Сторна

Сто́рна (італ.: storno — перавод на іншы рахунак, адвод; ад stornare — паварочваць назад) — у агульным сэнсе вяртанне да ранейшага значэння пэўнага эканамічнага паказчыка; напрыклад, сторна плацеж — вяртанне авансавага плацяжа ў выпадку анулявання дагавора.

Старнавальная праводка

у бухгалтарскім уліку — бухгалтарская праводка, прызначаная, звычайна, для выпраўлення ранейшай памылковай праводкі. Звычайна ўжываецца так званае адмоўнае сторна, пры якім для выпраўлення памылковай праводкі робіцца дадатковая праводка на адпаведную суму, але з адмоўным знакам. Каб вылучыць адмоўныя сумы, іх пішуць чырвоным чарнілам, таму адмоўнае сторна і метад выпраўлення памылак праз сторна часам завуць чырвоным сторна. Часцей замест чырвонага чарніла адмоўныя сумы абводзяць прамавугольнай рамкай. Метад чырвонага сторна распрацаваны расійскім бухгалтарам-практыкам А. А. Берэці ў 1889 годзе.

Страхавое сторна

у страхаванні — паказчык, які характарызуе памяншэнне страхавога партфеля дзейных дагавораў доўгатэрміновага страхавання жыцця на вызначаную справаздачную дату. У гэты паказчык могуць уключацца датэрмінова спыненыя дагаворы ў сувязі з неаплатай страхавых узносаў з правам і без права страхавальніка на атрыманне выкупной сумы, а таксама ў сувязі са смерцю застрахаваных; дагаворы, якія скончыліся ў сувязі з канцом тэрміна страхавання ці наступленнем абумоўленай падзеі. Для сторна можа вылічацца адносны паказчык — адносіны колькасці дагавароў, якія складаюць сторна, да разліковага страхавога партфеля.

Літаратура

• Сто́рна // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 189. — 10 000 экз. — ISBN 985-11-0035-8. — ISBN 985-11-0251-2 (т. 15).