Bambi (Filmpries)

Statue bi de Bambi-Vergaav in Berlin, 2013

De Bambi is en düütschen Medien- un Feernsehpries, de jeed Johr vun de Hubert Burda Media vergeven warrt. Na Utsaag vun de Veranstalters geiht de Pries an „Minschen mit Visionen un Kreativität, vun de de Tokiekers över dat Johr sünners andoon weern“. Wokeen mit den Pries uttekent warrt beslutt en Jury, de regelmatig ut Hubert Burda un all Baasredakteuren vun’n Burda-Konzern besteiht.

Historie

De Bambi is in’t Johr 1948 vun den Verlegger vun de Film- und Moderevue Karl Fritz ut Karlsruhe in’t Leven ropen worrn. Dormit is de Bambi de öllste düütsche Medienpries. De eersten Priesdrägers weern de Schauspelers Jean Marais un Marika Rökk as ok de DEFA-Speelbaas un -mitgrünner Kurt Maetzig. Den sien Film Ehe im Schatten (1947) is dormols as de beste düütsche Film utwählt worrn. To’t 60-johrige Jubiläum hett Maetzig 2008 en Duplikat vun sien Keramik-Bambi kregen, vunwegen dat dat Original tweibroken weer.

Marika Rökk ehr Dochter Gabriele Jacoby segg, dat de Figur vun ehr den Naam Bambi harr, vunwegen dat se dormols, as ehr Mudder de Pries övergeven weer, seggt harr, dat de jo utsehn de as’n Bambi. De dormols veerjohrige Deern weer woll inspireert vun Felix Salten sien Book Bambi. Eine Lebensgeschichte aus dem Walde oder vun den Tekentrick-Film mit den glieken Titel vun Walt Disney ut dat Johr 1942. In’t eerste Johr weer de Pries noch ahn Naam vergeven worrn, vun 1949 an weer he as „Bambi“ betekent.

Toeerst weer de Pries noch as Rehkitz ut witte Keramik ergeven, dat al 1936 in de Staatliche Majolika-Manufaktur Karlsruhe vun de Bildhauersche Else Bach maakt worrn weer. Karl Fritz hett dat vör sien Filmpries opdeckt. Siet 1958 warrt dat Reh in vergoldte Bronze vun de de Kunstgeteree Ernst Strassacker in Süßen herstellt. De meisten Bambis hett bit hütt Heinz Rühmann kregen, de twölfmol mit den Pries ehrt weer.

Vun Karl Fritz hett sien langjohrigen Fründ un Gewarfspartner Franz Burda den Bambi övernahmen. Vun 1954 bit 1964 weer de Bambi-Vergaav in Karlsruhe afhollen. As de Presse vör Oort kritisch över sien Person berichten de, hett Franz Burda de Veranstlatung 1965 na München verleggt. Dor is de Veranstaltung lange Johren bleven. Dorna weer de Bambi an wesseln Öörd, as to’n Bispeel in Berlin, Hamborg oder Offenburg utgeven.

Kritik

In’n November 2011 hett de Hannoversche Allgemeine Zeitung sik dorför utsnackt, den Pries intostellen. De Grund dorför weern de jümmer glieken Priesdrägers, unnödigen ‚Schandalen‘, tofaalige Kategorien un de afnhemen Relevanz. Dat glieke seggen se ok över de Golden Kamera un den Düütschen Feernsehpries.

Dat in’n November 2011 de Bambi-Integratschoonspries an den Rapper Bushido geven worrn is, weer vun verschedene Steden bannig kritiseert. De hess’sche SPD-Vörsitter Thorsten Schäfer-Gümbel stell fast, dat Bushido för Feendlichkeit gegen Froonslüüd un gegen Homosexuelle stünn, un man kuum vun Integratschoon snacken künn, wenn man sik op Kosten vun annere Minschen profileren de. Wenige Daag na de ümstreden Bambi-Vergaav hett de Volksmusiker Heino sien Utteken, de he 1990 kregen harr, wedder torüchgeven. He begrünn dat dormit, dat he bannig in de Brass weer, dat en balldadigen Kriminellen as Bushido mit en Bambi uttekent weer. Mit em wull he nich op en Stoop stellt warrn. Ok de Laudater Peter Maffay hett Bushido een Maand later kritiseert, dat na sien Wöör keen Daten kamen weern un hett dorophen sien Tosamenarbeit mit em un Sido opkünnigt. De dree weern vörher bi de Talkshow Markus Lanz, woneem dat düchtig Striet mit de anndern Gäst un den Moderater geven hett.

Kiek ok

• New Faces Award

Weblinks

Bambi. Mehr Biller, Videos oder Audiodateien to’t Thema gifft dat bi Wikimedia Commons.

• Offizielle Websteed