Дзмітрый Вячаслававіч Віцько

Дзмітрый Вячаслававіч Віцько
Дзмітрый Вячаслававіч Віцько
Дата нараджэння	6 сакавіка 1981 (43 гады)
Месца нараджэння	Прусы, Палажэвіцкі сельсавет, Старадарожскі раён, Мінская вобласць, БССР, СССР;
Грамадзянства	Беларусь;
Род дзейнасці	гісторык, картограф, рэдактар
Месца працы	Беларускі дзяржаўны тэхналагічны ўніверсітэт; Беларускі навукова-даследчы цэнтр электроннай дакументацыі; ARCHE Пачатак;
Навуковая ступень	кандыдат гістарычных навук (2008)
Альма-матар	гістарычны факультэт БДУ (2003); Беларускі дзяржаўны тэхналагічны ўніверсітэт (2007);

Зміцер Віцько, поўнае імя Дзмітрый Вячаслававіч Віцько (нар. 6 сакавіка 1981, Прусы, Старадарожскі раён, Мінская вобласць) — беларускі гісторык, картограф, рэдактар. Спецыяліст па вайскова-палітычнай гісторыі Вялікага Княства Літоўскага канца XVII — пачатку XVIII стагоддзяў. Кандыдат гістарычных навук (2008)^[1].

Біяграфія

Нарадзіўся 6 сакавіка 1981 года ў Прусах Старадарожскага раёна Мінскай вобласці^[1].

Скончыў у 2003 годзе гістарычны факультэт БДУ. У 2003 годзе працаваў настаўнікам гісторыі Старынскай базавай школы Стаўбцоўскага раёна^[1].

У 2007 годзе скончыў аспірантуру пры Беларускім дзяржаўным тэхналагічным універсітэце. У 2008 годзе абараніў кандыдацкую дысертацыю па тэме «Міжусобная барацьба магнацкіх груповак у Вялікім княстве Літоўскім у канцы XVII — пачатку XVIII ст.»^[1]

У 2007—2010 гадах працаваў малодшым навуковым супрацоўнікам у Беларускім дзяржаўным тэхналагічным універсітэце. З 2010 года вучоны сакратар Беларускага навукова-даследчага цэнтра электроннай дакументацыі. Да 2018 года рэдактар часопіса «Arche. Пачатак», кніжнага выдавецтва «Гайсак»^[1].

Навуковая дзейнасць

Даследуе ваенную гісторыю ранняга Новага часу, грамадзянскую вайну ў Вялікім Княстве Літоўскім у 1696—1702 гадах, удзел Вялікага Княства Літоўскага ў Паўночнай вайне ў 1702—1709 гадах, гісторыю парламентарызму ў Вялікім Княстве Літоўскім, мікрагісторыю, гістарычную геаграфію і картаграфію^[1].

Выдавец навуковай спадчыны гісторыка Мікалая Улашчыка^[1].

Бібліяграфія

Актуальные проблемы истории и культуры. Вып. 2: Парламентарызм у Вялікім Княстве Літоўскім у XVIII стагоддзі. Мінск, 2020.
Мікалай Улашчык. Збор твораў : у 3 т. Т. 1: Працы па археаграфіі і крыніцазнаўству. Смаленск, 2017; Т. 2: Працы па гісторыі. Смаленск, 2019.

Крыніцы

↑ ^а ^б ^в ^г ^д ^е ^ё Марозаў 2022.

Літаратура

ВІЦЬКО Дзмітрый Вячаслававіч // Сучасныя беларускія даследчыкі гісторыі Вялікага Княства Літоўскага : біябібліяграфічны даведнік / С. П. Марозаў. — Гродна-Каўнас: ЮрСаПрынт, 2022. — 290 с. — ISBN 978-985-7257-57-7, 978-609-96340-1-2.

[FOOTNOTEМарозаў2022-1] а ^б ^в ^г ^д ^е ^ё Марозаў 2022.

[1]