சிலர் ஆழ உழுவார்கள், நான் அகலஉழுபவன். இரண்டுமே தமிழ் விக்கிபீடியாவிற்கு இன்றியமையாதவை. கோடையில் மழை இல்லாதபோது மண்ணைக் கிளறி அகல உழுவதன்மூலம் மழைநீரை ஈர்க்க முடியும், அதுபோல புதுப்பயனர்கள் தேடுபொறிகள் மூலமும் பிற வழிகளிலும் வரும்பொழுது அவர்களுக்கு எந்தத்துறையினரானாலும் ஈடுபாடு ஏற்படுத்துபவை பல்துறைக் கட்டுரைகள். அதே நேரம் மயூரநாதன் போன்றோர் சிறந்த ஒருமித்த கட்டுப்பாட்டுடன் முழுமையான கட்டுரைகளை உருவாக்குகின்றனர். அவை நமக்கு ஏற்றமளிப்பவை. நற்கீரன் போன்றோர் தொழில்நுட்பக் கட்டுரைகளை உருவாக்குவதிலும் வாய்க்கால் வரப்புகளாம் கொள்கைப் பக்கங்கள் உருவாக்குவதில் முனைப்புக் காட்டுகிறார்கள். இரவி, சிவகுமார் போன்றோர் கொள்கை அளவிலும், தர அளவிலும், விக்கி குறியீடு அளவிலும் களை எடுக்கின்றனர். செல்வா, கனகர், மற்றும் பல புதிய பயனர்களும் சிறப்புத் திறன்கள் பெற்று உரமிட்டு வருகின்றனர். தவிர இங்கு கணேசால் இயக்கப்படும் தானுந்துக் கலப்பையைப் பயன்படுத்தலாமா கூடாதா என்பது பற்றிய கலந்துரையாடல் நடந்து வருகிறது. இந்த கூட்டு வேளாண்மையின் விளைச்சலை ஒட்டுமொத்த தமிழ்ச் சமுதாயமும் பெற வேண்டும்.
விக்கி கூட்டம் ஒன்றில் ஜிம்போ வேல்ஸும் நானும்
[மேலே குறிப்பிடப்பட்டுள்ளவர்களைத் தவிர மேலும் பல பயனர்கள் சீரிய பங்களிப்புக்களையளித்து வருகிறார்கள். அவர்கள் பெயர்கள் இங்கு இல்லாதது இற்றைப்படுத்த முடியாததால் மட்டுமே, அவர்கள் இங்குள்ளவர்களுக்குச் சளைத்தவர்களல்ல.]
தமிழ் மொழியையும், தமிழர் பண்பாட்டையும் பற்றி புவியறியும் வகையில் ஆங்கிலத்தில் ஆவணப்படுத்துவதும் இன்ன பிறவற்றைப் பற்றி தமிழில் இங்கு ஆவணப்படுத்துவதும் எனது வழக்கம். தமிழரைப் பற்றி தமிழில் எழுதக் கூடாது அல்லது தேவை இல்லை என்றில்லை, அவற்றைப் பலர் ஏற்கெனவே செவ்வனே செய்து வருகின்றனர்.
