Asteroid

Asteroid heiße chleini planeteähnlichi Objekt, wo sich in Keplersche Umlaufbahne um d Sunne bewege. Sie zelle in dr Regel zue dr Kategori Chleikörper vum Sunnessytem, die grösste au zue dr nöie Kategori Zwergplanet.

In dr Terminologi vu dr Astronome wird e Asteroid hüffig Chleiplanet oder Planetoid (planeteähnlich Objekt) gnennt, wil Asteroid sinngmäss eigetlich fer „sternähnlichs Objekt“ stoht (vu grich. ἀστήρ, astēr "Stern"), was dodra lit, dass Asteroide anderscht wie grossi Planete au in grössere Teleskope wie Sterne numme as e Punkt erschine un nit as e Schibli. Säll isch aber au die einzig Gmeinsamkeit mit Stern.

Bislang sind öppe 220.000 Asteroid bekannt, wobi die datsächlich Azahl wohl in d'Millione go dürfte.

Dr grösst Asteroid im Hauptgürtel zwische Mars un Jupiter isch dr Zwergplanet (1) Ceres mit öppe 930 km Durmesser. Witteri grossi Asteroide sin d (2) Pallas, d (3) Juno, d (4) Vesta, d (5) Astraea, d (6) Hebe, d (7) Iris, d (10) Hygiea un d (15) Eunomia, wu einigi devu au in di nöi Kategori Zwergplanet falle dürfte.

Im Kuipergürtel uf dr änere Site vu dr Neptunbahn sin Objekt wie (50000) Quaoar mit 1250 km Durmesser, (90482) Orcus mit eme Durmesser vu 1600–1800 km un (136199) Eris mit 2500–3200 km Durmesser gfunde worre. Äne am Kuipergürtel isch Endi 2003 dr öppe 1700 km gross Asteroid (90377) Sedna entdeckt worre. Sälli Objekt zelle nooch dr nöie Systematik chümftig zue dr Kategori vu dr Plutoid, also Ojekt, wu im Zwergplanet (134340) Pluto ähnliche sin.

Dä Artikel basiert uff ere fräie Übersetzig vum Artikel „Asteroid“ vu de dütsche Wikipedia. E Liste vu de Autore un Versione isch do z finde.