kar

Gwelet ivez : car, kar, -kar, karr, quart

Brezhoneg

Etimologiezh

(Anv-gwan)Deveret eus an henvrezhoneg.

Meneget er C'hatolikon.

Da geñveriañ gant ar gerioù câr en kembraeg, car en kerneveureg, care, cara en iwerzhoneg, caros en galianeg, ha carus en latineg.

(Furm verb) Savet diwar kar-, pennrann ar verb karout, hep dibenn-ger.

Anv-gwan

Kar /ˈkɑːr/

1. A zo eus ar memes familh pe eus ar memes kerentiezh.
   • Ho lignez, o Tetah, zo ken kozh êl an douar,
     Hag atav, er bed-mañ, emañ stank ho tud kar ! — (Loeiz Herrieu, Tétah, lenn.)
   • Ar re-se zo kar dit ?
   • -Te a zo kar d’ar re-se ? -N'on ket vat : n'omp na kar na par. — (Jules Gros, Le trésor du breton parlé Deuxième Partie, 1970, p. 237.)
   • [...] kement hini zo din kar. — (Mari Vastrouilh (Kanaouenn).)
2. na kar na par

Deveradoù

• karadegezh
• karadek
• karant
• karantegezh
• karantek
• karantez
• karantezus
• karedig
• karer
• karet
• karour
• kar-pell
• kar-tost
• karus
• kerentiad
• kerentiezh
• pell-kar
• tost-kar

Troidigezhioù

• esperanteg : parenca ^(eo)
• galleg : parent ^(fr)
• italianeg : affine ^(it)
• saozneg : akin ^(en) , related ^(en)
• spagnoleg : pariente ^(es)

Anv-kadarn

	Unander	Liester
Gourel	kar /ˈkɑːr/	kerent /ˈkeːrent/
Benel	karez /ˈkɑːres/	karezed /kaˈreːzet/

Kar /ˈkɑːr/ gourel (liester kerent)

1. Den eus ar memes familh pe eus ar memes kerentiezh.
   • Na mamm, na tad, na kar ne vezo ouzh e c’hortoz, na mab ebet evit pokat dezhan a-barzh mervel. — (Jakez Riou, Lizer an hini maro, Emgleo Sant Iltud, Brest, 1925, p. 62.)
   • Ha Maurice hag a blije da Robert dreist-holl, kar oa deomp un tammig. — (Anne Guillou, Gisèle pe ar vuhez adsavet, troidigezh gant Herve Danielou, Ar Skol Vrezoneg - Emgleo Breiz, 1998, p. 74.)
   • Ne'z eus moien ebet da c'houzout penaos e c'hellfe ar Marabouded bezañ kerent da Vahomet. — (Feiz ha Breiz, niv. 27, 5 Gouere 1879.)
2. (Kozh) Mignon.
   • Na vize kar d’ar Vretoned,
     Na d’ar zent a Vreiz keneubed,
     Neb na veule ket sant Kado,
     Paeron brezelourien ar vro — (Stourm ann Tregont, in La Villemarqué, Barzaz Breiz, 1839.)
3. (Ent strizh, el liester) An tad hag ar vamm.
   • E gerent a oa Bretoned, ginidik o-daou eus a Vreizh-Veur, hag a oa eus ar re gentañ a dreuzas ar mor evit dont da chom da Vro-Arvor. — (Yann-Vari Perrot, Bue ar Zent, Montroulez, 1912, p. 760.)

Troidigezhioù

• galleg : parent ^(fr)  ; ami ^(fr) (sens ancien)
• kembraeg : câr ^(cy)

Furm verb

Kemmadur	Furm
hep	kar
dre vlotaat	gar
dre c'hwezhañ	c'har
dre galetaat	digemm
amreizh	digemm

Kar /ˈkɑːr/

1. Furm ar verb karout e trede gour unan an amzer-vremañ, en doare-disklêriañ.
   • Me az kar hag az karo, Agnez ! — (Loeiz ar Floc'h, Trubuilhou ar seiz potr yaouank, 1927, p. 29.)
   • Kamm ki pa gar. — (Jules Gros, Le trésor du breton parlé Deuxième Partie, 1970, p. 240.)
   • Julian am c'har evit gwir, ne c'hellan mui hen nac'h abaoe ar pezh am eus gwelet ha klevet. — (Lomig Helies, Heritourien Biel al liardoù, 1909, p. 24.)

   war-lec'h ma, mar

   • Ma matezh, ho po, ma kar. KAB 3/165
2. Furm ar verb karout en eil gour unan an doare-gourc'hemenn.
   • Kar da enor ha kemer kasoni ouzh pep droug, en pep lec’h. — (Yann-Vari Perrot, Erwan ar Moal, Bue ar Zent, Montroulez, 1912, p. 601.)

Krennlavarioù

• Bezo du, bezo gwenn
  Pep gavr a gar he menn. — (Jules Gros, Le trésor du breton parlé Troisième Partie, 1974, p. 312.)
• Bezo du, bezo gwenn
  Pep hini a gar e venn. — (Jules Gros, Le trésor du breton parlé Troisième Partie, 1974, p. 312.)