Pieter Huistra

Dizze side moat noch by de tiid brocht wurde. Jo wurde útnûge om dêr in begjin mei te meitsjen

Pieter Huistra

Basis ynformaasje
Namme	Pieter Huistra
Berne	18 jannewaris 1967
Berteplak	Goaiïngea
Ploech	FK Grins
Funksje	Haadtrener

Pieter Huistra (Goaiïngea, 18 jannewaris 1967) is in Frysk âld-proffuotballer en fuotbaltrainer. Huistra spile de measte fan syn wedstriden as linksbûten.

Karriêre as fuotballer

Huistra begûn syn fuotbalkarriêre as amateur by Drachtster Boys, dêr't al gau dúdlik by waard dat er in protte talint foar it fuotbal hie. Syn debút yn it betelle fuotbal makke er op 5 septimber 1984 by FK Grins yn de wedstriid tsjin FK Folendam. Nei twa jier waard er ferhierd oan BV Feandam, dat doe noch yn de Earedifyzje fuotballe. Dêr foel er sa op dat de trainer fan FK Twinte, Kees Rijvers, him yn 1987 nei dy klup helle. Dêr waard er in fêste basiskrêft en in belangrike spiler fan it alvetal. Yn 1988 waard er dan ek foar it earst oproppen foar it Nederlânsk alvetal.

Yn 1990 gie Huistra nei de Glasgow Rangers yn Skotlân ta te fuotbaljen. Hy spile fiif seizoenen foar dy klup en waard al dy jierren kampioen fan Skotlân. Yn 1995 folge er Wim Jansen nei Japan. Tegearre wurken hja yn de J-League by Sanfrecce Hiroshima.

Nei twa seizoenen yn Japan soe er yn 1997 foar in heal jier wer fuotbalje foar FK Grins. Yn it seizoen 1997/1998 gie Huistra nei it Belgyske Lierse SK. Nei twa seizoenen by Lierse rekke er swier blessearre oan syn haksine. Yn syn lêste jier by Lierse kaam er dan ek net oan spyljen ta. Yn it seizoen 1999/2000 gie er noch foar ien jier nei RBC Roosendaal, mar ek dat seizoen hat Huistra net fuotbalje kind.

Statistiken

Seizoen	Klup	Kompetysje	Wedstriden	Doelpunten
1984-1985	FK Grins	Earedifyzje	10	1
1986-1986	FK Grins	Earedifyzje	7	0
1986-1987	BF Feandam	Earedifyzje	33	5
1987-1988	FK Twinte	Earedifyzje	34	8
1988-1989	FK Twinte	Earedifyzje	34	6
1989-1990	FK Twinte	Earedifyzje	25	3
1990-1991	Glasgow Rangers	Scottish Premier League	27	4
1991-1992	Glasgow Rangers	Scottish Premier League	32	5
1992-1993	Glasgow Rangers	Scottish Premier League	30	4
1993-1994	Glasgow Rangers	Scottish Premier League	21	6
1994-1995	Glasgow Rangers	Scottish Premier League	15	3
1995	Sanfrecce Hiroshima	J-League	35	6
1996	Sanfrecce Hiroshima	J-League	28	7
1996-1997	FK Grins	Earedifyzje	9	2
1997-1998	Lierse SK	Earste Klasse	32	11
1998-1999	Lierse SK	Earste Klasse	22	0
1998-1999	Lierse SK	Earste Klasse	0	0
1999-2000	RBC Roosendaal	Earedifyzje	0	0
Totaal			394	71

Ynterlannen

Huistra hat yn syn karriêre acht kear yn it Nederlânsk alvetal fuotballe. Syn debút wie op 16 novimber 1988 yn de freonskiplike wedstriid tsjin Itaalje. Syn lêste wedstriid foar Oranje spile er yn 1991.

As gefolch fan in blessuere foel Huistra bûten de seleksje foar it Wrâldkampioenskip fuotbal yn 1990.

Yn totaal hat Huistra acht ynterlannen spile, yn dy wedstriden kaam er net ta skoaren.

Karriêre as trainer

Nei syn fuotbalkarriêre wie Huistra fan 2001 oant en mei it seizoen 2004/2005 jeugdtrainer by FK Grins. Nei dat jier waard er assistint-trainer by Vitesse, dat wie hy oant en mei 2008. Op 3 april 2008 waard bekend dat Huistra de taken fan Rob Witschge tydlik oernimme soe as assistint-trainer by AFC Ajax. Fan it seizoen 2009/2010 ôf is Huistra oansteld as coach fan Jong Ajax, as opfolger fan Adrie Koster. Op 22 desimber 2009 waard bekend dat er fan it seizoen 2010/2011 ôf oan de slach soe as haadtrainer fan FK Grins. Hy is de opfolger fan Ron Jans, dy't nei it seizoen 2009/2010 FK Grins ferlit en oan de slach sil by SK It Hearrenfean.

Statistiken

Perioade	Klup	Kompetysje	Funksje
2001-2005	FK Grins	Earedifyzje	Jeugdtrainer
2005-2008	Vitesse	Earedifyzje	Assistint-trainer
2008-2009	AFC Ajax	Earedifyzje	Assistint-trainer
2009-2010	AFC Ajax	Earedifyzje	Trainer fan beloften
2010-	FK Grins	Earedifyzje	Haadtrainer

Keppeling om utens