Mannil Theriyuthu Vanam

https://www.pustaka.co.in

மண்ணில் தெரியுது வானம்

Mannil Theriyuthu Vanam

Author:

பாலகுமாரன்

Balakumaran

For more books

https://www.pustaka.co.in/home/author/balakumaran

Digital/Electronic Copyright © by Pustaka Digital Media Pvt. Ltd.

All other copyright © by Author.

All rights reserved. This book or any portion thereof may not be reproduced or used in any manner whatsoever without the express written permission of the publisher except for the use of brief quotations in a book review.

பொருளடக்கம்

அத்தியாயம் 1

அத்தியாயம் 2

அத்தியாயம் 3

அத்தியாயம் 4

அத்தியாயம் 5

அத்தியாயம் 6

அத்தியாயம் 7

அத்தியாயம் 8

அத்தியாயம் 9

அத்தியாயம் 10

அத்தியாயம் 11

அத்தியாயம் 12

அத்தியாயம் 13

அத்தியாயம் 14

அத்தியாயம் 15

அத்தியாயம் 16

அத்தியாயம் 17

அத்தியாயம் 18

அத்தியாயம் 19

அத்தியாயம் 20

அத்தியாயம் 21

அத்தியாயம் 22

அத்தியாயம் 23

அத்தியாயம் 24

அத்தியாயம் 25

அத்தியாயம் 26

அத்தியாயம் 27

அத்தியாயம் 28

அத்தியாயம் 29

அத்தியாயம் 30

அத்தியாயம் 31

அத்தியாயம் 32

அத்தியாயம் 33

அத்தியாயம் 34

அத்தியாயம் 35

அத்தியாயம் 36

அத்தியாயம் 37

அத்தியாயம் 38

அத்தியாயம் 39

அத்தியாயம் 40

அத்தியாயம் 41

அத்தியாயம் 42

அத்தியாயம் 43

அத்தியாயம் 44

அத்தியாயம் 45

அத்தியாயம் 46

அத்தியாயம் 47

அத்தியாயம் 48

அத்தியாயம் 49

அத்தியாயம் 50

அத்தியாயம் 51

அத்தியாயம் 52

அத்தியாயம் 53

அத்தியாயம் 54

அத்தியாயம் 55

அத்தியாயம் 56

அத்தியாயம் 57

சமர்ப்பணம்

என் உயிரினும் இனிய மயிலை யோகி ராம்சுரத்குமார் சத்சங்கத்தினருக்கு குதூகலத்துடன் சமர்ப்பணம்.

बैंक ऑफ़ बड़ौदा

Bank of Baroda

எழுத்துச் சித்தர் திரு. பாலகுமாரன்

உலகம் உய்திட ஓயாமல் எழுதிடும் தேனீ!

மாந்தருள் மாப்புகழ் பெற்றுவிட்ட ஞானி!

தான் பெற்ற அறிவால் - மற்றவர் அறிவைச் செதுக்கிய பாலா - நீர்!

சரித்திரக் கதைகளாலும் எமை வியக்க வைத்த

பெருமை உடையார் நீர்!

சின்னஞ்சிறு வயதிலேயே அம்மாவின் ஆசியால்,

முன்னால் இருப்பவரை உற்று நோக்கியதால்,

மூன்று காலமும் உணர்ந்த ஞானியானார்!

என்னே! இவரது கதைகள்!

சொன்னால் ஒரு நாவும் - இந்த ஒரு நாளும் போதாது –

கதைகள்

பின்னிப் பிழிந்தெடுத்துவிடும் மனதை -

அந்நியமாய் நெருடாத வார்த்தைகள் -

அந்நியோன்யமாய் வருடும் உத்திகள் – சலனமின்றிச்

சன்னமாய்ச் சிறை செய்யும் நெஞ்சினை -

என்னமாய்த் துடிதுடிக்க வைக்கும் -

இதற்குத்தானே - இதற்குத்தானே ஆசைப்பட்டாய்! பாலகுமாரா, பாலகுமாரா –

என்று ஓசையின்றி ஓலமிடவைக்கும்!

கன்னங்களில் இன்று தாடி!

எண்ணங்களால் இவர் இன்று யோகி!

முன்னொரு காலத்தில் ஆணும் பெண்ணும் -

பிணக்கின்றி வாழ கணக்கு ஒன்றைச் சொன்னார் -

இன்றைய நாளிலோ - இறைவனுடன் இணைந்திருக்க – அது இனித்தும் இருக்க -

கணக்கு ஒன்றைக் காட்டுகின்றார் -

கூட்டிக் கழித்துப் பார்த்தால் - எல்லாம் ஒரே கணக்குத்தான்!

அந்த அண்ணாமலையாரின் - யோகி ராம் சூரத் குமாரின் - வாழ்க்கைக் கணக்கு!

பேச்சுகளைவிட மௌனமே பெரிய மொழி! – அம்மொழியால்

ஆழியெனப் பெருகும் எங்கள் அன்பை

இந்த நாழியின் ஒரு நொடியை - உங்கள் கூர்விழிகள் முன்பு

உங்கள் சாதனைகளுக்காக -

மௌனமாய் உங்கள் காலடியில் சமர்ப்பிக்கின்றோம்.

மௌனம் மட்டுமே பேசட்டும்!

உங்கள் அருள் பெருகி வீசட்டும்!

எழுத்துச் சித்தர் திரு. பாலகுமாரன் அவர்களை இந்த 104-வது நிறுவன நாள் விழாவில் பாராட்டிப் போற்றிக் கௌரவிப்பதில் பாங்க் ஆப் பரோடா மிகவும் பெருமை கொள்கின்றது.

- இந்திரா ராமனாதன்

பாங்க் ஆப் பரோடா,

சென்னை - 600 018

யோகி ராம்சுரத்குமார்

யோகி ராம்சுரத் குமார்

யோகி ராம்சுரத் குமார்

ஜெயகுருராயா

அட! மண்ணில் தெரியுது வானம்

முன்னுரை:

தினகரனில் தொடராக இந்த கட்டுரைத் தொகுப்பு வெளிவந்தது. நான் எதிர்பார்த்ததை விட மிக அதிகமாக இதைப் பற்றி எனக்கு விசாரிப்புகள் வந்தன. நான் படித்தேன் மிக நன்றாக இருக்கிறது. என்று பல்வேறு திசையிலிருந்து வாசகர்கள் தொலைபேசியில் தொடர்பு கொண்டு பேசினார்கள். தினகரனுடைய வீச்சு மிகப் பெரிதாக இருக்கிறது என்பதை இது உறுதி செய்தது.

வாரப்பத்திரிகைகளை விட இந்தச் செய்தி பத்திரிகை நடத்துகின்ற ஆன்மீக வார இதழ் மிக பலமாக வாசகர் மனதில் இடம் பெற்றிருக்கிறது.

இந்தக் கட்டுரை தொகுப்பில் எனக்கு நெருக்கமாய் இருக்கின்ற சில இளைஞர்களுக்கு நான் என்ன சொல்வேனோ அதையே முக்கியமான விஷயமாக தொகுத்து அளித்திருக்கிறேன். திருமணம் செய்து கொண்டு அதில் உணர்ச்சி தடுமாற்றங்கள் கொண்டு தவிப்பவர்கள் என்னிடம் வந்து பேசுவதுண்டு. அவர்களுக்கு சில அடிப்படையான விஷயங்களை நான் நிதானமாகச் சொல்லித் தருவேன். அவர்கள் புரிந்து கொண்டு முகமலர்ச்சியோடு தங்கள் வாழ்க்கையை செப்பனிட்டுக் கொள்வார்கள். பிரிந்துவிடலாம் என்று இருக்கிறோம் என்று என்னிடம் வந்து பேசிய தம்பதிகள் அரை மணி நேரம் பேச்சில் மனம் மாறினார்கள். இன்னும் ஒரு வாரம் கழித்து வந்து பிரிந்துவிடலாமா என்று யோசனை செய்யுங்களேன் என்று நான் கேட்டுக் கொண்டேன். அடுத்த வாரம் வந்து பிரியவே போவதில்லை என்ற சந்தோஷமாக உறுதி சொன்னார்கள்.

இது நான் ஒன்றும் கடினமான முயற்சிகள் எடுத்து அவர்களுக்கு புத்திமதி சொல்லவில்லை. என்ன இடத்தில் விட்டுக் கொடுக்க வேண்டும். ஏன் விட்டுக் கொடுக்க வேண்டும், எவ்வளவு விட்டுக் கொடுக்க வேண்டும் என்று விசாரித்தேன். எது தம்பதிகளுக்கு நடுவே முக்கியம். நான், நீ, யார் பெரியவர் என்பதா? அல்லது அடுத்த தலைமுறையை பேணிக்காப்பதா? என்று கேள்வி கேட்டேன். அப்படி பேணிகாப்பாது போனால் என்ன ஆகும் என்றும் விவரித்தேன். அவர்கள் புரிந்து கொண்டார்கள்.

இம்மாதிரி இளைஞர்களோடும், யுவதிகளோடும் சற்று மத்திய வயது நண்பர்களோடும் நான் பேசியதின் எழுத்து உருவாக்கமே இந்த கட்டுரைத் தொகுப்பு.

ஏனெனில் இந்த விதமான குழப்பங்களில், சிக்கல்களில் நானும் இருந்திருக்கிறேன். முட்டாளாய், முரடனாய் காட்சியளித்திருக்கிறேன். என்னுடைய சற்குருநாதன் திருவண்ணாமலை மகான் யோகி ராம்சுரத்குமார் அவர்களை சந்தித்த பிறகு உள்ளே பல்வேறு கர்வக் கொம்புகள் ஒடிந்தன. நான் என்ன செய்து கொண்டிருக்கிறேன் என்ற தெளிவு எனக்கு அதிகம் ஏற்பட்டது.

எழுதுவதால் உண்டான தெளிவை விட ஒரு சற்குரு இன்னும் தீர்க்கமாக நமக்கு நம்முடைய லட்சணத்தை காட்டி விடுகிறார். நான் நல்லவனா? கெட்டவனா என்ற கேள்வி எனக்குள் எழுந்தது. பதில் கிடைக்கவில்லை. மிக எளிதாக என் குருநாதர் எனக்கு பதில் சொன்னார். நீ எப்போதும் நல்லவன் உன்னிலிருந்து பார்க்கும்போது. ஆனால் அடுத்தவருக்கு நீ நல்லவனா, கெட்டவனா என்று பார்க்க என்ன செய்ய வேண்டும் கேள்வி கேட்டார். நான் விழித்தேன். அடுத்தவராய் நின்று பார்க்க வேண்டும். நீயாய் நின்று பார்க்காமல் உன் மனைவியாய், உன் தாயாராய், உன் சகோதரியாய், உன்னுடைய நண்பர்களாய் நின்று உன்னை நீ பார்க்க வேண்டும். உன் நண்பனாய், உன் சகோதரியாய், உன் தாயாய் நீ எப்பொழுது இருக்க முடியும்? உன் மனைவியாய் உன் மனம் மாறுவது எப்போது? நீ முக்கியம் இல்லை என்பதை தூக்கி எறிய, நான் பெரிய ஆள் இல்லை என்று நீ தூக்கி எறிய நான் என்கிற பார்வை முக்கியமில்லை என்று புரிந்து கொள்ள, உன் பார்வை உன்னிலிருந்து வராமல் உன்னுடைய சகோதரியிடமிருந்து, உன் தாயிடமிருந்து வரும்.

உன் தாய் உன்னை எப்படி பார்ப்பாள் உன்னிடம் என்ன கேட்பாள் நீ எப்படி நடந்து கொள்கிறாய் என்று உன் தாயின் வழியாக பார். என்று சொல்ல எனக்குள் மிகப்பெரிய மனமாற்றம் ஏற்பட்டது. அந்த மனமாற்றத்தின் விளைவாக என் குடும்பம் நல்லபடியாக வளர்கிறது. செழிப்பாக இருக்கிறது.

என்னுடைய கர்வத்தை விட்டால் போதுமா, இனி வேறு என்ன செய்ய வேண்டும் அவரைக் கேட்டேன் உன் கர்வத்தை விடுவது எளிதா என்று என் குருநாதர் கேட்டார் உன் கர்வத்தை விடுவதற்கு என்னென்ன பயிற்சி வேண்டும் என்று யோசித்துப் பார் என்று சொல்லி அந்த பயிற்சிகளை எனக்கு மெல்ல மெல்ல நாள்பட நாள்பட சொல்லிக் கொடுத்தார்.

என்னுள் நெல்முளை அளவும். எது பற்றியும் எனக்கு கர்வம் இல்லை. அதற்காக எல்லாவற்றிற்கும் தலை ஆட்டிக் கொண்டிருக்கின்ற ஆளும் அல்ல. மறுக்க வேண்டிய விஷயத்தை கோபம் இல்லாமல் மிக மென்மையாக தகுந்த காரணங்கள் கூறி மறுத்துவிடுவேன். கொடுக்க வேண்டிய விஷயத்தை கொஞ்சம் கூட கர்வம் காட்டாமல் இது கொடுக்கிறேன் என்ற எண்ணம் கூட இல்லாமல் இது உனக்கு உண்டானது என்ற நினைப்போடுதான் கொடுக்கிறேன்.

வாழ்க்கையின் பல்வேறு சிக்கல்கள் என்னிடமிருந்து நகர்ந்து விட்டன. ஆக இந்த கட்டுரை தொகுப்பின் அடி நாதம் என் குருநாதர் திருவண்ணாமலை மகான் கடவுளின் குழந்தை அடியார்க்கு நல்லான் யோகி ராம்சுரத்குமார் அவர்களுடைய பேச்சுதான். அவருடைய உபதேசம்தான் இருக்கிறது.

நல்ல குரு எனக்கு சொல்லி கொடுத்ததை நண்பர்களுக்கு சொல்லி இருக்கிறேன். இப்போது உங்களுக்கு புத்தக வடிவில் இதை மாற்றி இருக்கிறேன்.

பாலகுமாரன் ஏன் நீ தாடி வைத்துக் கொண்டிருக்கிறாய். அவர் கேட்டார் தாடி என் முகத்துக்கு அழகாக இருக்கிறது. அதனால் வைத்துக் கொண்டிருக்கிறேன். ஆமாம் பகவான் நீங்கள் எதற்கு தாடி வைத்திருக்கிறீர்கள் என்று அவரைக் கேட்டேன். என்னமோ தெரியவில்லை தாடி வைத்திருக்கிறேன் என்றார் பளிச்சென்று எனக்கு ஒரு உண்மை புரிந்தது. அவருடைய தோற்றத்திற்கு எந்தக் காரணமும் இல்லை. எந்தக் காரியமும் இல்லை. அவர் தலைப்பாகை கட்டி கொண்டிருப்பதற்கு, ஜிப்பா போட்டுக் கொண்டிருப்பதற்கு, கையில் விசிறி வைத்துக் கொண்டிருப்பதற்கு எதற்கும் எந்த காரணமும் இல்லை.

பலன் எதிர்பார்த்து, எதிராளியின் பாராட்டை எதிர்பார்த்து அவர் எதுவும் செய்வது இல்லை. தாடியை எடுத்து விடலாமா என்று நினைத்தேன். அதுவும் தவறு அதுவும் யார் சொன்னதற்கோ செய்வதாக முடியும். அப்போது என்ன செய்வது? தாடி இருந்து விட்டு போகட்டுமே. என் மனம் மாறியது. இது மிகப் பெரிய விஷயமா இல்லை மிகச் சூட்சுமமான விஷயம்.

இதுபோல் பல்வேறு விஷயங்கள் வெறுமே என்னிடம் இருக்கின்றன. இந்த கட்டுரை தொகுப்பு உங்கள் வாழ்க்கைக்கு உதவும் என்று திடமாக நம்புகிறேன்.

இந்த கட்டுரையை என்னுடைய ஒலி நாடாவிலிருந்து எழுதிக் கொடுத்த என்னுடைய நண்பர் கிருஷ்ணா அவர்களுக்கு என் மனமார்ந்த நன்றி.

நல்ல நண்பர்கள் குடும்பத்தில் ஒருவராகவும் மாறி விடுகிறார். எல்லா நேரமும் துணை இருக்கிறார்கள். நல்ல நட்பை கொண்டாடி, சகலரிடமும் பகிர்ந்து கொள்வதுதான் வாழ்க்கை இதற்கு ஒன்றும் பெரிய கடினமான முயற்சிகள் தேவையில்லை. சிறு சிறு மனமாற்றங்கள் போதும். எங்கு இருக்கிறது வானம். வெகு தொலைவிலா, எட்டாத உயரத்திலா அல்ல. அட, மண்ணில் தெரியுது வானம். கையலக ஜலத்தில் எட்டிப் பார்த்தால் அந்த ஜலத்தில் வானம் தெரிகிறது. மிக அருகே வானம் இருக்கிறது.

இது, நான் சொல்கிற விஷயமல்ல. புராண விஷயம் ராமர் சிறுகுழந்தையாக இருந்தபோது நிலா வேண்டும். அதை பிடித்துத் தா இப்பொழுதே கொண்டு வா. என்று அடம் பிடித்தார். எத்தனை சொல்லியும் எவ்வளவு சமாதானப்படுத்தியும் குழந்தையின் அழுகையை அடக்க முடியவில்லை. சட்டென்று ஒரு தாதி பெரிய தங்கத் தாம்பாளத்தில் தண்ணீர் கொண்டு வந்து வைத்து இதோ பார் நிலா என்று சொல்ல எவ்வளவு கிட்டத்தில் வந்திருக்கிறது. உன்னை பார்க்க வந்திருக்கிறது. என்று சொல்ல அந்த நிலாவை வா, வா என்று கூப்பிட மேலே இருக்கின்ற நிலாவை விட்டு விட்டு குழந்தை ராமன் அந்த நிலவை வா வா என்று கூப்பிட்டான். குனிந்து குனிந்து அதை சந்தோஷமாக பார்த்தான். நிலவும் ராமரை பார்த்தது. நிலவு கைக்கு எட்டி விட்டது.

எல்லா விஷயங்களும் சற்று இடம் மாறினால் மிக அருகாக, மிக அழகாக தென்படும். இதைத்தான் சொல்ல முற்பட்டிருக்கிறேன். வாழ்க வளமுடன்.

என்றென்றும் அன்புடன்

பாலகுமாரன்

1

உலகம் என்பது மக்கள். மக்களின் இயக்கம்தான் உலகம். ஆனால், இந்த உலகம் சந்தடி நிறைந்தது. இரைச்சல் மிகுந்தது. எந்நேரமும், எல்லா காலத்திலும் ஏதாவது கூச்சலும் குழப்பமுமாகவே இருப்பது. அழுகை சத்தமும், அலறல் சத்தமும் ஆங்கார கொந்தளிப்பும், அவசரமும், அதட்டலும் மிகுந்தது. இரவு வேளையில் மட்டும் மிருகங்கள் இரைக்காக கூச்சலிடும். ஆனால், எல்லா காலகட்டத்திலும் மனிதர்கள் கூச்சல் உலகத்தை இடையறாது அசைத்துக் கொண்டே இருக்கிறது.

இந்தக் கூச்சலுக்கு நடுவே, இந்த சந்தடிக்கு நடுவே மௌனமாக இருத்தல் என்பது முடியுமா? இந்தக் கூச்சலையெல்லாம் விலக்கி இன்றைக்கு என்னிடமிருந்து எந்தவித எகிறலும் வராது என்று மௌனமாக இருத்தல் இயலுமா?

இப்படி ஒரு கேள்வியைக் கேட்டுக் கொள்ளுங்கள். இந்தக் கேள்வியைக் கேட்கும்போதே, எதற்கு மௌனமாக இருக்க வேண்டும் என்ற கேள்வியும் வரும்.

சிறிது நேரம் மௌனமாக இருந்தாலும் போதும். சுற்றியுள்ள மனிதர்களிடமிருந்து எழும்புகின்ற கூச்சல்கள் ஆச்சரியத்தைத் தரும். அட, இந்த அலட்டல் அலட்டுகிறானே. இப்படி ஆரவாரமாய் பேசுகிறானே. எந்த யோக்கியதையுமின்றி இப்படி கொக்கரிக்கிறானே என்று அவனைப் பற்றிய ஒரு இழி நினைப்பு ஏற்படும். சற்று உள் திரும்பிப் பார்த்தால் இப்படித்தானே நானும் அலட்டியிருக்கிறேன் என்று உங்களைப் பார்க்கின்ற எண்ணம் ஏற்படும். உங்களை, உங்களுடைய செய்கைகளின் அபத்தத்தை உற்றுப் பார்க்கும்போது, ஒரு தெளிவு ஏற்படும். அந்தத் தெளிவுதான் தீர்வுக்கு முதல் படி.

என்ன தெளிவு.

நீங்கள் யார். உங்கள் யோக்கியதை என்ன என்கிற தெளிவு.

என்ன தீர்வு.

அடுத்தபடி நீங்கள் எப்படி நடந்துகொள்ள வேண்டும், யாரிடம் என்ன பேச வேண்டும், எதை எப்படி ஏற்க வேண்டும், எதை எப்படி விலக்க வேண்டும் என்ற தீர்வு.

இதற்கு மௌனமாக இருப்பது உதவி செய்யுமா?

நிச்சயம் செய்யும்.

அடப்போய்யா... ஏகப்பட்ட வேலை இருக்கு. மௌனமாக இருப்பதாம் என்று உங்களில் பாதிபேர் அன்பு அலுப்போடு இந்தக் கட்டுரையை விட்டு நகரலாம்.

அது உங்கள் தலையெழுத்து, நல்ல விஷயங்களை நாம் அறிந்தே கை நழுவவிடும் பரிதாபம். இது என்ன என்று சிறிது யோசித்தாலும் போதும். இதை பின்தொடர முடியும். ஆனால், மௌனமாக இருக்க முடியுமா என்ற கேள்வி வரின் இதுவே உற்சாகமானது. இந்தக் கேள்விதான் உங்களை நல்ல நிலைக்கு அழைத்துச் செல்லும்.

மௌனமாக இருப்பது எளிதா?

இல்லை. எளிதில்லை. கூவிக்கூவி பழக்கப்பட்டு கூச்சலுக்கு நடுவே வாழ்ந்து கத்தினால்தான் கம்பீரம். உரத்த குரலில் பேசினால்தான் ஆரோக்கியம். உன்னை வெட்டுவேன், குத்துவேன் என்று முழங்கினால்தான் வீரம். உடல் மண்ணுக்கு... உயிர் அதற்கு... இதற்கு என்று சினந்து எழுந்தால்தான் சிறப்பு என்கிற மயக்க நியதிகள் மாறி மௌனமாக இருப்பதாமே அப்படியெனில் என்று யோசித்தால் முயற்சி ஆரம்பிக்கும்.

மௌனமாக இருப்பது எளிதல்ல. எப்பொழுது மௌனத்தை ஆரம்பிக்கிறோமோ அப்பொழுதுதான் இதைப் பேச வேண்டும். இதை சொல்லாமல் இருந்துவிட்டோம். இந்த ஒரு தொலைபேசி தொடர்பு மட்டும் முடித்துவிட்டு பிறகு மௌனம் என்று பல சறுக்குகள் ஏற்படும்.

மௌனமாக மூன்று நிமிடம் இருக்கும்போது நான்காவது நிமிடம் மௌனம் மறந்து போய்விடும். யாரோ வந்து எப்படிப்பா என்று நலம் விசாரித்தால் போதும். உடனே பல் தெரிய சிரித்து எழுந்து நின்று கைகுலுக்கி தொடர்ந்து பேச ஆரம்பித்து விடுவோம். அந்தப் பேச்சில் என்ன பலன் என்று வந்து கவனித்தால் ஒன்றுமில்லை. வெறும் பேச்சுதான் மிஞ்சும். மௌனமாய் இருக்கத் துவங்குகிறபோது திமிறுகின்ற மனதை அடக்குவதற்கு லகான் அவசியம்.

மௌனமாக இருக்கப்போகிறேன். என் மௌனத்தை எதுவும், எவரும் கலைக்க முடியாது என்ற உறுதி மிக முக்கியம்.

எத்தனை நேரம் மௌனமாக இருக்க வேண்டும்.

இதற்கு ஒன்றும் கணக்கில்லை. நாள் முழுவதும்கூட இருக்கலாம். ஆனால், ஆரம்பத்தில் சில மணித்துளிகள் முயற்சிக்கலாம். ஒரு மணி நேரம் இரண்டு மணி நேரம் என்று விஸ்தரித்துக்கொண்டு போகலாம்.

ஒரு காதல் படம் பார்த்தேங்க. நம்ம கமலா தியேட்டர்ல. ரெண்டரை மணி நேரம் நான் பேசவேயில்லை. படம் முடிஞ்ச பிறகும் பேசலை. மூன்று மணி நேரம் மௌனமாக இருந்தேன் என்று சொல்வீர்கள் என்றால் இதில் மிகப் பெரிய தவறு இருக்கிறது.

காதல் படம் பார்க்கும்போது உங்கள் மனம் பெரும் கூச்சல் போட்டிருக்கும். அழுதிருக்கும். தலையில் அடித்துக்கொண்டு விம்மியிருக்கும். எகிறி வசனங்கள் பேசியிருக்கும். வெட்டி வீழ்த்த வேண்டுமென்ற வேகம் வந்திருக்கும். இவையெல்லாம் மௌனத்தின் அறிகுறிகள் அல்ல. உரக்க குரல். அனால் உள்ளுக்குள்ளேயே கேட்டிருந்த குரல். ஒரு நாகரீகம் கருதி வெளிப்படாத குரல். இதுதான் தொலைக்காட்சிப் பெட்டியின் முன்பு உட்காருபவருக்கும்.

இருபது வயதுப் பெண்ணும், இருபத்தைந்து வயது ஆணும் குறைந்த ஆடைகளோடு பின்னிப் பிணைந்து ஆடுகிறபோது மனம் மௌனமாக இருக்குமா? வாய் மூடியிருப்பது மட்டுமே மௌனமாகுமா?

நான் சொல்கிற மௌனம் பேசாதிருப்பது மட்டுமல்ல. தன்னைச் சுற்றி இயங்கும் உலகத்தை துடிப்போடு கவனித்திருப்பது. வெறுமே பார்த்துக் கொண்டிருப்பது. இந்த உலகத்து நல்லது கெட்டதுகளை கூர்மையாக வேடிக்கை பார்ப்பது. அப்பொழுது உலகத்தின் எல்லாவித நடவடிக்கைகளின் உள்நோக்கம் பற்றி மிகத் தெளிவாக தெரியும். ஒழிக... என்று கூச்சலிட்டு ஊர்வலம் போகிறவருக்கும், வாழ்க... என்று எகிறி எகிறி வாழ்த்துபவருக்கும் உள்ள உண்மையான நடவடிக்கைகளின் அர்த்தம் தெரியும். இந்தக் கவனிப்பில் ஒரு ருசி வந்து விட்டால், இதை எப்படிப் பார்ப்பது என்று தெரிந்துவிட்டால் திரும்பத் திரும்ப மௌனமாய் இருப்பதும், இப்படிக் கவனித்துப் பார்ப்பதும் நமக்குப் பிடித்துப்போய் பழக்கமாகிவிடும். மிக ஆவேசமான ஒரு கூட்டத்தில் ஒவ்வொரு முகமாக உற்றுப்பார்த்து வரலாம்.

இது மனிதர்கள் பற்றிய புரிதலை அதிகமாக்கும். மனிதர்களை புரிந்து கொண்டாலொழிய வாழ்க்கை வளமாக, நலமாக இருக்காது.

இப்படி மௌனமாக இருக்க முடியாதபடி எது தடுக்கும்.

பழக்கமின்மைதான். கூச்சலிட்டு கூச்சலிட்டு எப்போதுமே உரத்துப்பேசி, எல்லாவற்றையுமே அதட்டலாக, அலட்டலாக பகிர்ந்துகொண்டு அதுவே இயல்பாகிவிட்டதல்லவா. அதிலிருந்து மௌனத்திற்கு வருவது கொஞ்சம் கடினம்தான். திமிறுகின்ற குதிரைக்கு லகான் போடுவது போல மனதை இழுத்துப்பிடித்து சற்று நேரம் அமைதியாக இரு என்று உத்தரவிட வேண்டும். இது எளிதில் கைவராது. தடுமாறினாலும் திரும்பத் திரும்ப மனதை மௌனத்திற்கு பழக்கப்படுத்த வேண்டும். ஒரு சரியான இடத்தை தேர்ந்தெடுத்துக் கொள்ள வேண்டும். வெளியிலிருந்து தொந்தரவு வராது போகும். அதைத் தடுத்துவிடவும் முடியும். உள்ளுக்குள்ளே உங்கள் மனம் போடும் கூச்சலை எப்படி நிறுத்துவது நீங்கள் மௌனமாக இருப்பதற்கு ஆரம்பித்தவுடனேயே மனம் கூச்சல் போடத் துவங்கும். ‘அவனை நாலு வார்த்தை கேட்காத விட்டுட்டேன்’ என்று ஏதோ ஒரு பழைய விஷயத்தை ஞாபகம் வைத்துக்கொண்டு சீறத் துவங்கும். இந்த தடவை கேலி பண்ணா விடக்கூடாது. பதிலுக்கு தீய்ச்சுடணும் என்று இன்னொரு வன்முறை வரும். இன்னொரு தடவை பேசிப் பார்த்து நிஜமாகவே அந்த லேடி ரெண்டாங்கெட்டானான்னு தெரிஞ்சுக்கணும் என்று அபத்தமான ஆவல் ஒன்று அதிகரிக்கும். போதும் யோசித்தது என்று மனதை தட்டிக்கொடுத்து மெல்ல திசை திருப்ப வேண்டும். அதற்கொரு முனைப்பு. ஒரு முயற்சி வேண்டும்.

இப்படி மௌனமாக எவ்வளவு நேரம் இருக்க வேண்டும்.

இதற்கு வரைமுறை ஏதும் கிடையாது. உங்களுடைய சௌகரியம்தான். மூன்று நிமிடம் இருந்தால் அது எந்தவித பலனையும் தராது. பத்து நிமிடங்கள் இருப்பது மெல்லிய தாக்கத்தை ஏற்படுத்தும். மறுபடியும் மௌனமாக இருக்க வேண்டுமென்ற ஆவலை ஒருவேளை அது கொண்டுவந்து கொடுக்கக் கூடும். அரை மணி நேரம் எவரோடும் எந்தத் தொடர்புமில்லாமல், உள்ளுக்குள்ளேயும் குதிக்காமல் ஏதேனும் ஒரு இடத்தில் தனியாக உட்கார்ந்து கொண்டு சுற்றுச்சூழலோடு மனதை லயிக்கவிடுவது என்பதை செய்தால், அதில் ஒரு தனித்த ருசி ஏற்பட்டுவிடும். மறுநாள் திட்டமிட்டு இன்னும் சௌகரியமான இடத்தில் எந்தத் தொந்தரவும் வராத விதத்தில் நீங்கள் உட்கார்ந்து கொள்வீர்கள்.

மௌனமாக இருக்கும்போது ஏற்படுகின்ற உடனடி மாற்றமென்ன?

சுவாசம். அது மிகச் சீராவதை நீங்கள் உடனடியாக உணர்வீர்கள். மார்புப்படம் விரிந்து நிறைய மூச்சு இழுத்து நிதானமாக வெளியிடுவது என்பது மிக இயல்பாக எந்த முயற்சியுமின்றி நடக்கும். திடீரென்று ஆழ்ந்து மூச்சுவிடுகிறோம் என்பதை நீங்கள் புரிந்து கொள்வீர்கள்.

இதனுடைய பலன் என்ன?

உடனடியாக கண்ணில் ஒரு பிரகாசம் இருக்கும். கன்னங்களில் ஒரு பூரிப்பு எழும். உதட்டில் ஒரு மெல்லிய நிம்மதியான புன்னகை வந்து ஒட்டிக்கொள்ளும். இந்த உலகத்தில் தலை போகிற விஷயம், அதிகம் அலட்டிக்கொள்ள வேண்டிய செய்தி எதுவுமில்லை என்பது மெல்லப் புரிய வரும். ஆனால், உறுதியானது இந்த அமைதி எனக்குப் பிடித்திருக்கிறது என்கிற எண்ணம் எழும்.

இதற்கு அடுத்தபடி யாரிடம் தொடர்ந்து பேச வேண்டுமென்றாலும் அளவோடு பேசுவீர்கள். பல கேள்விகளுக்குப் பதிலே சொல்ல மாட்டீர்கள். சில கேள்விகள் எழுந்தாலும் கேட்க மாட்டீர்கள். எதிரே இருப்பவரைவிட கொஞ்சம் உயரம் அதிகம் என்ற எண்ணம் நிச்சயம் ஏற்படும். அரை மணி நேர மௌனமே இந்த நம்பிக்கையைக் கொடுக்குமென்றால் வாழ்வின் பெரும் பகுதியை மௌனமாகக் கழித்தால் என்ன நம்பிக்கையெல்லாம் ஏற்படும் என்று தீவிரமாக மௌனமாக இருத்தலை கைக்கொள்ளத் தோன்றும்.

இனிய ஸ்நேகிதமே... இம்மாதிரி விஷயங்களை நான் எங்கேனும் புத்தகத்தில் படித்துவிட்டு உங்களிடம் பரிமாறிக் கொள்ளவில்லை. அந்த மதகுரு, இந்த ஞானி இப்படிச் சொல்லியிருக்கிறார் என்று புரிந்து கொண்டு, என் வாக்கியமாக எழுதவில்லை. நான் அனுபவித்ததை, நான் அறிந்து கொண்டதை, நான் தேடித் தேடி தெளிவானதை உங்களோடு பகிர்ந்து கொள்கிறேன்.

ஸ்நேகிதர்களை விட்டு விட்டு என்னால் மௌனமாக இருக்க முடியாது என்று நினைக்கிறீர்களா?

இதுவும் தவறில்லை. ஆனால், ஏதோவொரு காலகட்டத்தில் நீங்கள் ஸ்நேகிதர்களை உதறிவிட்டு இந்த மௌனத்திற்கு தள்ளப்படுவீர்கள். ஏதோவொரு துக்கத்தில், திகைப்பில் திசைமாறுவீர்கள். அப்போதாவது மௌனத்தை இறுக்கப் பிடித்துக் கொண்டால் நல்லது.

இந்தக் கட்டுரையைப் படிப்பதற்கும் படித்ததை செயலாக்குவதிற்கும் மிகச் சிறிய இடைவெளி இருக்கிறது. மௌனமாக இருந்து பார்த்தால் என்ன என்கிற எண்ணம் ஏற்படும்போது, அதற்கான இடத்தையும் நேரத்தையும் விரைவாக தேர்ந்தெடுத்து விடுங்கள். செயலில் இறங்கி விடுங்கள். ஒரு நாள்... இரண்டு நாள்... மூன்று நாள்... ஒரு வாரம்... பத்து நாளைக்குப் பிறகு உடம்புக்கு இப்படித் தனியே அமர்ந்திருப்பது பழக்கமாகிவிடும்.

அதெல்லாம் நமக்கு என்னாத்துக்கு. சாப்பிட்டோமா, வேலைக்குப் போனோமா, தூங்கினோமா, சினிமா பார்த்தோமா என்று வாழ்வை சோம்பலோடு அணுகினால் ஞானத்தின் நிழல்கூட மேலே படியாது.

ஏதோ புதிதாக சொல்கிறார்கள். இது என்னாலும் முடியும் என்று இறங்க வேண்டும். என்ன என்று தெரிந்து கொள்ள வேண்டும் என்ற ஆவல் மிக உத்தமம். முடியாது என்று நினைப்பது, உங்களைப் பற்றி உங்கள் மதிப்பீடே மரியாதை இல்லாது இருக்கிறது என்று அர்த்தம். நிச்சயம் முடியும். அட... மண்ணில் தெரியுது வானம். இது நம் வசப்படலாகாதோ. வானம் எங்கோ இல்லை. மிக அருகிலே இருக்கிறது. வானத்தை நான் ஜெயிக்க முடியாதா? நிச்சயம் முடியும். முயற்சித்தால் முடியாதது எதுவும் இல்லை முயற்சி செய்யுங்கள்.

2

மனிதர்கள் பேசுவதில் விருப்பமுடையவர்கள். பேசுவது எளிது. ஆனால், சரியான நேரத்தில், சரியான விஷயத்தை பேசுவது என்பது வெகு சிலருக்கே கைவரும். இடம், பொருள், ஏவல் தெரிந்து யாரிடம் பேசுகிறோம், சிலர் இந்தப் பேச்சைக் கேட்பாரா என்று புரிந்து கொண்டு பேசுவதுதான் கெட்டிக்காரத்தனம்.

இரண்டு பேர் சாலையில் சண்டை போட்டுக் கொண்டிருந்தார்கள். அந்த சண்டையை இடுப்பில் கைவைத்து வேடிக்கை பார்த்தவரிடம் சட்டென்று திரும்பி, எவ்ளோ பெரிய அநியாயம் பண்றான் பாருங்க சார் என்று ஆத்திரத்தோடு புகார் சொல்ல, வேடிக்கை பார்த்தவர் வாய்மூடி இருந்திருக்கலாம்.

இல்லீங்க... நான் அப்போ பிடிச்சு கேட்டுக்கிட்டுதான் இருக்கேன். தப்பு உங்க பேர்ல இருக்கு போலிருக்கே என்று மெல்ல ஆரம்பிக்க, அங்கிருந்து சாட்சிக்கு அழைத்தவர் சட்டென்று நகர்ந்து ஓங்கி ஒரு அறைவிட்டார்.

என்னமோ மனசு தாங்காத உங்கிட்ட சொன்னா. நீ உடனே நியாயம் சொல்றியே. பெரிய ஜட்ஜா நீ என்று சொல்ல, கன்னம் பொத்திக்கொண்டு அடிபட்டவர் கலங்கினார்.

என்னை அடிச்சதுக்காக அவரு தப்புன்னு சொல்லிடுவேன்னு பார்க்கறியா, அவரு பண்றது அநியாயம்னு சொல்லிடுவேன்னு பார்க்கறியா? என்று மறுபடியும் அடிபட்டவர் தொடர, சொல்லிடுவியா... என்னை தப்புன்னு சொல்லிடுவியா. அநியாயம்னு சொல்றதுக்கு உனக்கு வாய் இருக்கா? என்று எதிர்ப்பக்கம் சண்டையிட்டோரும் வந்து அவரும் தலைமீது தட்ட, சண்டை முக்கோணமாகியது. சாட்சி சொன்னவரை மெல்ல விலக்கிக் கொண்டு போக, சண்டை தொடர்ந்தது.

இது தேவையற்ற பேச்சு. பேச வேண்டிய இடத்தில் பேச வேண்டாத பேச்சு.

மனிதர்கள் பரஸ்பரம் அபிப்பிராயம் சொல்வதில்தான் முரண்படுகிறார்கள்.

அடடா... எவ்வளவு அழகு என்று ஒருவர் ஒரு பெண்ணை வியந்து சொல்ல, சிகப்பு நிறம், வாளிப்பான உடம்பு. அதுக்காக அழகுன்னு சொல்லாதீங்க என்று இன்னொருவர் ஆரம்பிக்க, அப்போ யாருங்க அழகு என்று கேட்க அவர் இன்னொரு பெண்ணின் பெயர் சொல்ல, கொமட்டிகிட்டு வருதுய்யா. அந்தப் பொம்பளைய போய் அழகுன்னு சொல்றியே என்று முதலாமவர் சொல்ல, மறுபடியும் தொண்டை கிழிய கூச்சல், மிகப் பெரிய அபிப்பிராயபேதம், மனஸ்தாபம் ஏற்படும்.

எல்லா விமர்சனங்களும் தன்னிலிருந்து, தன்னுடைய விருப்பத்திலிருந்து வெளியாகுபவை. நான் ஒருவரை நல்லவர் என்று நினைத்துவிட்டால் அவர் நல்லவர். நான் ஒருவரை அழகு என்று நினைத்துவிட்டால் அவர் அழகு. என்னுடைய நினைப்புதான் உன்னுடைய வெளிப்பாடாக வருகிறதே தவிர, விமர்சனமாக வருகிறதே தவிர உண்மையான நடுநிலையான அழகு பற்றிய அபிப்பிராயம் வருவதில்லை.

நான் உருளைக்கிழங்கு போண்டாவை விரும்புகின்றேன். உலகத்திலேயே மிகச் சுவையான பண்டம் அதுதான் என்று நினைக்கிறேன். இதுபற்றி நான் அபிப்பிராயம் சொன்னால் அதைப் பார்க்கக்கூட மாட்டேன் என்று சொல்லுகிறவர்கள் நிறைய பேர் இருப்பார்கள். மிகக் கெடுதலான