Capreolus capreolus

*Capreolus capreolus*
	;
Rezistrasion
	;
Dati
Perìodo de zestasion	283 dìi
Lonzevità màsima	17,5 anini
Pezo	1,35 kg
Grandesa fiołada	2
Stato de conservasion
	Ris-cio mìnemo
UICN	42395
Tasonomia
Clase	Mammalia
Órdene	Artiodactyla
Fameja	Cervidae
Tribù	Capreolini
Zènare	Capreolus
Spece	Capreolus capreolus; (L., 1758)
Nomenclatura
Protònemo	Cervus capreolus
Distribusion
	;

Na version verificà de sta pagina, aprovà el 18 avr 2021, le xe stà basà su sta version.

Al caoriól (o cavriol; Capreolus capreolus, L. 1758) el é an animal mamìfero ungulàto, col pel de color ros o maron, lonc da 90 e 130 cm e alt ala spàla fin a 80 cm. Al se sposta caminando in serca de mañàr, ma pì bel co i core e i scampa, parché i se móve co dei bei salti alti e longhi.

Dove se el càta

Se pol trovar libero in tute le zone de montaña, Alpi e Apenini o colina e pedemontana, ma anca in pianura se el tróva an poki de arbusti o siese onde podér scónderse. Spés i va in serca de roba da mañar te i camp e ort coltivà, de nòt o matìna bonora. De dì el é an cin pì difizile catàrlo visìn i paesi, pitòst su la tranquilità de la montagna.

Te la zona de Bełun te pol trovarghén tanti, anca visin a le case.

La casa el é sot le règole e te pol copàrne solo poki, se te se bon de corerghe drio, però. Anca la forestàl spès i varia al numero de bestie da copàr, par mantégner al numero just, parkè i pól fàr anca disastri te le coltivasion se i é in masa e no i trova da mañar.

Cuxina

I animaisti no i sarà tanto contenti, ma kuel che presente el ze un piato tipico de la tradision de Bełun

POLENTA E CAORIÓL

Cosa che serve

Polenta
Par 4 persone 1 kg de carne tenera de caoriol; se no avè an amigo casadór o ki che ve lo porta già copà e pelà, va ben anca quel surgelà che trové in botega, no l sarà nostràn ma al vien bon instés;
1 litro de vin ros, Cabernèt, Merlòt o vin nostran;
sèłeno, seola bianca o rósa e carote in quantità che te piàs a tì;
doraro, rosmarìn, salvia, broke de garofan, pever in grani, baléte de xenevro, ai (ajo), sal fin e altri aromi come che te gusta;
farina bianca 00
butìro

Preparasion

Sta aténto: par sto piàto ghe vol partir almanco la sera del dì prima par far la marinàta, mejo se te skuminsia 24 ore prima.

Te ciapa i filét de caoriól e te li cura ben, te ghe tira via tute le sbéteghe (par i can che i fa festa anca lori...) e te lasa tuti i toket pi boni e pi tenderi. De un kilo de carne te resta pì o manco 8 eti dopo averlo curà, quindi fà i to conti.

Te fa a toket pičoi la seola, le carote e l sedano e invese te liga co l spago da cusina l'aloro, al rosmarin, la salvia e te fa doi o tre masét. In te na supiéra, mejo na terina granda o na mastéla, te buta entro tut insieme la carne, al vin, le spesie ligade e kuele no ligade (balete de pever e ginepro, broke de garofan ecc), insoma da tuti i ingredient che ho scrit sora te li mìṡia tut insieme a part la farina e l butiro. Te mete la mastéla kuerta in frigo e te spéta tuta la not, almanco!

Al dì dopo, la matina bonora te tira fora la mastéla, te cava via točiando co le man i toket de carne, te li struca in visa che el bute fora al so sangue o el vin che el ga sorbì e te li mete in te na supiéra a part. Pò te li čiapa da novo e te li pasa tuti ben in te la farina, che i se sùghe ben. Te cava via el ajo da la mastéla che el pol dar fastidio e i maset de spezie ligade, che anca kuele le da fastidio dopo.

Kusinàr

Te na teča granda e un cin alta te bùta al butiro (kuant che te par a ti drio la to diéta) e te fa sofrizer i toket de seola, sedano e carota. Co te par che i se àbie ben dorà te ghe buta entro anca i toket de carne e te lasa rosolar an fià.

Co i se a rosolà, pian pianét te bùta inte la teča al točio che el ze restà te la mastéla; no stà butarlo tut al točio, parkè sul fondo de la mastéla el ze restà al sangue e an fià de porkerie che el ze mejo no butar dentro. Pitost zonta an fià de vin ros novo e bon, sempre de l steso tipo del kuel che te a usà prima o, par farlo veñer manco imbriago, an fià de àkua.

Ades te fà bojér e dopo te sbàsa l fogo e te kuerde la teča col kuerčol e lu el a da 'ndar sot al boj, pian pianét par doi ore almanco e ti ogni tanto te va a darghe na misiàda proprio parkè no l se tàke sòt. Co manca na meda oréta, pian pianét co un skuliér (cučaro) te tira su i toketin de carota, sedano e seola che no se a spapolà e ti inte un piato, col piròn te li spačiuga par ben e pò te li torna a butàr dentro la teča.

Ormai el ze quasi pronto, te a solo da ṡugàr ben al točo e ricordéte che te dovéa far anca la polenta!

Wikimedia Commons el detien imàjini o altri file so Caoriól
Wikispecies el detien informasion so Caoriól
Scholia el detien schemi gràfeghi so Capreolus capreolus

Controło de autorità	LCCN (EN) sh85114827 · GND (DE) 4049077-4 · BNF (FR) cb119311798 (data)