Budo
Los caráuteres 武 y 道 tan fechos equí con una caligrafía d'estilu "sosho" o cursivu
Etimoloxía
[editar | editar la fonte]Budo, tocántenes a la so etimoloxía, ye una amestadura del raigañu bu (武), que significa guerra o marcial; y do (道), que significa camín o sienda. Más ampliamente, do ye una “manera de vivir". Poro nel budo nun hai enemigu esternu, solo ún internu: el propiu ego. De manera asemeyada a budo, bujutsu ye un compuestu de los raigaños bu (武), y jutsu (術), que significa ciencia, habilidá, o arte. Asina, budo ye más de cutiu traducíu como "el camín guerreru", o "el camín marcial", mientres que bujutsu tradúcenlu como "ciencia de la guerra" o "habilidá marcial”, masque ye más normal qu'a dambos términos indistintamente los tornen como “artes marciales”. Pero los significaos fonderos d'estes dos pallabres estrémense por una diferencia importante: mientres que bujutsu namái da atención a la parte física de la llucha (cómo ganar meyor a un enemigu), el budo tamién da atención a la mente y a cómo unu tenía que medrar moralmente. El budo modernu garra aspeutos del estilu de vida del samurái del Xapón feudal pa usalos nel desarrollu personal na vida moderna.
Diferencia ente Budo y Bujutsu
[editar | editar la fonte]Nun ye fácil dibuxar eses diferencies ente budo y bujutsu. Unos consideren históriques eses diferencies; otros citen diferencies nos métodos o la filosofía d'entrenamientu, o l'empeñu nel desarrollu espiritual. Delles distinciones ente les dos formes cúntense embaxo.
Gendai budo o Koryu bujutsu
[editar | editar la fonte]Cuando la era feudal de Xapón, la pallabra bujutsu yera d'usu más común pa describir les artes marciales que la pallabra budo. Anguaño, les artes marciales "clásiques" creaes enantes de la Restauración Meiji llámenles de cutiu koryu bujutsu (lliteralmente, "arte marcial de l'antigua escuela"). Y al empar, les artes marciales modernes creaes na Restauración Meiji o dempués llámenles gendai budo (lliteralmente, "camín marcial modernu"). Gendai budo como'l "yudu", "kendo" y "iaido" aniciaron en koryu bujutsu como "jujutsu", "kenjutsu" y "iaijutsu" respeutivamente.
El pasu final de les artes clásiques (koryu bujutsu) a les modernes (gendai budo) foi principalmente per aciu de les condiciones americanes daes a los xaponeses p'aceutar la so rindición a la fin de la campaña del Pacíficu (Segunda Guerra Mundial), incluyendo la de que toles fuercies militares xaponeses fueren desfeches (y munchos xefes y oficiales superiores xulgaos por delitos de guerra). Esto traxo tamién qu'a les escueles clásiques d'artes marciales prohibiérenles enseñar téuniques mortales, porque al paecer de los americanos eso podía ser un guañu d'entrenamientu d'insurxentes.
Poro estes escueles antigües fueron cubicándose pa encaxar na nueva situación. Muncho a la manera de les artes marciales norteamericanes, camudaron a estilos de "baille" p'anubrir la so verdadera intención. Pela so parte los gendai budo enveredaron más a deportes y competición. Esta diferencia na intención sopelexada (bien contraria a la muerte de los enemigos d'unu) dexó que los gendai budo espoxigaren nel Xapón de posguerra, mentanto los bujutsu volaron de manera soterraña. Lloñe de cayer no obsoleto, el bujutsu y el budo son dambos importantes güei, caún na so función respeutiva. El gendai budo, como educación física y entrenamientu pa la competición, promocionando la moral, lo espiritual y los valores deportivos, y el bujutsu como entrenamientu marcial dafechu pa la defensa propia y d'otros.
Civil o militar
[editar | editar la fonte]Munchos consideren al budo una forma más civil d'artes marciales, como una interpretación o evolución del más vieyu bujutsu, que clasifiquen como estilu o estratexa más militarista. Según esta distinción, l'arte civil modernu nun recalca tanto la prauticidá y efectividá como'l desenvolvimientu personal dende una perspeutiva de formación física o espiritual. La diferencia ta ente los aspeutos más "civiles" y los más "militares" del combate y el desenvolvimientu personal. Vese al budo y al bujutsu como representantes d'una estratexa o filosofía particulares al respeutive de los sistemes de combate, pero asina y too los términos son aplicaos bastante llibremente y de cutiu tracamundiables.
Arte o estilu de vida
[editar | editar la fonte]Otru puntu de vista diz que'l bujutsu ye l'arte marcial qu'unu prautica, ente qu'un budo ye l'estilu de vida qu'unu lleva y el camín que s'anda al prauticar un bujutsu. Por exemplu, podíamos dicir que'l Yudu y el Jujutsu entrenaos como artes marciales práutiques son uno y lo mesmo, ello ye que la práutica del arte Jujutsu empobina a llograr l'estilu de vida del Yudu (el Yudu conocíenlu orixinalmente como Kano Jujutsu, pol so fundador Jigoro Kano. Lo que val tamién p'artes como'l kenjutsu/kendo y el iaijutsu/iaido.
Identificación con ún o otru términu
[editar | editar la fonte]Polo xeneral, una escuela d'artes marciales escueye'l nome col que se siente más a los sos deleres. Una escuela d'artes marciales podía escoyer llamar a la so práutica bujutsu, porque deseye más una conexón col pasáu, o llamar l'atención sobre que'l so arte prautícase como se facía nun determináu momentu de la hestoria. Otra podía escoyer llamar la so práutica budo pa reflexar un empeñu nel desarrollu espiritual y filosóficu, o cenciellamente pa reflexar que l'arte se desendolcara más apocayá.
Ver tamién
[editar | editar la fonte]- Bushido
- Hagakure (Fueyes Atapaes) por Yamamoto Tsunetomo
- Go Rin No Sho (El Llibru de los Cinco Aniellos) por Miyamoto Musashi