen Beschieten vun de Versekerung verordeelt wurrn is) un Charles Spencer, de jüngere Broder vun Kroonprinzess Diana. In Oxford weer Johnson Vorsitter vun den Debatteerklub Oxford Union un höör to den Bullingdon Club mit to. Bovendem hett he tosamen mit Guppy dat satiersche Magazin Tributary rutgeven. Johnson, Guppy un Spencer sünd ok na de Tied up de Universität Frünnen bleven.

Sien Loop as Journalisten

As he mit'e Universität dör weer, hett he toeerst en Steed as Trainee bi en Raatgever for Unnernehmen kregen, man dat hett em rein gor nich intresseert un dor hett he de Steed na eene Weken al wedder upgeven. Denn fung he mit en Journalisten-Praktikum bi dat renommeerte Dageblatt The Times an. Vunwegen, datt he dor en Zitat vun sien Patenunkel Colin Lucas, later Viezpräsident vun de Universität Oxford, ummuddelt harr, is he rutsmeten wurrn. Denn hett he for dat middelengelsche Lokalblatt Wolverhampton Express and Star schreven. 1987 is he to'n Daily Telegraph gahn un hett achternah faken den Leitartikel for düt Blatt schreven. Vun 1989 bit 1994 hett he as Korrespondent vun dat Blatt ut Brüssel vertellt, wie dat mit de EU lopen dö. Vun 1994 bit 1999 hett he düt Blatt mit rutgeven un is denn as Baas-Rutgever to dat konservative Wekenblatt The Spectator gahn. Dor harr he 1994 un 95 al af un an polietsche Kommentare for levert. In'n April 1998 is he to'n eersten Mol for en grötter Publikum bekannt wurrn, as he in't Feernsehn bi Have I Got News For You uptreden is. In düsse Sennen is he denn noch een poor Mol to sehn ween. Nu kennden de Lüde em up'e Straten, un he treed ok noch annerwegens in't Feernsehn up, as bi Top Gear un Question Time. An'n 16. Oktober 2004 hett en Leitartikl vun den Spectator en Schandaal utlööst. Grund weern bricht over den Briten Kenneth Bigley. De weer vun Trroristen ut'n Irak as Börgen nahmen un denn an'e Siet maakt wurrn. In den Artikel hett dat Blatt dor nu over klaagt, de Briten weern sentimental, un hett de Inwahners vun Bigley siene Vaderstadt Liverpool vorsmeten, se spelen sik nu, sotoseggen as Begley siene Stellvertreders, sülms as Opper up.[9] Johnson harr den Artikel gor nich schreven, man as Rutgever vun den Spectator hett hett he den Schandaal up sik nahmen. To düsse Tied weer he al ganz vorweg bi de Tories unnerwegens, dor weer siene Partei bange, dat geev polietschen Schaden. Parteibaas Michael Howard stüer Johnson na Liverpool hen, he scholl de Saak dor wedder goot maken. Bi en Live-Sennen vun de BBC hett denn Paul Bigley anweckt. Dat weer de Broder vun den doden Kenneth Bigley. He sä to Johnson: „Se sünd en egozentrischen Idioten un speelt sik up - Seht Se to, datt Se verswinnen doot vun de Lüde“[10][11]

Privatleven

1987 hett Johnson Allegra Mostyn-Owen hieraat'; de Eh is 1993 scheden wurrn. In datsülvige Johr hett he de Afkaatsche Marina Wheeler freet. Mit ehr hett he twee Söhns un twee Döchter.

Sien Loop as Politiker

Vorloop un Wahl to'n Borgermeester vun London 2008

Johnson harr kunnig maakt, unner Umstänn würr he antreden to de Wahl to'n Borgermeester an'n 16. Juli 2007.[12] He hett Bott geven as Liddmaat vun dat Schaddenkabinett, wo he tostännig weer for högere Bildung. Bi en opentliche Vörwahl in de ganze Stadt hett he denn 75 % vun all Stimmen kregen un is an'n 27. September 2007 to'n Kannedaten vun de Konservativen wurrn.[13]

Johnson harr ne'e Busse toseggt, wenn he Borgermeester weern scholl

De Conservative Party hett den Australier Lynton Crosby as Baas for Johnson sien Wahlkamp instellt. Vunwegen, datt Johnson annere Lüde geern up'e Fööt pedden dö, hett de dor for sorgt, datt Johnson nich veel Intervieuws mit Print- un Feernsehmedien geven hett, man datt he over Dag in't Radio un Feernsehn uptreden is, wo bloß man „eenfacke“ Fragen stellt wurrn sünd.[14][15] Crosby hett dor ok for sorgt, datt Johnson nich so veel Jokus vertellen dö un sien Haarsnitt en beten wat eenfacker wurr. So scholl he mehr seriös utsehn. Bi de Wahl an'n 1. Mai 2008 hett Johnson 53 % vun de Stimmn kregen. Dor löös he denn den Inhebber vun de Steed, den Labour-Kannedaten Ken Livingstone, mit af, de noch mol wedder ran woll. Veer Johre later, an'n 3. Mai 2012, is he as Inhebber vun dat Amt mit 51,5 % vun de Stimmen noch mol wedder wählt wurrn, wedder gegen Ken Livingston as starksten Gegenspeler.[16]

Torüch in't Parlament

Johnson harr toeerst afstreden, he weer dor as Borgermeester vun London up ut, wedder in't Unnerhuus to gahn. Man denn hett he an'n 26. August 2014 kunnig maakt, he woll sik to'n Kannedaten vun den sekern Wahlkreis Uxbridge and South Ruislip[17] for de brittschen Unnerhuuswahlen an'n 7. Mai 2015 upstellen laten.[18] An'n 12. September 2014 is he denn ok upstellt wurrn.[19][20] In en Intervieuw mit de BBC hett Premierminister David Cameron an'n 24. März 2015 seggt, Johnson weer een vun de mööglichen Kannedaten as sien Nafolger in't Amt vun den Premierminister (suss hett he noch George Osborne un Theresa May nömmt).[21]

An'n 7. Mai 2015 is Johnson wählt wurrn. In sien Wahlkreis htt he 50,2 % vun de Stimmen kregen, de afgeven wurrn weern.[22]

Johnson vörnweg in’n Brexit-Wahlkamp

Anfang Mai 2016 woll Johnson sik toeerst nich for den Brexit utspreken. De Medien fraagden dormols faken, up wecke Siet he woll stunn. An’n 21. Februar 2016 hett he bekannt maakt, datt he Vote Leave unnerstütten woll. Dat weer en Organisatschoon, de vör dat Referendum en Kampagne for den Brexit bedreven hett[23] Johnson hett sik gau an de Spitz vun de Lüde stellt, de ut de EU rut wollen.[24]

He meen, de EU versöch, en „europääschen Super-Staat“ up’e Been to bringen. „Napoleon, Hitler, allerhand Lüde hefft dat versocht, un dat is böös utgahn. De EU is de Versöök, dat up annere Aart hen to kriegen.“[25] Donald Tusk (Präsident vun’n Europääschen Raat) hett dor gegen seggt, Johnson harr dor „de Grenzen vun en ratschonale Diskusschoon mit achter sik laten un wiest, datt he in’e Politik nix behollen harr“.[26] As fast stunn, wat bi dat Referendum rutkamen weer (51,9 to 48,1 % for den Brexit), hett Cameron kunnig maakt, he woll Bott geven as Premierminister un as Tory-Vörsitter. Johnson is denn as Favoriten for düsse Ämter ankeken wurrn[27], bit he an’n 30. Juni unverwacht bekannt geven hett, datt he sik nich upstellen laten woll.[28][29] As dat achternah denn dor um gung, wer nu Vörsitter bi de Konservativen un Premierminister weern scholl, meen Johnson, dat scholl Andrea Leadsom man maken.[30]

Butenminister

Vun den 13. Juli 2016 af an is Boris Johnson Butenminister in dat Kabinett vun Premierministersche Theresa May.[31] Dat he dor to beropen wurrn is, so korte Tied, nadem he sik de Kannedatur for dat Amt vun'n Premierminister begeven harr, hett allerhand Lüde overrascht un is internatschonal ganz unnerscheedlich upnahmen wurrn. An'n 9. Juli 2018 is Johnson van dat Amt van den Butenminister torüchtreeden, nahdem he in de Regeeren ünner Premierministerin Theresa May sien harten Brexit nich dörsetten kunn.

Premierminister

Siet den 24. Juli 2019 is Boris Johnson Premierminister vun Grootbritannien.

Kiek ok

Belege

  1. ↑ Boris Johnson: Member of Parliament for Uxbridge and South Ruislip Porträt up de Konservativen ehre Websteed
  2. ↑ Boris Johnson ist neuer britischer Außenminister tagesschau.de, 13. Juli 2016
  3. ↑ Mister Brexit faz.net, 5. Juni 2016
  4. ↑ FAZ.net / Jochen Buchsteiner 30. Juni 2016: Die Reißleine vor dem Abflug gezogen
  5. ↑ Who is Boris Johnson? The eccentric blond New Yorker set to rule the UK. In: The Guardian, 25. Juni 2016 (englisch).
  6. ↑ [1]: The Boris Johnson story, rutbrocht vun BBC News, 2008-05-04 (engelsch)
  7. ↑ Ahnenforschung in Augsburg – Londons OB entdeckt berühmte Verwandtschaft
  8. ↑ BBC: Who Do You Think You Are. Boris Johnson – How We Did It. Website im Portal bbc.co.uk, 2013, afropen an'n 18. Juni 2013
  9. ↑ Bigley’s Fate, Leitartikel vun den Spectator vun'n 16. Oktober 2004
  10. ↑ Paul Bigley tells Johnson to quit, BBC News, 20. Oktober 2004
  11. ↑ Boris Johnson: What I should say sorry for, The Spectator, 23. Oktober 2004
  12. ↑ George Jones: Boris Johnson to run for mayor; [2], in: The Daily Telegraph, London, 2007-07-16
  13. ↑ [3]: Johnson is Tory mayor candidate. BBC News 2007-09-27
  14. ↑ [4] The Jeeves to Johnson’s Bertie Wooster: the man who may have got him elected. Vun Glover, Julian, in: The Guardian, 2008-05-02
  15. ↑ [5] The Daily Telegraph: Boris Johnson profile: Shambolic success story, 2008-10-08
  16. ↑ [6] London mayor: Boris Johnson wins second term by tight margin. BBC, 2012-05-04
  17. ↑ kiek ok engelsche Wikipedia
  18. ↑ www.standard.co.uk
  19. ↑ www.theguardian.com
  20. ↑ Christoph Scheuermann: Showtime, in: Der Spiegel, Nummer 18, 2015-04-25
  21. ↑ [7] David Cameron ‘won’t serve third term’ if re-elected, BBC News, 2015-03-24
  22. ↑ [8] BBC: Uxbridge & Ruislip South parliamentary constituency – Election 2015, 2015-05-07
  23. ↑ www.bbc.com
  24. ↑ Londons Bürgermeister Boris Johnson befürwortet EU-Austritt. In: Süddeutsche Zeitung, 21. Februar 2016.
  25. ↑ FAZ.net /Marcus Theurer 5. Juni 2016: Boris Johnson: Mister Brexit, afropen an’n sülvigen Dag
  26. ↑ FAZ.net 17. Mai 2016: Tusk wirft Johnson „politischen Gedächtnisverlust“ vor
  27. ↑ sueddeutsche.de / Christian Zaschke 27. Juni 2016: Boris Johnson hat den Brexit befördert – will ihn aber vielleicht gar nicht
  28. ↑ zeit.de 30. Juni 2016: Boris Johnson kandidiert nicht für Cameron-Nachfolge
  29. ↑ [9] Boris Johnson out of Conservative leadership contest, BBC New, 2016-06-30
  30. ↑ [10]Frankfurter Allgemeine Zeitung: Boris Johnson hat seine Favoritin gefunden, 2016-07-04
  31. ↑ Kabinett von Theresa May – Boris Johnson ist neuer Außenminister focus.de, 13. Juli 2016
Premierministers vun Grootbritannien

Robert Walpole | Earl of Wilmington | Henry Pelham | Thomas Pelham-Holles, 1. Duke of Newcastle-upon-Tyne | Duke of Devonshire | Earl of Bute | George Grenville | Marquess of Rockingham | William Pitt | Duke of Grafton | Lord North | Marquess of Rockingham | Earl of Shelburne | Duke of Portland | William Pitt de Jüngere | Henry Addington | William Pitt de Jüngere | Lord Grenville | Spencer Perceval | Earl of Liverpool | George Canning | Viscount Goderich | Duke of Wellington | Earl Grey | Viscount Melbourne | Duke of Wellington | Sir Robert Peel | Viscount Melbourne | Sir Robert Peel | Lord Russell | Earl of Derby | Earl of Aberdeen | Viscount Palmerston | Earl of Derby | Viscount Palmerston | Earl Russell | Earl of Derby | Benjamin Disraeli | William Ewart Gladstone | Benjamin Disraeli | William Ewart Gladstone | Marquess of Salisbury | William Ewart Gladstone | Marquess of Salisbury | William Ewart Gladstone | Archibald Philip Primrose | Marquess of Salisbury | Arthur Balfour | Sir Henry Campbell-Bannerman | Herbert Henry Asquith | David Lloyd George | Andrew Bonar Law | Stanley Baldwin | Ramsay MacDonald | Stanley Baldwin | Ramsay MacDonald | Stanley Baldwin | Neville Chamberlain | Winston Churchill | Clement Attlee | Sir Winston Churchill | Sir Anthony Eden | Harold Macmillan | Sir Alec Douglas-Home | Harold Wilson | Edward Heath | Harold Wilson | James Callaghan | Margaret Thatcher | John Major | Tony Blair | Gordon Brown | David Cameron | Theresa May | Boris Johnson

 
Vun „https://nds.wikipedia.org/w/index.php?title=Boris_Johnson&oldid=983567“