Джордж Акерлоф

Джордж Акерлоф
George Akerlof
Дата нараджэння	17 чэрвеня 1940(1940-06-17) (84 гады)
Месца нараджэння	Нью-Хэйвен, South Central Connecticut Planning Region[d], Канектыкут, ЗША
Грамадзянства	ЗША
Жонка	Джанет Елен
Род дзейнасці	эканаміст, прафесар
Навуковая сфера	эканоміка
Месца працы	Каліфарнійскі ўніверсітэт у Берклі Лонданская школа эканомікі і палітычных навук Джорджтаўнскі ўніверсітэт
Альма-матар	Ельскі ўніверсітэт Масачусецкі тэхналагічны інстытут (1966) Lawrenceville School[d] Sidwell Friends School[d]
Навуковы кіраўнік	Роберт Солау
Вядомыя вучні	Уільям Дадлі
Вядомы як	даследаванні рынку працы
Член у	Нацыянальная акадэмія навук ЗША Амерыканская акадэмія мастацтваў і навук American Economic Association[d] Эканаметрычнае таварыства[d]
Узнагароды	грант Гугенхайма (1973) Глабальная эканамічная прэмія[d] (2006) заслужаны член Амерыканскай эканамічнай асацыяцыі[d] член Эканаметрычнага таварыства[d] (1979) член Амерыканскай акадэміі мастацтваў і навук Fisher-Schultz Lecture[d]
Медыяфайлы на Вікісховішчы

Джордж Акерлоф (англ.: George Akerlof; нар. 17 чэрвеня 1940(1940-06-17), Нью-Хэйвен) — амерыканскі эканаміст, лаўрэат Нобелеўскай прэміі па эканоміцы (2001) «за аналіз рынкаў з несіметрычнай інфармацыяй» разам з Джозефам Стыгліцам і Майклам Спенсам, заснавальнік інфармацыйнай эканамічнай тэорыі. Акрамя таго Акерлоф вядомы сваімі даследаваннямі рынку працы і асабліва нярыначных заробкаў, якія фарміруюць у цяперашні час асновы новакейнсіянскай школы макраэканомікі.

Біяграфія

Нарадзіўся 17 чэрвеня 1940 года ў горадзе Нью-Хейвен (штат Канектыкут) у сям'і прафесара Ельскага ўніверсітэта, эмігранта са Швецыі. Пачаўшы сваё навучанне ў Ельскім універсітэце (1962 - ступень бакалаўра эканомікі), Акерлоф завяршыў яго ў Масачусецкім тэхналагічным інстытуце (1966 - ступень доктара эканомікі). Пасля заканчэння вучобы амаль увесь час выкладаў у Каліфарнійскім універсітэце ў Берклі. У 1967-1968 гадах працаваў прафесарам Індыйскага статыстычнага інстытута, у 1973 годзе быў адным з супрацоўнікаў Камітэта эканамічных дарадчыкаў пры прэзідэнце Ніксане. У 1978 годзе Акерлоф перайшоў у Лонданскую школу эканомікі і палітычных навук, але ў 1980 годзе канчаткова вярнуўся ў Каліфарнійскі ўніверсітэт у Берклі.

Жонка Акерлофа - Джанет Елен - вядомы эканаміст, прэзідэнт Федэральнага рэзервовага банка Сан-Францыска ў 2004-10 гадах, намеснік старшыні Савета кіраўнікоў Федэральнай рэзервовай сістэмай ЗША (з кастрычніка 2010 года).

Даследаванні

У жніўні 1970 г. змясціў у англійскім «Штоквартальным часопісе эканомікі» артыкул «Рынак "аўтабарахла": нявызначанасць якасці і рыначны механізм», у якім акрэсліў істотныя цяжкасці на рынках ва ўмовах асіметрычных звестак і за які атрымаў Нобелеўскую ўзнагароду. 28 лістапада 1986 г. выдаў у Кембрыджы разам з жонкай Джанет Елен кнігу «Узоры здзельнага заробку на рынку працы», дзе тлумачылася плата наймальнікам заробку звыш рыначнага ўраўнаважвання насуперак высновам неакласічнай школы эканомікі. У 1993 г. выдаў у амерыканскім часопісе «Брукінгсаўскія дакументы аб гаспадарчай дзейнасці» разам з Полам Ромерам артыкул «Марадэрства: гаспадарчае падонне банкруцтва дзеля прыбытку», дзе апісваліся ўмовы, пры якіх уласніку выгадней выціснуць сродкі з уласнага прадпрыемства замест таго, каб яго развіваць: «Банкруцтва дзеля прыбытку адбудзецца, калі дрэнны бухгалтарскі ўлік, слабое рэгуляванне або нізкія спагнанні за злоўжыванне даюць уласнікам пабуджэнне плаціць сабе больш за вартасць іх прадпрыемстваў і затым не выконваць сваіх даўгавых абавязкаў. Банкруцтва дзеля прыбытку найчасцей адбываецца, калі дзяржава ручаецца за даўгавыя абавязкі прадпрыемства».

У маі 1996 г. змясціў у «Штоквартальным часопісе эканомікі» разам з Майклам Кацам і сваёй жонкай артыкул «Разгляд пазашлюбнага дзетараджэння ў Злучаных Штатах», дзе тлумачылася, якім чынам касаванне крымінальнай адказнасці за аборт і пашырэнне даступнасці супрацьзачаткавых сродкаў сярод незамужніх жанчын прывяло да росту долі байструкоў сярод народжаных. 29 студзеня 2009 г. выдаў у Прынстане (шт. Нью-Джэрсі) разам з будучым Нобелеўскім лаўрэатам Робертам Шылерам кнігу «Жыццярадаснасць: як чалавечая псіхалогія кіруе гаспадаркай, і чаму гэта важна для сусветнага капіталізму», дзе тлумачылася значэнне пачуццяў пры гаспадарчым вырашэнні.

Спасылкі

• Старонка на старонцы Каліфарнійскага ўніверсітэта ў Берклі (англ.)
• Бібліяграфія Акерлофа // Даследніцкія паперы па эканоміцы