Joseph Deiss

Dialäkt: Züridütsch (See)

Joseph Deiss (2010)

De Joseph Deiss (* 18. Januar 1946 z Friburg), Bürger vo Zeihe und Barberêche, isch en Schwiizer Politiker (CVP).

Bruef und Familie

Nach em Schuelbsuech in Friburg hät de Joseph Deiss Wirtschafts- und Sozialwüsseschafte gschtudiert und isch 1973 promoviert. Vo 1973 aa hät er Volkswirtschaftslehr a dr Universität Freiburg doziert. Er hät einigi Ziit mit Forschigsarbete am King’s College vo dr Universität Cambridge verbracht.

1983 isch de Deiss usserordentliche Professor worde, 1984 hät er en Ruef als ordentliche Professor für Volkswirtschaftslehr und Wirtschaftspolitik a dr Universität Freiburg überchoo. I de Jahre 1996 bis 1998 isch er Dekan vo dere Fakultät für Wirtschafts- und Sozialwüsseschafte gsii. Während siinere Ziit a dr Universität isch er dezue Verwaltigsratspräsident vo dr Schumacher AG z Schmitte und Vorsitzende vo dr Raiffiisebank in Courtepin gsii.

De Joseph Deiss isch verhüüratet und hät drei Chind. Er lebt in Barberêche, FR.

Politik

Siini politischi Karriere hät de Joseph Deiss 1981 als Abgordnete im Grosse Rat vom Kanton Friburg aagfange, won er 1991 schliesslich präsidiert hät. Vo 1982 bis 1996 isch er dezue Gmeindspräsident vo Barberêche gsii.

1991 isch de Deiss in Nationalrat gwählt worde und hät dem bis zu siinere Wahl in Bundesrat im Jahr 1999 aaghört. Vo 1995 bis 1996 isch er Vizepräsident vo dr ussenpolitische Kommission gsii. Vo 1993 bis 1996 hät de Joseph Deiss dezue als Priisüberwacher vo dr Schwiiz gamtet. Aaschlüüssend isch er bis 1998 Präsident vo dr Kommission für d Totalrevision vo dr Bundesverfassung gsii.

Am 11. März 1999 isch de Deiss als Nachfolger vom Flavio Cotti in Bundesrat gwählt worde. Er isch eine vo de drei offizielle Kandidate vo dr CVP gsii, nebed em Adalbert Durrer und em Remigio Ratti. Im sechste Wahlgang hät er sich schliesslich gege de inoffizielli Kandidat Peter Hess durgsetzt, mit 120 zu 119 Stimme.

Vo 1999–2002 isch er em Eidgenössische Departement für uusswärtigi Aaglegenheite vorgschtande. 2003 hät er is Volkswirtschaftsdepartement gwechslet.

Nachdem siini Parteikollegin Ruth Metzler-Arnold am 10. Dezember 2003 nöd als Bundesrätin widergwählt worde isch, isch de Deiss a ihrer Schtelle zum Bundespräsident fürs Jahr 2004 gwählt worde – eis Jahr früehe als eigentlich vorgseeh. Sither isch er dr einzigi Vertreter vo dr CVP im Bundesrat gsii.

Am 27. April 2006 hät de Joseph Deiss siin Rücktritt uf de 31. Juli bekannt geeh. Am 14. Juni 2006 hät d Bundesversammlig d Doris Leuthard zur Nachfolgerin vom Bundesrat Joseph Deiss gwählt.

De Joseph Deiss hät als farblose, aber au als sachkundige und uusgliichende Bundesrat gulte. Siin gröschte Erfolg als Usseminischter isch dr Biitritt vo dr Schweiz zur UNO gsii. Zletscht hät er sich für es Freihandelsabkomme mit de USA und e Übernaahm vom Cassis-de-Dijon-Prinzips vo dr EU iigsetzt.

Wüsseschaftlichi Arbete

• Manuel d'économie politique, mit Danielle Meuwly, 1994
• Initiation à l'économie politique: analyse économique de la Suisse, 1982
• Economie politique et politique économique de la Suisse, 1979
• The regional adjustment process and regional monetary policy, 1978
• La théorie pure des termes de l'échange international, 1971 (Doktorarbet)

Literatur

• Ernst Tremp: Deiss, Joseph. In: Historisches Lexikon vo dr Schwiiz.
• Joseph Deiss im Munzinger-Archiv (Artikelaafang frei abruefbar)

Weblink

• Joseph Deiss uf dr Websyte vo dr Bundesversammlig
• Vorschtöss, wo de Joseph Deiss im Nationalrat iigreicht hät in Curia Vista

Vorgänger Flavio Cotti

Mitgliid im Schwiizer Bundesrat 1999-2006

Nochfolgeri Doris Leuthard

Dä Artikel basiert uff ere fräie Übersetzig vum Artikel „Joseph_Deiss“ vu de dütsche Wikipedia. E Liste vu de Autore un Versione isch do z finde.