Derllys

Derllys a oa unan eus an eizh kombod a oa e Kantrev Gwarthaf, e Kembre er Grennamzer. Da gentañ e oa ul lodenn eus Rouantelezh Dyfed ha goude un tamm eus rouantelezh Deheubarth. Bremañ emañ an douaroù-se e kornaoueg Sir Gaerfyrddin.

Kantrev Gwarthaf gant e eizh kombod

En em astenn a rae Derllys e reter Kantrev Gwarthaf, war harzoù kombod Cydweli ha kombod Gwidigada, en Ystrad Tywi, a oa pelloc'h er reter. E-barzh Kantrev Gwarthaf e oa, tro-dro Derllys, kombodoù Penrhyn er c'hreisteiz, Ystlwyf er gornaoueg hag Elfed en hanternoz.

Caerfyrddin e oa pennlec'h ar c'hombod, ur gêr savet gant ar Romaned da gentañ, gant an anv Maridunum. E Caerfyrddin ivez e oa unan eus kreizennoù relijiel pennañ mervent Kembre er Grennamzer, gant eskopti Llan Deulyddog, lec'h ma voe skrivet Levr Du Caerfyrddin er XIII^vet kantved.

Gant ar barzh eus ar XIV^vet kantved Prydydd Breuan e oa bet savet ur varzhoneg da veuliñ Maredudd o Ynys Derllys (Maredudd eus Enez Derllys), anvet evel-se diwar al lec'h ma oa o chom, en ur maner un tammig er c'hreisteiz da gêr Caerfyrddin. Eno ez eus bremañ un dachenn golf, anvet "Derllys Court Golf Club".