Mierpî

Èn adviebe u on prono å mierpî, c' est onk ki n' a k' ene sillabe, et ki va candjî l' cogne di sacwantès dvancetes metowes padvant.

Il a vnou avier mi.

mins  :

Il a vnou aviè nozôtes.

Pus rålmint, li minme sacwè va ariver pacô avou sacwants sustantifs.

Li rîle n' est nén otomatike. Metans "disk' a" prind on R divant les adviebes :

disk' ar ci, disk' ar la.

mins nén dvant les pronos :

i n' a seu ariver disk' a mi.

Djivêye des dvancetes ki polèt prinde on R di rawete divant on mot å mierpî

• avå
• aviè
• disk' a
• dissu
• diviè
• dizeu
• dizo
• eviè
• pa
• po
• so
• triviè
• viè

Djivêye des mots å mierpî ki candjnut les dvancetes ki sont padvant

adviebes

• ci
• cial, chal
• la

pronos

• mi
• ti
• twè
• lu
• leye
• nos
• vos
• zels, zeles

sustantifs

• an : ût feye par an.
• djoû : deus côps par djoû.
• niût, nute : endaler par niût.

Kinoxhance del rîle do mierpî

Dins les croejhetes

Cisse rîle la n' est waire ricoirdêye dins les croejhetes e walon, dandjreus pask' ele "ni va nén" avou on sfwait tchaptrê des croejhetes do francès.

• Dins Ene båke so les bwès d' l' Årdene, Lucyin Mahin ndè cåze ås pådjes 304 et 305 (po "pa", "po" eyet "avå").

Dins les motîs

• Dins l' motî d' Bastogne, Michel Francard lome çoula e francès variété contextuelle.