Biocombustible

Brasil utiliza l'alcòl coma biocombustible dempuèi 1979.

Un biocombustible pòt generalament èsser definit coma un combustible solid, liquid, o gas compausat, derivat de biomassa, es a dire un combustible amb poder calorific naut, fach de matèria organica que ven dirèctament o indirèctament de la fixacion d'energia solara per la fotosintèsi. Coma per exemple, l'etanòl eissit de la cana de sucre, utilizat dins las automobilas en Brasil.L'utilizacion de biocombustible es considerat coma un biais de redusir la dependéncia a las energias fossilas, mas aquò sovent al prètz d'una desforestacion importanta.

A l'ora d'ara, doas filièras principalas existisson :

• filièra òli e derivats, coma l'òli vegetal carburant, lo biogazòl (o biodiesèl) ; mas tanben de graissas animalas o d' acids gras divèrs (algas...)
• filièra alcòl coma lo bioetanòl, a partir de sucres, d'amidon, de cellulòsa o de lignina idrolizadas.

La produccion mondiala d'agrocarburants s'enauça a 4 113 PJ en 2019, en progression de 56 % respècte a 2010. Los principals païses productors son los Estats Units (37,9 % del total mondial), Brasil (24,1 %) e Indonesia (6,7 %).

Bilan environamental

Un estudi de la Comission Europèa publicat en març de 2016 e représ par l’ONG Transpòrt e Environament mòstra que la màger part dels biocarburants, luenh d’èsser vertuoses pel clima, emeton en fach mai de gases d'efièch de sèrra que los combustibles fossils ; aquò concernís subretot lo biodiesèl : 1 litre de biodiesèl emet 1.8 còps mai de gas d'efièch de sèrra en mejana qu'un litre de gazòl fossil ; mai precisament, lo litre de biodiesèl eissit del colza representa 1.2 còps mai d’emissions que lo litre de gazòl, aquel produch a basa de sòja dos còps mai, e lo a basa d'òli de palma tres còps mai. Lo bilan fòrça negatiu de l'òli de palma s'explica mai que mai pel cambiament d’afectacion dels sòls : sa produccion es la causa principala de desboscament dins los bòsques d'Asia del sud-èst.