Ambrosia Tønnesen

Ambrosia Tønnesen var fødd i Ålesund. Etter konfirmasjonen flytta ho til Bergen og fekk arbeid som lærar i almugeskulen. I 1884, etter fire år med kveldstimar i teikning og modellering, debuterte ho som målarkunstnar i Bergens Kunstforening.

I 1885 følgde ho undervisninga til den norske skulptøren Stephan Sinding i København, noko som opna interessa for bilethogging. Same året vart Tønnesen privatelev hos professor Albert Wolff i Berlin. I 1887 flytta ho til Paris, der ho lærte å hogge i marmor i atelieret til realisten René de Saint-Marceaux.

I 1910 flytte Tønnesen attende til Bergen, der ho heldt fram som bilethoggar resten av livet. Ho var den første profesjonelle kvinnelege skulptøren i Noreg.

Bronseskulpturane av J.C. Dahl (1902, Permanenten, Bergen) og Ole Bull (1897–1904, Den Nationale Scene, Bergen) er blant hovudverka. Andre verk er byster av Amalie Skram og Christian Børs i Bergens offentlege bibliotek, Edvard Grieg i Grieghallen, Christian Michelsen, Wollert Konow (S.B.) og fleire. På Vår Frelsers gravlund i Oslo står bysta av Gina Krog.

I 1903 oppnådde Ambrosia Tønnesen Mention honorable på Salongen i Paris, i tillegg til at ho fekk Kong Oskar 2.s Pro literis et atribus for skulpturen av J.C. Dahl. Året etter fekk ho ordenen Palmes d'Officier d'Académie av den franske staten. I 1939 fekk ho tildelt Kong Haakon 7.s fortenestemedalje i gull.

• Ambrosia Tønnesen i Norsk biografisk leksikon
• Ambrosia Tønnesen i Norsk kunstnerleksikon
• Norsk kunsthistorie

• Skeivt arkiv om Ambrosia Tønnesen

• Hysing-Dahl, C. (2007). Billedhuggeren Ambrosia Tønnesen. Bergen: Skrifter / Bergens historiske forening
• Veiteberg, J. (2009). Ambrosia Tønnesen : "Stenhugger i det fine" : ein biografi. Oslo: PAX
• Wiborg, T. (1982). «Med hammer og meisel – Ambrosia Tønnesen, Noregs første profesjonelle billedhugger», i Vogt, K., red.: Den skjulte tradisjon. Skapende kvinner i kulturhistorien. Oslo: Sigma