Оркестрация

Оркестерска партитура

Слово оркестрация лєбо инструментация (ит. orchestrazione, франц. orcherstration, instrumentation, анґл. orcherstration, нєм. orcherstration, рус. оркестровка) ма три значеня:

1. Композицийни поступок у хторим музичар-оркестратор (найчастейше то композитор) хтори оркеструє даяку композицию, "облєкаюци″ ю до найкрасших колоратурних богатих звукох музичних инструментох. Композитор то роби по правилох и знакох оркестрациї. Кажди композитор муши знац и познац оркестрацию.

• музичар хтори аранжує даєдну композицию за менши музични состав, вола ше аранжер а поступок ушорйованя нотного змиста - аранжованє.

2. Музични предмет хтори ше виучує на музичним факултету лєбо музичней академиї.

3. Наука о розпоредзованю, удвойованю и хаснованю музичних инструментох за потреби оркестрациї.

Цо оркестратор муши познац

Волфґанґ Амадеус Moцарт, Симфония у ґе-молу оп.40

Оркестратор зоз своїм нукашнїм слухом ,,чує и видзи″ як зазвучи дїло хторе оркеструє. Же би то посцигнул оркестратор муши добре познац:

Оркестртор-аранжер позна можлївосци инструментох

• Звучни характеристики и прикмети-особлївосци оркестра,

• звукови (тонски) обсяг каждого инструмента,

• фарби шицких инструментох и реґистри у хторих найлєпше звуча,
• технїки и колоратурни можлївосци каждого инструмента,

• хтори инструменти погодни за медзисобне удвойованє,

• музичну ортоґрафию – знанє о транспозицийох, музичних ключох, и других специфичносцох нотациї за кажди инструмент окреме.

Слово инструментация означує скоро приблїжно исте цо и оркестрация. Инструментация значи розуменє каждого з инструментох; реґистри, їх можлївосци, познац їх шицки звуки хтори можу витвориц-одграц у композициї. То ше може зробиц у гоч хторей файти музики зоз инструментами.

У оркестрациї то ше одноши на на оркестер од його початкох у 17. вику по нєшка. Оркестрация подрозумює креативнєйше нотне розписованє за рижнородни инструменти тє. найчастейше за векши оркестер; як их комбиновац же би складно звучали и балансовали. Поготов же би дочарали копозиторово задумки у дїлу; колористични контрасти, характеристични ритми, звуково фарби, ниянсованє звучних ефектох, аґоґику итд. Же би витворели шицко тото цо дава єдному дїлу високи уметнїцки уровень.

Часто ше случує же композиторе препущую оркестрацию соїх дїлох другим музичаром. Леонард Берштайн напр. познати як композитор West Side Story-а, и после того як записал дїло, охабел ноти же би му оркестрацию поробели други музичаре. Композитор Морис Равел вжал ноти за клавир Слики зоз вистави композиотра Модеста Мусорґского (хтори умар штерацец роки скорей) и аранжировал их за оркестер. Векшина людзох позна тоту верзию а нє нательо верзию за клавир од Модеста Мусорґского.

Найпознатши оркестраторе

Рихард Ваґнер, Валкира

Найпознатши музичаре оркестрациї а источашнє и познати композиторе у историї музики то:

Рихард Штраус, Морис Равел, Гектор Берлиоз, Йоганес Брамс, Клод Дебиси, Николай Римски-Корсаков, Серґей Прокофєв, Рихард Ваґнер итд.

Гектор Берлиоз и Николай Андреєвич Римски-Корсаков були брилянтни композиторе у писаню за оркестер, односно оркестрациї. Обидвоме написали значни учебнїки за оркестрованє хтори ше и нєшка применюю.