Пупинация

Пупиначна цѣвка, 1922

(злѣва) Тороидална 0,175 Н пупиначна цѣвка про меджинародный телефонный канал компании AT&T од Ню Йорка до Чикага, 1922. Канал мав 108 крученых пар дротох, а кажда пара в кабелу потребовала таку цѣвку.

(справа) Цѣвкы были запакованы в олайом наповнены оцѣльовы контайнеры, монтованы на телефонный стовп. Такый контайнер ся мав намонтовати кажды 6000 футох (1,83 км) довжкы линии.

Пупиначна цѣвка в PTT музею в Белградѣ

Пупинация — метод поднятя индукчности телефонных линий, дозволяючый звекшити робочу довжину линии од 3 до 5 крат. Назва походить од имени вынаходника метода — Михайла Пупина, подавшого на патент свой вынаход в року 1899.

Проблема интерференции и слабнутя

Коли много телефонных дротох навѣшали на стовпы, указала ся проблема интерференции: взаимного вплыва, котрый приводив до перемѣшованя сигналох. Тоту проблему рѣшили, бо вынайшли, же кедь скрутити пару дротох, потребну про еден розговор, тогды сосѣдны пары на стовпѣ перестають заваджати една другой. Але зоставала проблема оддалености: при великых оддаленостях сигнал в крученой парѣ силно слабнув, и бесѣдникы не чули еден другого. Англицкый физик Оливер Гевисайд в року 1892 выступив з теориов, же тото слабнутя мож зменшити, кедь через певны дистанции додати до линии индукторы. Над тов проблемов робили Михайло Пупин з Колумбийской универзиты и Джордж Кемпбел з компании AT&T, а обое подали жаданя на патент. Наконець, в року 1904 быв патент признаный Пупину.

Реализация вынахода

Компания AT&T купила од Пупина монополне право на патент и до року 1917, коли монополия ся закончила, выплатила му $455 000 ($25 млн в 2011).

25. януара 1915 была святочно отворена трансконтинентална линия Ню Йорк — Сан Франциско, на яку спотребовали 2960 тон мѣдяного дрота. Меджи важныма особами, котры мали первый церемониалный розговор были оба меры и президент Вудро Вилсон з Вашингтона. В року 1927 в США было уже понад 5 млн км «пупинованых» телефонных линий, 10 крат вецей, як на зачатку стороча.

Жерела и одказы

• Brittain, James E., "The introduction of the loading coil: George A. Campbell and Michael I. Pupin", Technology and Culture, vol. 11, no. 1, pp. 36–57, The Johns Hopkins University Press on behalf of the Society for the History of Technology, January 1970.
• Problems of interference and attenuation. //Encyclopaedia Britannica.

Референции

Тоты даны суть часточно або цалком основаны на перекладї статї Loading coil на анґліцькій Вікіпедії.