ராவுத்த குமாரசாமி

ராவுத்த குமாரசாமி என்பவர் கொங்கு நாட்டில் வாழும் இந்து கொங்கு வெள்ளாளர் இனத்தின் கண்ணன் கூட்டத்தாரின் குல தெய்வங்களில் ஒருவராவார். இவருக்கான கோயில் தமிழ்நாட்டின் கொங்கு நாட்டின், சிவகிரியை அடுத்துள்ள காகம் என்னும் கிராமத்தில் உள்ளது. ராவுத்த குமாரசாமியை கொங்கு வேளாளரில் கண்ணன் கூட்டத்தினர் காவல் தெய்வமாகவும், குலதெய்வமாகவும் வழிபடப்பட்டுவருகின்றனர். ராவுத்தர் என்பவர் ஒரு தமிழ் பேசும் முசுலிம்களிலேயே உயர் சாதி முசுலிம் ஆவார், குதிரை வீரரான இவர் ஒரு காலத்தில் இந்து கொங்கு வெள்ளாளர் இனத்தின் கண்ணன் கூட்டத்தாரின் மூதாதையர்கள் ஓரு பெரும் சங்கடத்தில் இருந்தபோது, குதிரை வண்டி மூலமாக அவர்களைப் பாதுகாத்து, அவர்களின் குலம் தழைக்க உதவியவர். இதனாலேயே இவரை குமாரசாமிக்கும் தங்களுக்கும் காவல் தெய்வமாகவும், குமாரசாமியை (முருகப்பெருமான் அவதாரம்) குலசாமியாகவும் இம்மக்கள் வணங்குகின்றனர்.

கோயில் வரலாறு

சில ஆண்டுகளுக்கு முன்புவரை வயல்வெளியில் கூரைக்கடியில் சுதையில் அமைக்கப்பட்ட ராவுத்தசாமி சிலைகளுக்கு ஆகம முறைப்படி கோயில் கட்ட கண்ணன் கூட்டத்தார் விரும்பினர். ஸ்தபதியின் அறிவுரைப்படி ராவுத்தசாமிகளுக்கு வேங்கை மரத்தால் சிலைகள் செய்யப்பட்டன. இதோடு மூன்றாவது மூர்த்தியாக குமாரசாமியான முருகனின் கற்சிலை அபிஷேக மூர்த்தியாக இடம்பெற வேண்டும் என்ற ஸ்தபதியின் ஆலோசனைப்படி, கருவறையில் ராவுத்தர்களுடன் குமாரசாமியான முருகனும் வீற்றிருக்கின்றார்.

கோயில் அமைப்பு

ராவுத்தரின் கோயிலானது சிறு மினாராக்கள், விமானம் என்று வித்தியாசமான அமைப்பைக் கொண்டுள்ளது. கோயிலில் வாளை உயர்த்திப் பிடித்து அமர்ந்தவாறும், வாயில் சுருட்டுடன் கைலி உடுத்தி ஒருக்களித்துப் படுத்தவாறும், குதிரையின் மேல் அமர்ந்தவண்ணம் என வெவ்வேறு நிலைகளில் ராவுத்தர் சிலைகள் காணப்படுகின்றன. கருவறையில் குமாரசாமியான முருகனுக்குப் பின்னால், பீடத்தில் வாளை உயர்த்திப் பிடித்தவண்ணம், ஒரு கால் தொங்கவிட்டு அமர்ந்த நிலையில் இரு ராவுத்தர்கள் உள்ளனர்.