Acting debut ni Olive May ang bagong GMA-7 sitcom na TOLS.
Si Olive May ay miyembro ng sumisikat ngayong girl group na Calista, pero solo flight siya bilang aktres sa naturang sitcom, na mapapanood simula June 25, 2022.
Ano ang naging reaksiyon ng ibang Calista members na sina Laiza, Anne, Denise, Elle, at Dain sa pagsali ni Olive May sa cast ng TOLS?
Bago pa man nakasagot si Olive May sa tanong ng PEP.ph (Philippine Entertainment Portal) ay nagtilian na ang mga Calista members na present sa face-to-face presscon ng TOLS noong June 6 sa Monet Ballroom ng Novotel Hotel sa Cubao.
“Actually po very supportive po sila kasi alam po nila from the start, gusto ko talagang mag-acting.
"Then nung sinabi ko po sa kanila, parang, as in supportive sila kahit may trainings kami.
“So like may times absent po ako sa training kasi kailangan ko pong um-attend sa tapings, very supportive sila. Tinutulungan nila akong mag-catch up kung may ma-miss man, iyon po.
“Love you guys,” pagbati ni Olive May sa kapwa niya Calista members na sinuklian naman ng mga ito ng malakas na “I love you!”
Mananatili raw siyang miyembro ng Calista.
olive may wants to work with alden richards
Kasama ni Olive May sa TOLS sina sina Kelvin Miranda, Shaun Salvador, Abdul Raman, Arkin del Rosario, Raymund Mabute, at Betong Sumaya.
Ito rin ang comeback project sa GMA-7 ng komedyanang si Rufa Mae Quinto.
Tungkol kay Rufa Mae, aniya, “Naku, sobrang overwhelmed po ako nung nalaman ko. I was very ecstatic po talaga kasi napapanood ko na po siya ever since and sobrang idol ko po talaga siya.
“And nung nasa set po kami, nagsasalita pa lang siya, napapangiti po talaga ako agad. So I’m very honored po and happy na nakatrabaho ko siya.
“Hindi lang po si Ms. Rufa, pati na rin po lahat ng cast po, sina Kelvin, Shaun, Abdul, Arkin, si Raymund po and si Sir Betong po."
May ka-loveteam ba si Olive sa TOLS?
“Secret,” ang bulalas ng baguhang aktres.
Kung patuloy na aarangkada ang solo career ni Olive May at magdesisyon ang GMA o GTV na bigyan siya ng launching series na siya na ang bida, sinong Kapuso actor ang nais niyang maging leading man?
Muli, bago nakasagot si Olive May ay isang malakas na tilian ang nagmula sa kanyang mga kagrupo sa Calista.
“Si Alden Richards po.”
Hindi pa nakikita o nakikilala nang personal ni Olive May ang Pambansang Bae.
“Pero sobrang nilu-look up ko po talaga siya. Ang galing niya po and very manly and handsome,” nakangiting sinabi pa ni Olive May.
Ang TOLS ay magkakatuwang na produksiyon ng GTV (ng GMA Network), Tyronne Escalante Artist Management (TEAM), at Merlion Events Production, Inc.
Sa direksiyon ni Monti Parungao, ang bagong sitcom ay mapapanood simula June 25, 7:05 p.m. sa GTV.