Mireille Mathieu

Mireille Mathieu
Mireille Mathieu op 14 November 2014 in die Théâtre Sébastopol te Lille
Agtergrondinligting
Ook bekend as	Mimi, Sparrow van Avignon
Gebore	22 Julie 1946 (1946-07-22) Avignon
Genres	Chanson, Pop standards
Beroep(e)	Sangeres, uitgewer, outeur
Jare aktief	1962 – hede
Etikette	Ariola Records, Metronome Records, Polydor, Atlantic Records, Capitol, Warner Music France, Columbia Records, Philips Records, Barclay Records
Webwerf	mireillemathieu.com

Mireille Mathieu (gebore 22 Julie 1946) is 'n Franse sangeres wat wêreldwye roem verwerf het met die meer as 1 200 liedjies wat sy in elf tale opgeneem het. Haar plateverkope word op tussen 125 en 150 miljoen geskat.

Kinderjare

Sy is in die Franse stad Avignon as die oudste van Roger en Marcelle Mathieu (oorlede op 20 Maart 2016 in die ouderdom van 94 jaar) se 14 kinders gebore. Van haar moeilike kinderjare het sy in 'n Duitse TV-onderhoud op 22 Oktober 2007 gesê: "Ons het in 'n eenvoudige houthuis gewoon. Wanneer dit koud was, was dit regtig koud. Ons het net 'n klein stofie gehad en geen warm water nie. Ons moes water in 'n pot verhit en ons dan daarmee was." Die gesin het later na 'n vyf-kamer-woonstel, wat die staat vir behoeftige gesinne opgerig het, getrek, maar vir die gesin was dit "'n regte paleis, omdat ons die eerste maal 'n stortbad gehad het!" Sy vertel in 'n ander onderhoud: "Dit was die mooiste dag van my lewe, want die eerste keer kon ek 'n bad neem. Dit was 'n heerlike gevoel."

Haar vader, Roger, was 'n steenmaker wat in 'n klein familie-onderneming vir Mireiile se oupa gewerk het. met 'n baie mooi tenoorstem wat self van 'n sangloopbaan gedroom het. Haar ma was 'n huisvrou wat haar hande vol gehad het met die kinders en boonop haar bes moes doen om die kroos gevoed en gekleed te hou op haar man se skrale inkomste. Mireille se sangtalent het egter baie vroeg al aan die lig gekom en op vier maak sy haar openbare buiging toe sy in die plaaslike kerk in 'n middernagmis sing. Sy het van kleins af daarvan gedroom om een van die groot name te wees wat sy toe dikwels oor die radio gehoor sing het en wou graag vir 'n groter gehoor as net haar gesin, gemeente en skoolvriende sing. Haar groot heldin en voorbeeld was die Franse sangeres Édith Piaf, met wie sy in latere jare dikwels vergelyk is. Mathieu wou egter haar eie identiteit as sangeres versterk en het eers in 1993 'n huldeblyk aan Piaf opgeneem, waarop sy 13 van die "Mossie van Parys" se grootste treffers sing. Dié album is in 2003 heruitgereik op CD.

Sangloopbaan begin

Sy het as tiener in 'n fabriek gaan werk om die gesin te help onderhou, maar ook om geld te spaar sodat sy sanglesse kon neem. Haar eerste sangonderwyser was Laure Colliere, wat haar gewaarsku het teen die probleme in die vermaakbedryf: "Om sangeres te wees moet jy stewig in jou skoene staan, liggaamlik sowel as geestelik." Mireille se groot droom het haar egter hiervoor laat kans sien.

Vroeg in die jare sestig neem die Franse popsanger Johnny Hallyday se bestuurder, Johnny Stark, haar onder sy vlerk. Dit was hy wat haar ontdek, onderrig en uiteindelik in die wêreldberoemde "Mossie van Avignon" (sy is skaars 1,5 m lank) help omskep het. Toe hy haar die eerste keer by 'n sangwedstryd ontmoet toe sy agtien was, het hy haar gevra of sy hom sou toelaat om moeite met 'n sangloopbaan vir haar te doen. Sy het ingewillig en hoewel die harde werk en streng dissipline haar dikwels in trane gehad het, skryf sy haar groot sukses hoofsaaklik aan sy belangstelling toe. "Ek moes alles nuut leer. Ek moes leer om my uit te druk en hoe om te beweeg. Eintlik alles van A tot Z heeltemal nuut leer," sou sy later sê, maar oor haar roem: "Dis alles aan hom te danke." Gelukkig het sy baie hard gewerk en altyd haar twee prioriteite voorop gestel: "My werk en my Here."