Leukopenie

En Leukopenie, oder vullstännig Leukozytopenie, (vun gr.: λευκός leukós „witt“; κύτος kýtos „Höhl“, „Fatt“, „Hüll“ un πενία penía „Armoot“, „Mangel“) is en Tostand vun to wenig Leukozyten (witte Bloodkörpers) in’t Blood. Dat heet, dat de Tall vun Leukozyten op weniger as 4000 op’n Mikroliter Blood afsackt is. Tomeist sünd dat de neutrophilen Granulozyten, de minnert sünd. Man seggt denn ok Neutropenie dorto. En Minnern vun de Lymphozyten (also en Lymphopenie) föhrt dorgegen blots in roor Fäll to en Minnern vun de Samtleukozytentall. Dat Gegendeel vun de Leukopenie warrt as Leukozytoos betekent.

To en neutrophilen Granulozytopenie kann dat to’n Bispeel in’n Rahmen vun en Infekschoon kamen, as to’n Bispeel bi Typhus, aver ok bi en Chemotherapie oder in’n Tosamenhang mit Bloodkrankheiten (t. B. Sepsis, aplastische Anämie, Leukämie, myelodysplastisch Syndrom, Allergien). Wenn de Leukozytentallen dull minnert sünd, steiht de Patient ünner en gröttere Gefohr, sik mit en Krankheit to infizeeren.

De fehlen Granulozyten dör en Transfusion wedder to mehren, geiht blots an wenige Therapiezentren un funkschooneert nich jüst goot, vunwegen dat de transfundeerten Granulozyten blots en korte Levensduer hebbt. De Insatz vun de Granulozytentransfusion hett sik dorüm nich allgemeen dörsett. Dat is mööglich, de Leukozytentallen över Heelmiddels dör de Gaav vun hämatopoeetsche Wassdomsfakters as G-CSF stiegen to laten. Heelmiddels sünd to’n Bispeel Lenograstim (Granocyte), Filgrastim (Neupogen) oder Pegfilgrastim (Neulasta). Mitünner is en Ümkehrisoleeren nödig.

Weblenken

• De Leukopenie bi Utwossene (hoochdüütsch)