Polaris

Raprezentasion del sistema de Polaris

Polaris el ze un sistema stełare triplo situà inte ła costełasion de l'Orsa Minore; Polaris ła ze ła steła pì luminoza de ła costełasion e ła ze anca ła steła pì briłante de rente a’l Poło Nord sełeste; A ze par cuesto che ła ze anca ciamada Steła Połare o Steła del Nord.

Storia de łe oservasion e roło de steła połare

Sicome che Polaris ła se cata justa so ła projesion inte el sieło de l'ase de rotasion de ła Terra "sora" el Poło Nord, łora ła par ferma inte’l sieło mentre tute chełe altre stełe łe par jirarghe intorno.

A ze par cuesto che ła ze considerà un bon ponto de refarimento par chi che el nàvega inte l'emisfero Nord.

Da łe ùlteme mezure efetuà da un team de astrònomi intarnasionałi doparando el tełescopio ruso BTA, A ze rezultà che Polaris ła se cata a 325 ani łuze de distansa da ła Tera.

Etimołojìa

El nome el vien dal łatin Stella polaris, o vero "Steła połare". Visto che ła ze vesina al poło nord del sieło ła steła inte el corso de i ani ła ze stà ciamada inte racuanti nomi; i navegadori greghi i ła ciamava Kyonosoura o Cynosura, a dir "ła coa del can", o anca Steła Fenizia. Inte l'antiga Sina ła jera conosesta come Pih Keih, Ta Shin e Tien Hwang Ta ti, "el gran goernador del sieło". In India ła jera conosesta come Grahadhara, "el pojo de i pianeti".