Marius Fransman

Marius Fransman, 2013

Marius Fransman (gebore 15 Augustus 1969) is 'n Suid-Afrikaanse politikus. Hy het gedien as Leier van die Opposisie in die Wes-Kaapse Provinsiale Parlement van 2014 tot 2016, en as Voorsitter van die Wes-Kaap African National Congress van 2011 tot 2016. Hy het gedien as Adjunkminister van Internasionale Betrekkinge en Samewerking in die kabinet van Jacob Zuma. Van 2009 tot 2014 was hy 'n lid van die Nasionale Vergadering. Fransman het van 1999 tot 2009 en weer van 2014 tot 2016 as lid van die Wes-Kaapse Provinsiale Parlement gedien.

Hy was 'n lid van die ANC tot en met November 2016 toe hy vir vyf jaar uit die party geskors is nadat die party se tugkomitee hom skuldig bevind het aan wangedrag. Voor die verkiesing van 2004, was hy Provindiale Minister van Maatskaplike Ontwikkeling en Armoedeverligting. Van 2004 tot Julie 2005 was hy Provinsiale Minister van Plaaslike Regering en Behuising in die Wes Kaap.

In Desember 2018 het die Nasionale Vervolgingsgesag aangekondig dat seksuele aanranding-eise deur Fransman se aanklaer, Louisa Wynand, ondersoek sal word. Hy verskyn op 14 Augustus 2019 in die Kimberley-landdroshof in die Noord-Kaap op 'n aanklagte van seksuele aanranding. Die aanklagte van seksuele aanranding teen Fransman is amptelik in September 2019 teruggetrek, nadat die twee partye tot 'n ooreenkoms gekom het om buite die hof te skik. Die ANC het gereageer met die opheffing van Fransman se skorsing as partylid. Lerumo Kalako, tussentydse ANC Wes-Kaapse voorsitter, het gesê Fransman is welkom om weer lid van die party te word.

Fransman het in Januarie 2024 na vore getree as een van die leiers van 'n nuwe party genaamd die People's Movement for Change (PMC), wat bestaan uit leiers oor verskeie sektore, insluitend godsdiens, politiek en die burgerlike samelewing. Hy het gesê dat sy voormalige party nie die samelewing vorentoe kan neem nie, met verwysing na die versuim om kwessies van werkloosheid, regstelling en ongelykheid aan te spreek.