Сотериология

Сотериология, од грец. σωτηρία спасѣня + λόγος учѣня — теологичне учѣня о спасѣню чоловѣка и свѣта, ествуюче во вельох религиях. В христианствѣ — якнайважнѣйша часть догматичного богословия, тѣсно звязана з христологиев и учѣньом о благодати.

Концепции

В основѣ сотериологии лежить теологична интерпретация проблем грѣха, одкуплѣня, благодати, одкровѣня.

Сотериологичны концепции розличных религий мож задѣлити до двох груп: едны выходят з того, же чоловѣк годен сам дойти ку спасѣню вдякы статочному животу, другы — же ку спасѣню потребне Боже благоволѣня. Первый вариант характерный про будгизм, другый — про католицизм и розличны пруды протестантства. При том в католицизме и православии спасѣня ся представлять можным лем через помочь Церкви. В протестантствѣ посередницка роль Церкви ся одмѣтуе, спасены будуть тоты, што вѣрують (теза «оправданя вѣров»); в радикалном калвинском вариантѣ спасены быдуть лем выбраны, а всякы добры дѣла чоловѣка и сама його вѣра суть даром Духа святого.

В исламѣ спасѣня ся доставать твердым держаньом могамеданскых предписох, включно паломництва ку святым мѣстам.

Интересны факты

Ортодоксална христианска сотериология припущала можность спасѣня лем про вѣрникох свойой конфесии, а днесь ряд представительох модерной католицкой думкы трактуе сотериологию овельо ширше: спасѣня можне не лем про христиан хотьякой конфессии, но и для невѣруючых (А. де Любак), ба аж и атеистох (К. Ранер), кедь ведуть нравный способ живота.

Жерела и одказы

• Овсиенко Ф. Г.: Сотериология //Энциклопедия религий / Под ред. А.П. Забияко, А.Н. Красникова, Е.С. Элбакян. — М.: Академический Проект, Гаудеамус, 2008. — 1520 с. (ISBN 978-5-8291-1084-0 Академический Проект) (ISBN 978-5-98426-067-1 Гаудеамус) русс. С. 1193.
• СОТЕРИОЛОГИЯ // Большая российская энциклопедия. Том 30. Москва, 2015, стр. 728 Редакция: 2017. Одчитане: 09.07.2020