Akiko Morigami
|
C'l artìcul chè 'l è scrit in
Miranduléś |
L’Akiko Morigami (Uśàka, 12 ad Śnar dal 1980, scrit 森上亜希子 in Giapunéś) l'è stada na tenìsta giapunéśa prufesiunìsta da 'l 1998 a 'l 2009. Al sò ranking più bèl l'è stâ al nùmar quarànt'òṅ, tucâ al 15 'd Agóst dal 2005.
In dla sò caréra l'à purtâ a cà òt tìtui in tut (òṅ ad qvéi WTA e sèt ad qvéi ITF) e mis in bisàca 1.177.175 dòlar.
Al film ch'a gh piàś da piò 'l è Pearl Harbor.
Caréra
Dòp avér vins siē turnèo ITF (da 'l 2000 a 'l 2004) la s fà nutàr a 'l Roland Garros dal 2006 quànd la fà fóra a 'l prim tùran la nùmar tri dal mónd Nadia Petrova.
La Morigami la vins pò al sò prim turnèo WTA al 7 ad Maǵ dal 2007 a Praga baténd in dla finàla la Marion Bartoli par 6–1 6–3. La s pòrta a cà anc 'l ITF in sal dûr ad Taoyuan dand la paga a la Yanina Wickmayer par 6–4 7–6.
L'à śugâ pardénd anc dū finàli a Cincinnati: in dal 2005 cóntar la Patty Schnyder e in dal 2007 cóntar la rusa Anna Čakvetadze. La giapunéśa la gh dà sù in dal 2009 dòp avér śugâ al turnèo ad cà sua a Uśàka in dua la pèrd a 'l secónd tùran da la Samantha Stosur (che pò l'al vinsarà) par 1-6 2-6.